1 Obe wɔ di Rehoboam labuo ni Yerusalem yi, aasiisa Yuda ku Benyamin leyo kamɛ batii- bakpɛtɛ nkpe kɔlafa-afosi-anɛ- alɛ balaakpɛko Israel, baakple bafũ sɛka kalekɔ nwu bata Solomon obisuɔtɔbi Rehoboam.

2 Kafɔɔ SAATE nwu ɔlaa wɔ mmle lawa kuata Semaia, Yaa otii nwu alɛ: 3 "Tɔkɔ Yuda ɔka, Solomon obisuɔtɔbi Rehoboam ku Israel batii bamuu di Yuda ku Benyamin falɛ, 4 ‘Nnya ɔlaa wɔ di SAATE nwu kobuɛ ni alɛ: Bitankata biakyɛ bialaakpɛko babilee. Obiala lee atɔɔkyɛ leyo, diekye ami niɛbla nle mmle.’ " Nioso baanu SAATE nwu ɔlaa, baapɛ baakple baadiɛ Yeroboam ɔlaakpɛko.

5 Rehoboam lasiɛ di Yerusalem ni aabudi sekpoo aatĩi kakpɛ osuku di Yuda nɛ: 6 Betlehem, Etam, Tekoa, 7 Bet-Sur, Soko, Adulam, 8 Gat, Maresa, Sif, 9 Adoraim, Lakis, Aseka, 10 Sora, Ayalon ku Hebron. Nse mmle niale kakpɛ sekpoo kplɛ di Yuda ku Benyamin nɛ. 11 Aata sĩ siawɛ osie, ni aayɔ kakpɛ kanyabayilatɛ aase sĩ kaanya nɛ, anta ma alesaa, nnɔnyi ku nta. 12 Aayɔ kubiafunsaa ku akplɔ aatɛ di sekpoo kplɛ nwu simuu kamɛ, ni aabla ma baawɛ osie nwaa nɛ. Nioso Yuda ku Benyamin lale Rehoboam sekpoo kplɛ.

13 Olebatatɛ ku Lewi batii ba niakye ni kale akudi lɛma sekpoo simuu di Israel omuu layila nwɔ kamaa. 14 Bia Lewi batii nwu ladiɛ babɔkɛɛ lɛma sɛfa nweekɔ ku asaawɛ lɛma baatɛ, ni baawa Yuda ku Yerusalem nɛ. Diekye Yeroboam ku babisuɔtɔbi nɔɔ lasĩ ma fɛ SAATE nwu olebatatɛ. 15 Ni aadiki nnwɔɔ omu olebatatɛ aata ntakalekɔ nwu ku tie ku lɛnankyuebi afiɔ ya aabla ni nɛ. 16 Mba niakye ni Israel kɔna biala kamɛ, niatɛ ni situ lɛma baatoowolaa ni SAATE nwu, Israel Yaa nwu, latikanko Lewi batii baakyɛ Yerusalem alɛ bɔɔlata seleɔta manta SAATE nwu, bate lɛma Yaa nwu. 17 Baakpee Yuda sɛka kalekɔ nwu osie, baakyakaako Solomon obisuɔtɔbi Rehoboam alɛɛ atiɛ, baatɔɔbla asaa di Dawid ku Solomon sisuku kanya di obe nwu kamɛ.

18 Rehoboam layɔ Mahalat wɔ niale ni Dawid obisuɔtɔbi Yerimot obisankobi wɔ aalofo ni ku Abihail, aale ni Yese obisuɔtɔbi Eliab obisankobi. 19 Aalofo babisuɔtɔbi aatɔɔ: Mma niale Yeus, Semaria ku Saham nɛ. 20 Nni kamaa aayɔ Absalom obisankobi Maaka wɔ nialofo ni Abigya, Atai, Sisa ku Selomit aatɔɔ ni nɛ. 21 Rehoboam labɔmbɔ Absalom obisankobi Maaka aalenkee basɔfɔ ku basɔnɔ nɔɔ lele bamba. Baasiisa ni bamuu yi, aawɛ basɔfɔ lefosi-banɛ ku basɔnɔ afosi-akuɔ, babisuɔtɔbi afosi-anyɔ-banɛ ku babisankobi afosi-akuɔ.

22 Rehoboam ladiki Maaka obisuɔtɔbi Abigya alɛ ale ɔka obi nɔɔfo di babilɛma-suɔtɔbi kamɛ, diekye aamiɛ alɛ ase nwɔ sɛka. 23 Aadiki kɔkpaa di ninumbe kanya, aasɛ babisuɔtɔbi nɔɔ bawo aatɛ di Yuda ku Benyamin kale akudi nwu, ku kakpɛ sekpoo kplɛ nwu simuu aafenko. Aata ma alesaa asaa kpinwu, ni aadiki basɔfɔ kpinwu aata ma baayɔ nɛ.