1 Ninfɛ di ɔlaabuɛtɛtɛ Hagai ku ɔlaabuɛtɛtɛ Sakaria, Ido ɔnantii onwii labuɛ ɔlaa baatɛ baata Yuda batii nwu di Yuda ku Yerusalem di Israel Yaa, nnwɔ nikonyu ma ni leyooto kamɛ nɛ. 2 Ninfɛ di Sealtiel obisuɔtɔbi Serubabel ku Yosadak obisuɔtɔbi Yesua lataka alɛ bɔɔbla ɔkpɛ manse Yaa leyo nwu letofo di Yerusalem nɛ. Ni di Yaa ɔlaababuɛtɛtɛ nwu lawɛ ku mma, baatɔɔkyakaako ma nɛ.

3 Di obe nwu kamɛ, Okle-Kamaa kanyayilatɛ Tatenai ku Setar-Bosnai ku bakpɛmblatɛwo lɛma lakyɛ ɔkyɛ lɛma baalaakaalɛ ma alɛ, "Owe niɛta ye osuku alɛ biase olekatakɔ ka mmle ose letofo ku seyoyiɛ se mmle ose lelolaa?" 4 Baakaalɛ kafɔɔ alɛ, "Lɛ manlɛɛ basuɔtɔ ba nikotofo ni leyo le mmle?" 5 Kafɔɔ Yaa lɛma ninu latoonyu Yuda batii banɔɔfo nwu, nioso batayilasa ma dialaase di obe wɔ di kanya lafuo ni Dario odu ku kanya didiki ofũ di kukũ nɔɔ ɔkpana kamɛ.

6 Nnya kukũ ko di Okle-Kamaa batii abaa kanyayilatɛ Tatenai ku Setar-Bosnai ku bakpɛmblatɛwo lɛma, Okle-Kamaa banɔɔfotii lakyesee ni ɔka Dario. 7 Kanya ka baakyesee nwɔ ni ninle alɛ:

"Ɔka Dario:

"Atoko ɔkyɛ ole asiɛko fɔ.

8 "Ɔka atofo alɛ buakyɛ Yuda kale dikudi nwu Yaa kplɛ olekatakɔ nwu. Batii nwu kotofo olekatakɔ nwu ku afuɔ kplɛ, bootika sewoso di seyoyiɛ nwu suoto. Boonwini mambla ɔkpɛ nwu ku nnɛɛ lɛma mankyɛnko sitũ osie kanya.

9 "Buakaalɛ banɔɔfo nwu sɛlaa, ni buakaalɛ ma bulɛ, ‘Owe niediki ye osuku alɛ biase olekatakɔ ka mmle letofo, biekple biese seyoyiɛ se mmle leloaa?’ 10 Buakaalɛ ayooto lɛma, di mmle buakpana ni batunletɛ lɛma ayooto muntɛ munta fɔ ni letofo.

11 "Kanya didiki le baata wo ni ninle alɛ:

‘Osi ku kasɔ Yaa bakpɛmblatɛ bule, ni buose olekatakɔ ka baatofo ni di alɛɛ kpinwu ya nintɔbafe ni letofo nɛ, nle di Israel ɔka kplɛ onwii latofo aaloo nii. 12 Kafɔɔ ta bawa loo lakpee ni Yaa wɔ di osi ɔblɔ oso yi, ni aayɔ ma akpee di Babel ɔka Nebukadnasar, Kaldea otii nwu nnɛɛ nɛ, nnwɔ niabiɛ ni olekatakɔ ka mmle, aamufũ ma aasifiko ni Babel.

13 ‘Kafɔɔ, di Babel ɔka Kores lɛlɛɛ kasale kamɛ yi, Ɔka Kores lakpee kufiofa alɛ base Yaa leyo nwu letofo. 14 Aadiki bia koto sɛɛle ku koto fututu awansaa nwu niale ni Yaa leyo ale di Babel olekatakɔ, n-ya di Nebukadnesar layɔ ni di Yerusalem olekatakɔ aawako ni olekatakɔ di Babel.

‘Ninfɛ di Ɔka Kores layɔ nya aata osuɔtɔ onwii baatɔɔlɛɛ ni Sesbasar nɛ, nnwɔ aase ni abaa kanyayilatɛ. 15 Ni aatɔkɔ nwɔ alɛ, ‘Yɔ awansaa ya mmle falaase di olekatakɔ di Yerusalem. Faase Yaa leyo nwu kafɔɔ letofo di kasɔ nini suoto. 16 Nioso Sesbasar wɔ mmle lawa aabase Yaa leyo nwu asɔse di Yerusalem. Diayɔ ni di dii nwu diɛbase ni di nua bootofo ni, kafɔɔ badiloo.’

17 "Nioso nunua nse dilɛ diɛta afɔ ɔka yi, ni faata bawolaa di Babel baka akũ kamɛ baanyu nse nwaako Ɔka Kores lakpee kufiofa alɛ base Yaa leyo le mmle letofo di Yerusalem. Ni biɛta ɔka nwu akyesee wo disibu nɔɔ di ɔlaa wɔ mmle suoto."