1 Yerusalem batii layɔ Ahasia wɔ niale ni Yehoram obisuɔtɔbi bisɔnle, baase sɛka di disi nɔɔ, diekye bayu ba niawa ni kasikɔ nwu lalo babisuɔtɔbi nɔɔfole bamuu. Nioso Yuda ɔka Yehoram obisuɔtɔbi Ahasia lakyekasɔ aatoole sɛka.

2 Alɛɛ afosi-anyɔ-anyɔ di Ahasia lafũ fiɛ aabale ɔka, ni aale sɛka di Yerusalem lɛlɛɛ ninwii nɛ. Ɔya leyooto niale Atalia, aale ni Omri ɔwa sankobi.

3 Nnwɔɔ kafɔɔ aakyɛ di Ahab leyo sisuku, diekye ɔya lakpee nwɔ osie di ɔtanlolaa ɔbla suoto. 4 Aabla okpile di SAATE nwu anu, fɛ mmle di Ahab leyo kamɛ batii labla nii, diekye di ote kukpi kamaa yi, baabakple nwɔ asibubatatɛ, diata kawɔɔ nɔɔ. 5 Kɔkà lɛma kafɔɔ aatikanko di obe wɔ aakyɛ ni ku Israel ɔka Yoram wɔ niale ni Ahab obisuɔtɔbi baalakpɛko ni Siria ɔka Hasael di Ramot Gilead. Ni di Siria batii latitika Yoram nkɔ nɛ. 6 Nioso Ɔka Ahasia lapɛakple aasifi Yesreel alɛ ɔɔlaabla suoto kɔfa di nkɔ be baatika nwɔ ni di suoto di Ramot, di kakpɛ nɔɔ ɔkpɛ kamɛ ku Siria ɔka Hasael.

Ninfɛ di Yuda ɔka Yehoram obisuɔtɔbi Asaria* lasoo aakyɛ Yesreel alɛ ɔɔlanyu Ahab obisuɔtɔbi Yoram ta baatika nwɔ ni nkɔ oso.

7 Diefe ni di ɔkyɛ wɔ di Ahasia lakyɛ ni Yoram nfũ oso di Yaa lata Ahasia lapɛ kaasɔ nɛ. Obe wɔ di Ahasia lalaabuo ni yi, aadie aakyɛ manko Yoram baalaakyakako Nimsi obisuɔtɔbi Yehu, nnwɔ di SAATE nwu lapɛ ni ɔfɔɔ alɛ awɔɔsa ni Ahab leyo kamɛ batii. 8 Di Yehu latɔɔkanko ni Ahab leyo kamɛ batii yi, aanya Yuda banɔɔfotii ku Ahasia babisuɔtɔbi batii, mba niatoonyu ni Ahasia, ni aalo ma nɛ. 9 Ninfɛ aakyɛ aalaawolaa Ahasia, ni di batii nɔɔ lamufũ nwɔ di obe wɔ aawofa ni di Samaria nɛ. Ni baakpaa nwɔ baawako Yehu baabalo nɛ. Baakokaa nwɔ, diekye baabuɛ alɛ, "Yehosafat obisuɔtɔbi aale, nnwɔ niawolaa ni SAATE nwu ku otu nɔɔ omuu." Nioso otii kuonwii ditasinwɛ di Ahasia leyo kamɛ aawɛ ni osie aata ni sɛka kalekɔ nwu.

10 Di Ahasia ɔya Atalia lanya alɛ obisuɔtɔbi nɔɔ ntookpi ni yi, ni aakyɛ aalaawɔɔsa Yuda leyo kamɛ sɛka baletɛ bamuu nɛ. 11 Kafɔɔ Ɔka Yehoram obisankobi Yehosabat, lakpaa Ahasia obisuɔtɔbi Yoas aatosoko di ɔka banɔɔfotii ba alɛ babalo ni kamɛ aasifiko, ni aayɔ nwɔ ku nyuntɛ nɔɔ aalaakpee di leyotenle ninwii kamɛ nɛ. Ta di Yehosabat, Ɔka Yehoram obisankobi ku oletatɛ Yehoida ɔsɔfɔ lale ni Ahasia obilema-sankobi oso yi, aayɔ obisɔ nwu aawofasa, nioso Atalia ditafuo nwɔ olo. 12 Aasiɛ di kawofakɔ nwu di Yaa olekatakɔ kamɛ alɛɛ akuɔ di obe wɔ di Atalia latoole ni sɛka di kasɔ nwu suoto.