1 Baaloo ni asaa ya mmle ɔbla sɛmaa yi, ni di batunletɛ nwu lawa ɔkyɛ nii baabatɔkɔ mi alɛ, "Israel batii, di olebatatɛ ku Lewi batii nkyakaa ni, diɛɛblasa suoto lɛma di batii ba ninsi bakaako ma ni ku ayududusaa lɛma ɔbla suoto, batii fɛle Kanaan batii, Heti batii, Perisi batii, Yebusi batii, Amon batii, Moab batii, Egipte batii ku Amori batii. 2 Batɔyɔ babisankobi lɛma bawo fɛ basɔfɔ bɛɛta suoto lɛma ku babisuɔtɔbi lɛma, bɛɛkpɔtɔɔsa kɔna klekle nwu ku batii nwu niɛmana ma beekyi nii. Batunletɛ nwu ku banɔɔfotii nwu kafɔɔ niele katũ di onukwale ɔtanle wɔ mmle kamɛ nɛ."

3 Obe wɔ lanu ni nle mmle yi, labɛbɛɛ osi akpeele ku akpeele wua nii, lanananfi disi sinwini ku okusu nii, ni lataba kaasɔ di nnɛɛ lefee ku sɛnyaami owi kamɛ nɛ. 4 Ninfɛ di otii biala wɔ nin-yɛkɛ ni Israel Yaa ɔlaa nwu labamana mi baakyi, ta balanle nwu onukwale ɔtanle wɔ mmle oso. Ni lasiɛ ninfa sɛnyaami kanya dialaaase di kɔtɔɔfɔ oleɔta bee nɛ.

5 Ninfɛ di kɔtɔɔfɔ oleɔta bee yi, lataka di sikududu nii owi kamɛ, ku osi akpeele ku akpeele wua nii nwu bɛbɛɛle, ni lapɛ akunkyi lawii nnɛɛ nii lakyɔɔ SAATE Yaa nii 6 lapɛ ɔlaa nlɛ:

"Oo Yaa nii, sinunsɔ kɔkpɛ mi osie kanya, konunsɔ kafɔɔ katakatɛsa anu nii nkyɔɔ fɔ nii, Yaa nii, diekye sikpile loo lɛtaka katoo silenke asi loo, lɛpɔɔ loo okpi kafɔɔ ntoodu osi. 7 Diayɔ ni di bawa loo obe diɛbase ni di miɛ, lɛpɔɔ loo okpi ntɔɔtɛ diɛpɔ̀. Ta sikpile loo oso yi, baayɔ awo ku baka loo ku olebatatɛ loo baata kapamii ku sɛlanle, kayu ku sinunsɔ okpee di bafɔɔ baka nnɛɛ, fɛ mmle dite ni miɛ dii le mmle.

8 "Kafɔɔ nunua, di obe kakui kamɛ yi, SAATE Yaa loo nwu ntoole wo sibualɛ eediɛ batii bawo ɛɛtɛ wo, ni ɛɛta wo lɛba biene di kakleklekɔ nɔɔ nɛ, nioso Yaa loo nta anu loo lɛkpa ku ɔnyɛɛ ɔtɛ kɛɛkɛɛ di sɛlanle loo osiɛ kamɛ. 9 Kuntɛ bule balanle yi, Yaa loo diediɛ wo di sɛlanle loo osiɛ kamɛ. Atootuo wo sifutulɛ nɔɔ di Persia baka anu: Atɔɔta wo nkpa fɔle alɛ buase Yaa loo leyo nwu letofo, munlolaa nlalaakɔ nini kafɔɔ, ni aanyu wo di Yuda ku Yerusalem nɛ.

10 "Oo Yaa loo, kafɔɔ kanunua, obe bubafuo obuɛ di nle mmle sɛmaa? Diekye butoosĩ kufiofa nwu 11 faata faafenko ni di bakpɛmblatɛ lɛfɔ Yaa ɔlaa babuɛtɛtɛ nwu suoto di obe wɔ faabuɛ ni falɛ: Kasɔ ka biobuo minaayɔ ni nle kasɔ ka niɛlalaa ni di batii nwu kalalaa sɛsaabla kamɛ. Di ayududusaa sɛsaabla lɛma kamɛ beyiisa kasɔ nwu ku asaa lɛma nwu ninanklekle ni diɛyɔ ni di kayɛntɛkɔ kanwii diɛlaase ni di kayɛntɛkɔ bamba. 12 Nninkpo oso, bitan-yɔ babisankobi lee biata babisuɔtɔbi lɛma layɔ ee bifũ babisankobi lɛma biata babisuɔtɔbi lee baayɔ. Bitankaalɛ basiɛwo onwii ɔbla kanya ninii ku mma di obe kuonwii kamɛ, di mmle biawɛ osie minle ni kasɔ nwu asaa biene, mimbu nya mintɛ ni babi lee kafɔɔ fɛ atesaa ya ninaa ni kaloo.

13 "Lɛsaa le niɛta diɛwa wo ni di suoto nkpo ninle sɛsaabla kpile loo ku lɛpɔɔ kplɛ loo okpi oso, kafɔɔ yi, Yaa loo, fatɔɔnaanfi wo kootoko diɛwakasɔ dilenke mmle diesiɛko ni sikpile loo, ni fɛɛta otii owo lebu asi nkpa fɛle mmle nɛ. 14 Buakple munwaalɛ afiofa lɛfɔ nwu muntoodiki bawo muntɔɔyɔ ku batii nwu nimbla ni ayududusaa nwu okle? Ɔblɔ dilɔbasii fɔ ofiɛ di suoto loo fawɔɔsa wo, alɛ flɔbabu otii kuonwii ninkpe ni nkpa ee nnwɔ ninkasiɛ ni nkpa fatɛ wo? 15 Oo SAATE, Israel Yaa, fate tinini! Beediɛ wo miɛ dii le mmle fɛ batii ba niebu basi ni nkpa. Buyɛ di anu lɛfɔ di lɛpɔɔ okpi loo kamɛ, kuntɛ nninkpo oso, kuonwii loo dilɔbafuo oyila di anu lɛfɔ."