1 Ɔka Solomon lata baabla abɔɔsaa sɛɛle oleɔta akyikye, lɛkaana labla nkpaa afosi-atiɛ, lɛblɛfɛ nkpaa afosi-atiɛ, lɛtaka kafɔɔ labla lefosi nkpaa nnɔɔ. 2 Aayɔ lɛbɔɔsaa aabla bɛɛsi fɛle lekpo, di letembi munumunu kanya, atokosi nimunumunu labla lefosi nkpaa nnɔɔ, lɛtaka kafɔɔ labla nkpaa nkuɛnsĩ-anɛɛkpa-akuɔ. Nse bɛɛklapoosa ni beekyisa kafɔɔ yi, diabla nkpaa afosi-ana-nnɔɔ. 3 Di bɛɛsi nwu atokosi kalɔ yi, baabla kukuiikuii baakyisa ni- di lefosi biala obo kɔkpaa kunwii late nii. Baabla kukuiikuii nwu di ɛkaa ɛnyɔ diakaa di bɛɛsi nwu suoto.

4 Lekpo bɛɛsi nwu latika di banankyue-suɔtɔ lefosi-banyɔ suoto, batiɛ lakyɔɔ anu katookasɔ, batiɛ lakyɔɔ anu kufĩ kamɛɛkɔ, batiɛ lakyɔɔ anu kalakasɔ, batiɛ kafɔɔ lakyɔɔ anu kufĩ katunkɔ. Lekpo bɛɛsi nwu latika ma di suoto, akyeke lɛma kafɔɔ lawɛ di kamɛ lɛkyɛ. 5 Lekpo bɛɛsi nwu opĩ lawo anɛɛkpa atiɛ, atokosi nɔɔ kafɔɔ late fɛle opũ atokosi, fɛle atoto ya niefukuti nii. Diaklee ntu bakpoko fɛle lefosi-nkpe-nnɛ.

6 Ninfɛ baabla babɛɛsi lefosi ba manfoto ni suoto, aayɔ banɔɔ aase di kalakasɔ lɛkyɛ, aayɔ kafɔɔ banɔɔ aase di katookasɔ lɛkyɛ. Nnya kamɛ mansakatɛ asaa ya babayɔ manta ni ofiɛ asaaɔta nɛ, kafɔɔ olebatatɛ nwu nin-yɔ Lekpo babɛɛsi nwu manfoto suoto.

7 Baabla koto sɛɛle kandiɛ atikasaa lefosi di mmle bɛɛtɛ bɛɛta nya ni kanya, ni aayɔ nya aase di olekatakɔ nwu kamɛ nɛ, anɔɔ di kalakasɔ lɛkyɛ anɔɔ kafɔɔ di katookasɔ lɛkyɛ.

8 Baabla sipunu lefosi, ni baayɔ sĩ baase di olekatakɔ nwu kamɛ nɛ, ɛnɔɔ di kalakasɔ lɛkyɛ, ɛnɔɔ kafɔɔ di katookasɔ lɛkyɛ. Baabla kafɔɔ koto sɛɛle babɛɛsi kɔlafa.

9 Baabla olebatatɛ kaflɔnkɔ, ku kaflɔnkɔ kplɛ ku akloo aata kaflɔnkɔ nwu, ni aatĩtĩi akloo nwu ku abɔɔsaa sɛɛle nɛ. 10 Ni baayɔ Lekpo bɛɛsi nwu baase di kalakasɔ lɛkyɛ, di olekatakɔ nwu kalakasɔ oletanɛɛkyɛ di kufĩ katunkɔ lɛkyɛ nɛ.

11 Huram labla kafɔɔ abukii ku basoofi ku babɛɛsi ba manwanwayi in asaa.

Nioso Huram laloo ɔkpɛ wɔ aaklee ni ɔbla ɔta Ɔka Solomon di Yaa olekatakɔ nwu kamɛ:

12 Aabla akpaka nwu anyɔ;

atikasaa munumunu anyɔ aatika di akpaka nwu osi;

anyɛnɛ anyɔ aasakasa di atikasaa munumunu nwu di akpaka nwu osi;

13 awosobi ya ninte ni fɛle goowa alafa-ana ya aabla aata ni anyɛnɛ nwu anyɔ (ele ɛnyɔ ɛɛta ni kɔnyɛnɛ biala, aata ni atikasaa munumunu nwu suoto di akpaka nwu osi ololaa);

14 atikasaa ku babɛɛsi ninya;

15 Lekpo bɛɛsi nwu ku banankyue-suɔtɔ lefosi-banyɔ nwu di kalɔ nini;

16 abukii, basoofi, sina amunikĩisasaa ku akpɛmblasaa amuu ɛɛta ni ɔkpɛ nwu.

Abɔɔsaa sɛɛle biene di Huram-Abi layɔ aabla asaa ya amuu aabla aata ni Ɔka Solomon aata ni SAATE nwu olekatakɔ. 17 Ɔka nwu lata baabla nya baakyeko kasɔ kɔtɛ ko di Yordan ɔtaata di Sukot ku Saretan obo. 18 Asaa ya mmle amuu di Solomon labla ni latɛ aapɔ, nioso batafuo abɔɔsaa sɛɛle nwu onutũ ɔklapoosa.

19 Solomon kafɔɔ labla asaa ya amuu niayila ni di SAATE nwu olekatakɔ kamɛ:

koto sɛɛle oleɔta akyikye;

koto sɛɛle sipunu se suoto di bloblo wɔ di SAATE nwu Anu ntika nii;

20 Koto sɛɛle nwaa kandiɛ atikasaa ku bakandiɛ ninya, alɛ diakpa ni di kamɛ, kaamɛ kakleklekɔ nwu sitũ fɛ mmle bɛɛkpana bɛɛtɛ ni kanya;

21 koto sɛɛle atoto ɔkpɛ nwu ku bakandiɛ ku kɔmaasa; (koto sɛɛle nwaa kuale);

22 koto sɛɛle nwaa kandiɛ sikũ, babɛɛsi ba manwanwanyi ni asaa, nsɛfɛ ku olufui afiɛsaa; ku olekatakɔ koto sɛɛle akloo: kamɛ, kaamɛ akloo ɛɛta ni Kakleklekɔ kaamɛ Kakleklekɔ ku olekatakɔ lɛkpata nwu nimu akloo.