1 Obe wɔ di Yuda ɔka Yehosafat lapɛ aakple aasifi ni lɛkayo nɔɔ di Yerusalem buɛɛ yi, 2 Hanani obisuɔtɔbi Yehu asaanyatɛ nwu, ladie aakyɛ aalaakyakako ɔka, ni aatɔkɔ nwɔ alɛ, "Dilɛ alɛ faakyakaako kpiletɛ, fambɔmbɔ mba niekyidi ni SAATE nwu? Ta nle mmle oso yi, SAATE nwu ɔblɔ yakayaka ntika fɔ di suoto. 3 Akpakpa dite yi, dibiene lewo nsi fɔ kaamɛ, diekye faakpakpaa Asera sewoso feekyisa di kasɔ nwu suoto, fɛɛyɔ otu lɛfɔ kafɔɔ fɛɛtɛ foowolaa Yaa."

4 Yehosafat lasiɛ di Yerusalem, ni aakple aadie di Beer-Seba batii kamɛ aakyɛ Efraim kale lekpenkpe aalaamunikĩisa ma aakplesa aawako SAATE nwu, bate lɛma Yaa nfũ nɛ. 5 Aadiki bakantɛ di kasɔ nwu suoto, di Yuda okpoo kplɛ siene biala kamɛ. 6 Ni aatɔkɔ ma alɛ, "Bilolaa lɛsaa le biɔbla ni binyu nwaa, diekye diele batii biɔka lɛka minta kafɔɔ SAATE nwu, nnwɔ ninsiko ye ni, di obe lele biediki lɛbɛ ku lɛpɔɔ. 7 Nioso bita SAATE nwu lɛyɛkɛ disiɛ ye kaamɛ. Bielolaa lɛka bika, diekye katafaa ee anu onyu ee lewofa kamɛ asaa ofũ nnaa di SAATE Yaa loo nwu nfũ."

8 Di Yerusalem kafɔɔ yi, Yehosafat ladiki Lewi batii, olebatatɛ ku Israel batii ayo kamɛ banɔɔfo bawo alɛ baablako SAATE nwu kufiofa ɔkpɛ, baalolaa kafɔɔ batii ntɛɛ. Batii ba mmle lasiɛ di Yerusalem. 9 Afiofa ya aakpee ma ni ninle n-ya mmle nɛ: "Dikpeni biɛbla ɔkpɛ di onukwale ole kamɛ ku otu lee omuu di SAATE nwu lɛyɛkɛ kamɛ. 10 Ɔlaa biala nimakye kale lee batii ba ninsi ni di sekpoo kplɛ kamɛ kun-wa ni di anu lee- kuntɛ ntɔ owii ee sɛlaa bamba se niɛkaako ni kufiofa, ablasaa sisuku, sɛsaabla ee amanle yi- biká ma, di mmle manaabla ni okpile bayila ni di SAATE nwu suoto; nse diele nkpo, ɔblɔ nɔɔ kamawa di aye ku babilee suoto. Bibla nle mmle, ni bilɔbabla okpile.

11 "Oletatɛ nɔɔfo Amaria kamayila ye kaanya di ɔlaa lele niɛkaako ni SAATE nwu, Ismael obisuɔtɔbi Sebadia, Yuda kɔna kanyayilatɛ nwu kafɔɔ kamayila ye kaanya di ɔlaa lele niɛkaako ni ɔka, Lewi batii kafɔɔ kamabla ɔkpɛ fɛ banɔɔfotii di anu lee. Bikpee osie, di SAATE nwu kafɔɔ asiɛko mba nielolaa bɛɛbla ni."