1 Di kɔwɛntɛ kuɛnsinle layie ni di Israel batii lasiɛ ni di sekpoo lɛma kamɛ yi, batii nwu lasi fɛ otii onwii di Yerusalem. 2 Ninfɛ di Yosadak obisuɔtɔbi Yesua ku olebatatɛ wo nɔɔ ku Seatiel obisuɔtɔbi Serubabel ku bawo nɔɔ lakyekasɔ baatootofo Israel Yaa nwu oleɔta akyikye alɛ baata ofiɛ asaaɔta ninnya suoto nɛ, di mmle kanya bɛɛkpana beekpee ni di Yaa otii nwu, Mose Afiofa kamɛ. 3 Nu baatɔɔyɛkɛ batii ba niasiɛ baamana ma baakyi ni yi, baatofo oleɔta akyikye nwu di lɛsɔse nini, ni baata ofiɛ asaaɔta ninnya suoto baata SAATE nwu, olesɛ ku kɔtɔɔfɔ oleɔta nɛ. 4 Ninfɛ baale Akpanta Dii nwu ku ofiɛ asaaɔta di lɛpɔ le diakaatɛɛ diɛta ni dii biala fɛ mmle bɛɛkpana bɛɛtɛ ni kanya nɛ. 5 Nninkpo sɛmaa, baata obe lele ofiɛ asaaɔta, Kɔwɛntɛ Fɔle oleɔta ku SAATE nwu ayi klekle ole nwu omuu wɔ baatɛ ni ku n-ya baawako ni fɛ otu-fãa asaaɔta baata ni SAATE nwu. 6 Di kɔwɛntɛ kuɛnsinle dii kasale suoto yi, baakyekasɔ batɔɔta ofiɛ asaaɔta baatɔɔta SAATE nwu, nu manadise SAATE nwu olekatakɔ lɛsɔse.

7 Ninfɛ baata ayo batofotɛ ku asaa bawolatɛ koto, baata kafɔɔ Sidon batii ku Tiro batii alesaa, anyinsaa ku nnɔnyi, di mmle baakyeko ni sedar awosokuu di Lebanon di lekpo osi manwako ni Yopa, fɛ mmle di Persia ɔka Kores lata ni osuku nɛ. 8 Di kɔwɛntɛ nyɔɔfa di lɛlɛɛ nyɔɔfa kamɛ di Yaa leyo obuo lɛma sɛmaa di Yerusalem yi, Seatiel obisuɔtɔbi Serubabel, Yosadak obisuɔtɔbi Yesua ku babilɛma-suɔtɔbi bule (olebatatɛ ku Lewi batii ku mba bamuu niakye ni sɛlanle kamɛ baawa ni Yerusalem) lakye ɔkpɛ nwu kasɔ. Baadiki Lewi batii ba nintofũ ni alɛɛ afosi-anyɔ ku mba nintoobe balenke ni baase kaanya alɛ batoonyu SAATE nwu leyo otofo. 9 Ni di Yesua ku babisuɔtɔbi nɔɔ ku babilɛma-suɔtɔbi ku Kadmiel ku babisuɔtɔbi nɔɔ (Hodawia banantii) ku Henadad babisuɔtɔbi ku basuɔtɔbi lɛma- di bamuu lɛma bale ni Lewi batii- labla onwii batoonyu batii ba niatɔɔbla ni ɔkpɛ di Yaa leyo nwu suoto nɛ.

10 Obe wɔ di ayo batofotɛ nwu lase ni SAATE nwu olekatakɔ lɛsɔse yi, olebatatɛ nwu lakpee akpeele lɛma baaklee akyikyoo, Lewi batii nwu kafɔɔ (Asaf babisuɔtɔbi) laklee abɔɔsaa anɛɛkya, baabayila ninfa baatɔɔtansa SAATE nwu, fɛ mmle di Israel ɔka Dawid latuo nii. 11 Baasa katansa ku sɛfa ɔpɛ sinu baata SAATE nwu alɛ:

SAATE nwu nlɛ;

lɛbɔmbɔ nɔɔ le akpe ata ni Israel nnaa kaloo.

Ni di batii nwu bamuu layiisa katansa kudú kplɛ baata SAATE nwu nɛ, diekye batoose SAATE nwu leyo lɛsɔse. 12 Kafɔɔ olebatatɛ nɔɔfole ku Lewi batii ku ayo kamɛ banɔɔfo ba nianya ni olekatakɔ kofole nwu lawi kaku osie kanya, di obe wɔ baanya ni mmle boose ni olekatakɔ nwu lɛsɔse, di batii kpinwu bawo layiisa ni suoto lɛyɔɔ kudú. 13 Kuonwii ditafuo suoto lɛyɔɔ kudú sɛlɔ ku kaku owi kudú sɛlɔ otofo, diekye batii nwu latooyiisa kudú osie kanya. Ni baanu kudú sɛlɔ nwu di kakyonkɔ nɛ.