1 Ninfɛ di Solomon labuɛ alɛ, "SAATE nwu labuɛ alɛ abasiɛ di lelokonkyɛ tunutunu kamɛ; 2 Ntotofo olekatakɔ ka nikɔlɛ ni onyu lɛta fɔ, lɛba le fabasiɛ, dinaa ni kaloo."

3 Obe wɔ di Israel dikudi nwu nimuu layila ni ninfa yi, ɔka nwu lamunikĩi aakyɔɔ ma anu aata ma lɛtɔtrɔ. 4 Ninfɛ aabuɛ alɛ:

"Baatansa SAATE nwu, Israel Yaa nwu, nnwɔ nintɔɔbla ni ku nnɛɛ nɔɔ di ɔlaa wɔ aabuɛ ni ku kanya nɔɔ aatɛ aata ni teemi Dawid. Diekye aabuɛ alɛ, 5 ‘Diayɔ ni di dii le lakpaa batii nii ladieko ni di Egipte kasɔ suoto yi, nindiki okpo kplɛ di Israel kɔna kukunwii kamɛ alɛ baatofo olekatakɔ manta Leyooto nii alɛ diate ninfa, ee ndiki otii owo nlɛ ale kanyayilatɛ di batii nii Israel suoto. 6 Kafɔɔ kanunua ntoodiki Yerusalem nlɛ Leyooto nii dite ninfa, ni ntoodiki Dawid nlɛ ale sɛka di batii nii Israel suoto nɛ.’

7 "Diasiɛ di teemi Dawid otu kamɛ alɛ ootofo olekatakɔ anta SAATE nwu Leyooto, Israel Yaa nwu. 8 Kafɔɔ SAATE nwu latɔkɔ teemi Dawid alɛ, ‘Ta disi fɔ ni di otu kamɛ falɛ footofo ni olekatakɔ fanta ni Leyooto nii oso yi, feelolaa fɛɛbla alɛ fɛɛwɛ nle mmle di otu lɛfɔ kamɛ. 9 Kafɔɔ, diele afɔ ninle nnwɔ ninmatofo ni olekatakɔ nwu, kafɔɔ obisuɔtɔbi lɛfɔ, nnwɔ ninle ni afɔ omu suoto sina ku ntɔ- nnwɔɔ ninle nnwɔ ninmatofo ni olekatakɔ nwu anta ni Leyooto nii nɛ.’

10 "SAATE nwu ntɔɔbla di ɔlaa wɔ aabuɛ aatɛ ni suoto. Ntɔɔbale teemi Dawid atesaa ni di kanunua nfɛ nsi di Israel lɛkakpomii suoto fɛ mmle okle di SAATE nwu labuɛ aatɛ nii, ni ntootofo olekatakɔ nwu lɛta SAATE nwu Leyooto, Israel Yaa nwu nɛ. 11 Nfa lɛyɔ kanya ninii lɛlakaa nwu lese nɛ, nle kamɛ di SAATE nwu kanya ninii le aabla ni ku Israel batii nsi nii."

12 Ninfɛ di Solomon layila di SAATE nwu oleɔta akyikye anu di Israel dikudi nwu nimuu anu ni aablɛfɛsa nnɛɛ nɔɔ aakyɔɔ osi nɛ. 13 Solomon labla abɔɔsaa sɛɛle akpa, lɛkaana labla nkpaa nkuɛnsĩ-anɛɛkpa-akuɔ, lɛblɛfɛ nkpaa nkuɛnsĩ-anɛɛkpa-akuɔ, lɛtaka kafɔɔ nkpaa nna-anɛɛkpa-akuɔ, ni aayɔ ni aase di kayi kaflɔnkɔ ntɛɛntɛɛ nɛ. Aayie aayila di akpa nwu suoto ni aapɛ akunkyi di Israel dikudi nwu nimuu anu ni aablɛfɛsa nnɛɛ nɔɔ aakyɔɔ osi nɛ. 14 Ni aabuɛ alɛ:

"Oo SAATE, Israel Yaa, Yaa kuonwii nnaa ate ni fɛle afɔ di osi ee kasɔ suoto- afɔ wɔ ninklee ni lɛbɔmbɔ kanya ninii lɛfɔ ku bakpɛmblatɛ lɛfɔ ba ninwini mankyɛ ni di osuku lɛfɔ suoto ku otu lɛma omuu. 15 Fatɔɔbla di ɔlaa wɔ faabuɛ faatɛ faata ni kpɛmblatɛ lɛfɔ teemi Dawid; ku kanya lɛfɔ faabuɛ faatɛ ku kɔnɛɛ lɛfɔ kafɔɔ fatɔɔbla ni- fɛ mmle dite ni miɛ.

16 "Kanunua SAATE, Israel Yaa, bla fata kpɛmblatɛ lɛfɔ teemi Dawid sɛlaa se faabuɛ faatɛ faatɔɔ ni di obe wɔ faabuɛ ni falɛ, ‘Dilɔbawa diidii alɛ faawɛ otii aasiɛ ni di Israel lɛkakpomii suoto di anu nii, nse babisuɔtɔbi lɛfɔ lelolaa beenyu di asaa ya amuu bɔɔbla ni kamɛ, bɛɛkyɛ di anu nii di kufiofa nii kanya, fɛ mmle fatɔɔbla nii.’ 17 Kanunua kafɔɔ yi, Oo SAATE, Israel Yaa, ta ɔlaa lɛfɔ wɔ faabuɛ faatɛ faata ni kpɛmblatɛ lɛfɔ kuwa kaanya.

18 "Kafɔɔ kubio, Yaa kamadiki kasiɛ kaasɔ suoto ku batii? Osi, bia osi-osi wɔ niɛtaka katoo dilenke ni diemuɔ dita fɔ. Ni lɛ nfɛ di olekatakɔ ka mmle letofo ni! 19 Oo SAATE Yaa nii, kafɔɔ kyɔɔ atoko di kpɛmblatɛ lɛfɔ ɔlaa ɔpɛ ku lekoto le otikiti anta ni nyaami ɔnya suoto. Nu lɛfaa ku ɔlaa ɔpɛ wɔ di kpɛmblatɛ lɛfɔ kɔpɛ ni di anu lɛfɔ. 20 Ta anu lɛfɔ atikiti akyɔɔ olekatakɔ ka mmle anu kakũ ku kakyɛ, di lɛba le mmle faabuɛ ni falɛ fabayɔ Leyooto lɛfɔ fantɛ ni ninfa. Nu ɔlaa ɔpɛ wɔ di kpɛmblatɛ lɛfɔ kɔpɛ ni di lɛba le mmle ɛɛkyɔɔ ni anu. 21 Nu kpɛmblatɛ lɛfɔ ku batii lɛfɔ Israel sɛlaa nse bɛɛkyɔɔ anu di lɛba le mmle bɛɛpɛ ɔlaa. Nu fakyeko osi, kasiɛkɔ lɛfɔ; nse feenu kafɔɔ yi, faayɔ fakyɛ.

22 "Nse otii lɛbla owo nɔɔ okpile dikaatɛ kafɔɔ alɛ ɛɛka ntam, ɛɛwa ɛɛbaka ntam nwu di oleɔta akyikye lɛfɔ anu di olekatakɔ ka mmle yi, 23 ni faanu fakyeko osi faadiki kɔkpaa. Ka lɛka fata bakpɛmblatɛ lɛfɔ, faata lɛpɔɔ kpitɛ nwu koto, faayɔ lɛsaa le ɛɛbla ni fatika di nnwɔɔ omu nɔɔ disi. Ta nnwɔ ole ninkpe ni lɛbɛ, faabla fatɔɔ di lɛbɛ nɔɔ kanya.

24 "Nse beelenkee batii lɛfɔ Israel di kakpɛ kamɛ ta bɛɛbla ni okpile di suoto lɛfɔ oso, bɛɛpɛbeekple bɛɛwa bɛɛbadiki sikpile lɛma beebuɛ, bɛɛlɛɛ leyooto lɛfɔ, bɛɛpɛ ɔlaa beetikiti lekoto di anu lɛfɔ di olekatakɔ ka mmle kamɛ yi, 25 ni faanu fakyeko osi, faayɔ batii lɛfɔ Israel okpile fakyɛ ma faakplesa ma kafɔɔ fawako kasɔ ka faayɔ faata ma ni ku bate lɛma.

26 "Nse fɛɛsɛɛ osi, di kanto kafɔɔ diloosinnɔɔ ta batii lɛfɔ lɛbla ni okpile di suoto lɛfɔ oso, ni nse bɛɛkyɔɔ anu di lɛba le mmle bɛɛlɛɛ leyooto lɛfɔ, beekyi kafɔɔ di sikpile lɛma suoto ta faatɔɔnanfi ma ni kootoko oso yi, 27 ni faanu fakyeko osi, faayɔ kafɔɔ bakpɛmblatɛ lɛfɔ, batii lɛfɔ Israel sikpile fakyɛ ma. Tuo ma osuku biene wɔ suoto baasiɛ ni nkpa, faata kafɔɔ kanto anɔɔ di kasɔ ka faata ni batii lɛfɔ fɛ atesaa.

28 "Nse kɔka ee ofiɛ kpile lɛwa di kasɔ nwu suoto, ee alesaa lɛlalaa ee kabiene lɛkpɛ, balososo ee atroee, ee nse balo lɛbamana sekpoo kplɛ lɛma lele beekyi, di anyasaa lele ee ɔfiɛ owo lɛwa yi, 29 ni nse Israel otii lɛfɔ lele lɛpɛ ɔlaa ee eetikiti lekoto- di obiala letofo dibuo nɔɔ ku ninyɛnyɛ nɔɔ, ɛɛblɛfɛsa nnɛɛ nɔɔ kafɔɔ ɛɛkyɔɔ olekatakɔ ka mmle yi- 30 ni faanu fakyeko osi, kasiɛkɔ lɛfɔ nwu. Yɔ fakyɛ, fanaanfi otii biala kootoko di asaa ya amuu ɛɛbla ni kanya, di obe wɔ faye ni otu nɔɔ kamɛ (diekye lete lɛfɔ nin-ye batii situ kamɛ), 31 alɛ baayɛkɛ fɔ mankyɛ kafɔɔ di sisuku lɛfɔ di obe wɔ omuu basi ni di kasɔ ka faata ni bate loo suoto.

32 "Ɔfɔɔ wɔ ninanle ni batii lɛfɔ Israel kafɔɔ eekye ni kasɔ ka niɛkyo ni ɛɛwa ni ta leyooto lɛfɔ kplɛ ku kɔnɛɛ lɛfɔ osie ku kɔnɛɛ lɛfɔ lɛnaanfi oso yi- nse ɛɛwa ɛɛbakyɔɔ anu di olekatakɔ ka mmle ɛɛpɛ ɔlaa yi, 33 ni faanu fakyeko osi, kasiɛkɔ lɛfɔ nwu, faabla lɛsaa lele di ɔfɔɔ nwu lɛkaalɛ eekyeko ni ɔkyɛ lɛfɔ fatɔɔ, di mmle di batii ba bamuu di kasɔ suoto kamatofo ni leyooto lɛfɔ manyɛkɛ fɔ ni kafɔɔ, fɛ mmle di batii lɛfɔ bamu Israel mbla ni, baatofo kafɔɔ alɛ Leyooto lɛfɔ ntika di leyo le mmle ntootofo ni suoto.

34 "Nse batii lɛfɔ lɛtaka kakpɛ di balo lɛma suoto, di kakɔ lele feekpee ma, nse bɛɛpɛ ɔlaa bɛɛkyɔɔ anu kafɔɔ di okpoo kplɛ wɔ mmle feediki ni ku olekatakɔ ka ntootofo lɛta ni Leyooto lɛfɔ yi, 35 ni faanu ɔlaa ɔpɛ ku lekoto otikiti lɛma fakyeko osi, faata ma lelenkee.

36 "Nse bɛɛbla okpile di suoto lɛfɔ- diekye kuonwii nnaa alɛ nnwɔɔ ambla ni okpile oso yi- fɛɛnya ɔblɔ feekpeeko ma fɛɛyɔ ma feekpee di lo lɛma nnɛɛ, ɛɛmufũ ma eesifiko kasɔ ka niekyo ni fanfanfa ee nka niɛtɛɛtɛɛ nii; 37 nse bɛɛwɛ dikyi di situ lɛma kamɛ di kasɔ ka beemufũ ma beesifiko ni, beekyi di sikpile lɛma, beetikiti fɔ lekoto kafɔɔ di kasɔ ka beemufũ ma beesifiko ni, beebuɛ alɛ, ‘Buɔbla okpile, buɔbla lɛsaa le ninanlɛ nii buodiki kafɔɔ kɔkpaa kpile’; 38 ni nse beekple bɛɛwa ɔkyɛ lɛfɔ ku otu lɛma omuu ku ɔkla lɛma omuu di kasɔ ka baamufũ ma baasifiko ni suoto, bɛɛkyɔɔ anu kafɔɔ di kasɔ ka faata ni bate lɛma, bɛɛkyɔɔ anu di okpoo kplɛ wɔ fatodiki ni, bɛɛkyɔɔ anu kafɔɔ di olekatakɔ ka ntootofo lɛta ni Leyooto lɛfɔ bɛɛpɛ ɔlaa yi; 39 ni nu ɔlaa ɔpɛ lɛma ku lekoto otikiti lɛma fakyeko osi, kasiɛkɔ lɛfɔ nwu, faata ma lelenkee. Ni faayɔ fakyɛ batii lɛfɔ ba niabla ni okpile di suoto lɛfɔ.

40 "Kanunua yi, Yaa nii, ta anu lɛfɔ atikiti di atoko lɛfɔ kafɔɔ anu sɛlaa se kɔpɛ nta fɔ ni di lɛba le mmle.

41 "Oo SAATE Yaa, taka kanunua, faawa ɔnyɛɛ katɛkɔ lɛfɔ,

afɔ ku lɛlakaa lɛfɔ osie.

Oo SAATE Yaa, ta olebatatɛ lɛfɔ bayɔ didiki akpeele bakpee,

ta baklekletɛ lɛfɔ bapɔ̀ di dibiene lɛfɔ kamɛ.

42 Oo SAATE Yaa, tansĩ otii lɛfɔ wɔ fɛɛpɛ ni ɔfɔɔ.

Nyuma lɛbɔmbɔ kplɛ le faabuɛ faatɛ faata ni kpɛmblatɛ lɛfɔ Dawid."