2 KRONIKA 16

Ɔlaa Lawa Di Israel Batii Ku Yuda Batii Ntɛɛ

1 Di ɔka Asa sɛka olebee alɛɛ afosi-atiɛ-dikuɔnle kamɛ yi, Israel ɔka Basa lakata aakyɛ aalaadieko Yuda, aatofo oyoyiɛ aakyisa Rama, aayɔ aatĩi osuku mmle di kuonwii dilɔbafuo ni odie ee abuo ni di Yuda ɔka Asa kasɔ suoto.

2 Ninfɛ di Asa layɔ koto fututu ku koto sɛɛle di SAATE nwu atokatɛkɔ ku lɛkayo nɔɔ nimu aayɔ nya aakyesee Siria ɔka Ben-Hadad wɔ niatoole ni sɛka di Damasko nɛ. 3 Ni aabuɛ alɛ, "Ta kanya ninii kasiɛ di ami ku afɔ ntɛɛ, fɛ mmle kaate ni di teemi ku teefɔ ntɛɛ. Nyu lo, ami lekyesee fɔ koto fututu ku koto sɛɛle. Kanunua kplesa kanya ninii lɛfɔ nwu ku Israel ɔka Basa di mmle abadiɛ mi ni otikanko."

4 Ninfɛ di Ben-Hadad latunako Ɔka Asa nɛ. Ni aakpee bakpɛtɛ nɔɔ kanyabayilatɛ di Israel sekpoo nwu suoto nɛ. Baalenkee Iyon, Dan, Abel-Maim*16.4 Nnwu mankple manlɛɛ Abel Bet Maaka nɛ ku Naftali asaa ntɛkɔ sekpoo kplɛ simuu. 5 Di Basa lanu ni nnwɔ mmle yi, aadiɛ Rama oyoyiɛ nwu otofo, ni aadiɛ ɔkpɛ nɔɔ aatɛ nɛ. 6 Ninfɛ di Ɔka Asa lakpaa Yuda batii bamuu aawako, baabatuka afuɔ ku sewoso se di Basa layɔ aatɔblako ni ɔkpɛ baasifiko nɛ. Ni aayɔ nya aatofo Geba ku Mispa seyoyiɛ nɛ.

7 Di obe nwu kamɛ yi, asaanyatɛ Hanani nwu lawa ɔka Asa nfũ di Yuda ni aatɔkɔ nwɔ alɛ: "Ta faatika ni Siria ɔka disi, ni ditale ni SAATE Yaa lɛfɔ nwu oso yi, ni di Siria ɔka bakpɛtɛ latoso baadie di nnɛɛ lɛfɔ nɛ. 8 Etiopia batii ku Libia batii ditale bakpɛtɛ sientɛ ku bakeke ba di bapɔnkɔ nnanfi ni ku bapɔnkɔ basiɛtɛ ba nimpɔ ni kpinwu? Kafɔɔ di obe wɔ faatika ni SAATE nwu disi yi, aayɔ ma aakpee fɔ ninnɛɛ. 9 Diekye SAATE nwu anu kɔnya kasɔ kamuu anfenko alɛ aakpee batii ba niɛyɔ situ lɛma simuu bɛɛtɔɔ ni osie. Fatɔɔbla dibuusaa, diɛyɔ ni di nunua diesifi nii, fabatɔɔkpɛ kakpɛ."

10 Ni di Asa lanya ɔblɔ aakpeeko asaanyatɛ nwu ta nle mmle oso; ɔblɔ latɛ kuafiɛ nwɔ osie kanya alɛ aamufũ nwɔ aalaatɛ di leyo katenkɔ. Di obe nwu kamɛ Asa lanyinka batii nwu bawo amumu kanya.

Asa Sɛka Ole Kayɛntɛkɔ

11 Asa sɛka olebee sɛsaabla, diayɔ ni di kasɔ kakyekɔ dialaadu ni kayɛntɛlekɔ yi, bɛɛkpana nya beekpee di Yuda ku Israel baka kukũ kamɛ. 12 Di sɛka nɔɔ olebee alɛɛ afosi-atiɛ-lɛnaasinle kamɛ yi, ofiɛ onwii lapɛ Asa di nkpaa nɔɔ. Nu di ofiɛ nɔɔ nwu kanya lawɛ osie, bia di ofiɛ nɔɔ kamɛ yi, atakaalɛ lɛkyakaako akyeko SAATE nwu nfũ, kafɔɔ afa bablatɛ nfũ lete aakaalɛ aakyeko. 13 Ninfɛ di sɛka olebee nɔɔ alɛɛ afosi-ana lɛlɛɛ kasale kamɛ aakpi aalaatɛ ɔnyɛɛ ku bate nɔɔ nɛ. 14 Ni baakokaa nwɔ di ɔkya wɔ aakutu aatɛ aata ni suoto nɔɔ di Dawid Okpoo kplɛ nɛ. Baatensa nwɔ di atensaa ya baatitĩi ni ku afa ku akɔnɔkɔnɔsaa ateate ya baakpɔtɔɔsa nii, ni baakutaa ɔtɔ bembe, baatɔɔ dibu nɛ.