1 Ninfɛ di Abigya latɛ ɔnyɛɛ ku bate nɔɔ, ni baakookaa nwɔ di Dawid Okpoo kplɛ nwu nɛ. Ni di obisuɔtɔbi nɔɔ Asa labayila nwɔ kaanya fɛ ɔka, di obe nɔɔ kamɛ, kale nwu lasiɛ di atoko ɔkyɛ ole kamɛ alɛɛ lefosi.

2 Asa labla lɛsaa le nialɛ, diasiɛko ni kafɔɔ di SAATE Yaa nɔɔ anu. 3 Aakpakpaa bafɔɔ oleɔta akyikye ku ntakalekɔ nwu, aabibiɛ afiɔtii, ni aabudi Asera sewoso aatɛ kaasɔ nɛ. 4 Ni aatɔkɔ Yuda batii alɛ bawolaa SAATE nwu, bate lɛma Yaa nwu, baakyɔɔ kafɔɔ afiofa nɔɔ ku sɛlaa nɔɔ atoko nɛ. 5 Aakpakpaa ntakalekɔ nwu ku olufui oleɔta akyikye di okpoo biala di Yuda kamɛ, ni di sɛka kalekɔ nwu lasiɛ di atoko ɔkyɛ ole kamɛ di kalɔ nɔɔ nɛ. 6 Aabudi sekpoo kplɛ siene aatɛ di Yuda, diekye kasɔ nwu lasiɛ di atoko ɔkyɛ ole kamɛ. Kuonwii dita dieko nwɔ kakpɛ di alɛɛ nwu nkpo kamɛ, diekye SAATE nwu latɔɔ ɔnyɛɛ ɔtɛ.

7 Ni aatɔkɔ Yuda batii alɛ, "Bita butɛ sekpoo se mmle, buotofo seyoyiɛ kafɔɔ bukyisa sĩ ku ayo takale, buokpee n-yoko ku abɔɔsaa. Kalewo di kasɔ nwu lekple kale, diekye buawolaa SAATE Yaa loo nwu; buawolaa nwɔ, ni atɔɔta wo ɔnyɛɛ ɔtɛ di ɔfankyi biala nɛ." Nioso baatɛ sekpoo nwu, ni di asaa kafɔɔ lalɛ ɔkyɛ aata ma nɛ.

8 Asa lawɛ bakpɛtɛ nkpe-alafa-atiɛ baakye ni Yuda, baaklee ni kubiafunsaa kplɛ ku akplɔ, ku bakpɛtɛ nkpe-alafa-anyɔ-afosi-anɛ baakye ni Benyamin, baaklee ni kubiafunsaa biibii ku kɔtaa. Mba mmle bamuu lale bakpɛtɛ ku sɛkambi.

9 Etiopia otii nwu Serah lakyɛ aalaadieko ma kakpɛ ku bakpɛtɛ dikudi kplɛ ku bakeke ba di bapɔnkɔ nnanfi ni alafa-atiɛ, ni baawa baabadu bia Maresa nɛ. 10 Ni di Asa ladie aalakyakako nwɔ, ni baalaayila kakpɛ di Sefata Ɔtaata niɛkaako ni Maresa nɛ.

11 Ninfɛ di Asa lalɛɛ SAATE Yaa nɔɔ aabuɛ alɛ, "SAATE, kuonwii nnaa fɛle afɔ abakyakaako ni nnwɔ ninaa ni osie di sientɛ suoto. Oo SAATE Yaa loo, kyakaako wo, diekye afɔ buotika disi, di leyooto lɛfɔ kamɛ kafɔɔ buɔwa bakpɛtɛ dikudi kplɛ le mmle ɔkpɛko nɛ. Oo SAATE, afɔ ninle wo Yaa; tanta otii kuonwii lalenkee fɔ."

12 Ninfɛ di SAATE nwu lapɛ Etiopia batii aatɛ kaasɔ di Asa ku Yuda batii anu nɛ. Etiopia batii latoso, 13 ni di Asa ku bakpɛtɛ nɔɔ latikanko ma baalaadu bia Gerar nɛ. Etiopia batii ba nianɔɔ ni kakpɛ latɛ baapɔ alɛ batansinfuo ɔtaka; baawɔɔsa ma di SAATE nwu ku bakpɛtɛ nɔɔ anu. Ni di Yuda bakpɛtɛ latuka kakpɛ kamɛ asaa kpinwu baasifiko nɛ. 14 Baawɔɔsa sekpoenyii se simuu niamana Gerar siakyi nii, diekye SAATE nwu lɛyɛkɛ lapɛ ma. Baalɛ sekpoenyii se mmle simuu kakpɛ kamɛ asaa baasifiko, ta asaa kpinwu lawɛ ni ninfa oso. 15 Baadieko kafɔɔ babɔkɛɛ bakpatɛ nsiɛkɔ, ni baakpaa bafoso ku batie ku babɔkɛɛ ba nintuka ni atoo di akudi kanya baasifiko nɛ. Ninfɛ baakple baasifi Yerusalem nɛ.