1 Di asaa ya mmle sɛmaa, di Persia ɔka Artasasta sɛka ole kamɛ yi, Esra ote niale Seraia, di ote niale ni Asaria, aale ni Hilkia obisuɔtɔbi, 2 aale ni Salum obisuɔtɔbi, aale ni Sadok obisuɔtɔbi, aale ni Ahitub obisuɔtɔbi, 3 aale ni Amaria obisuɔtɔbi, aale ni Asaria obisuɔtɔbi, aale ni Meraiot obisuɔtɔbi, 4 aale ni Serahia obisuɔtɔbi, aale ni Usi obisuɔtɔbi, aale ni Buki obisuɔtɔbi, 5 aale ni Abisua obisuɔtɔbi, aale ni Pinehas obisuɔtɔbi, aale ni Eleasar obisuɔtɔbi, Eleasar nwu niale oletatɛ nɔɔfo Aaron obisuɔtɔbi nɛ. 6 Esra wɔ mmle lakata aakye Babel aawa Yerusalem. Asaatuotɛ wɔ niatofo ni Mose kufiofa nwu nwaa aale, n-ya di SAATE, Israel Yaa nwu, lata nii. Ɔka nwu latɔɔ lɛsaa biala aakaalɛ nwɔ nii, diekye SAATE Yaa nɔɔ kɔnɛɛ latika nwɔ di suoto. 7 Israel batii nwu bawo, diakyakaa ni di olebatatɛ, Lewi batii, sinu basantɛ, n-yoko banyuntɛ ku olekatakɔ bakpɛmblatɛ, kafɔɔ lakata baawa Yerusalem di Ɔka Artasasta lɛlɛɛ kuɛnsinle kamɛ.

8 Esra lalaabuo Yerusalem di Yuda batii kɔwɛntɛ nɔnle kamɛ di ɔka nwu sɛka ole lɛlɛɛ kuɛnsinle kamɛ. 9 Aakye osuku nɔɔ ɔkyɛ kasɔ di Babel di Yuda batii kɔwɛntɛ kasale dii kasale suoto, ni aalaabuo Yerusalem di kɔwɛntɛ nɔnle dii kasale suoto nɛ. Diekye Yaa nɔɔ sibualɛ kɔnɛɛ latika nwɔ di suoto. 10 Diekye Esra layɔ suoto nɔɔ aata SAATE nwu Kufiofa kamɛ obuo ku ololaa ole suoto, aatootuo kafɔɔ sɛsaabla ku afiofa nikũ di Israel.

11 Nnya kukũ ko di Ɔka Artasasta lata ni oletatɛ Esra ku asaatuotɛ nwu, otii wɔ niatofo ni asaa di sɛlaa se niale ni SAATE nwu afiofa ku sɛsaabla nɔɔ siata ni Israel:

12 "Artasasta, baka ɔka,

"Kuɔta ni Esra, Yaa wɔ di osi oletatɛ ku Kufiofa nwu asaatuotɛ:

"Kɔsɛɛsa fɔ.

13 "Nunua kokpee kufiofa nlɛ Israel batii lele di sɛka kalekɔ nii, di olebatatɛ ku Lewi batii nkyakaa ni, boomiɛ alɛ bakyɛ ni Yerusalem ku afɔ, kafuo ɔkyɛ. 14 Ɔka ku disibubatatɛ nɔɔ bakuɛnsĩ niekpee fɔ alɛ laawolaa asaa fakyeko Yuda ku Yerusalem suoto, di Yaa lɛfɔ Kufiofa ko ninsi fɔ ni ninnɛɛ kanya. 15 Diɛkyakaa ni yi, yɔ koto fututu ku koto sɛɛle ko di ɔka ku disibubatatɛ nɔɔ lata ni Israel Yaa ku otu fãa, nnwɔ kasiɛkɔ ninkpe ni di Yerusalem faklee, 16 diɛkyakaa ni di koto fututu ku koto sɛɛle ko kumuu fabawɛ fankyeko ni Babel kasɔ, ku batii nwu ku olebatatɛ otu-fãa asaaɔta diɛta ni Yaa lɛma olekatakɔ nwu di Yerusalem. 17 Ku koto ko mmle yi, nyu falɛ fɛɛya banankyue-suɔtɔ, akunumuu ku afosobi-suɔtɔ, diɛkyakaa ni di alesaa asaaɔta ku nta asaaɔta lɛma, faayɔ nya fata ole di Yaa lɛfɔ olekatakɔ oleɔta akyikye suoto di Yerusalem.

18 "Ni nfɛ biafuo lɛsaa lele di afɔ ku babilee Yuda batii bienyu bilɛ dilɛ nwaa dita ye ni ɔbla ku koto fututu ku koto sɛɛle bule nwu, di Yaa lee dibiesaa kanya. 19 Yɔ awansaa ya amuu beekpee fɔ ni ninnɛɛ fablako ɔkpɛ fata Yerusalem Yaa nwu diɛta ni kasumu di Yaa lɛfɔ olekatakɔ kamɛ. 20 Nse lɛsaa lewo lefĩ diɛta Yaa lɛfɔ olekatakɔ nwu di obe owo kamɛ alɛ faata ni yi, ni faafuo ni ɔta okyeko ɔka leyo koto lɛlakaa kamɛ.

21 "Nunua ami, Ɔka Artasasta lediki kanya nlɛ atobatɛtɛ ba bamuu ninkpe ni di Okle-Kamaa bata oletatɛ Esra, Yaa wɔ ninkpe ni di osi afiofa asaatuotɛ lɛsaa lele abakaalɛ ni di nimu kamɛ- 22 diɛlaadu koto fututu bakilo nkpe ntiɛ-alafa-ana, kamɔɔ bakilo nkpe lefosi, nta akuuku alafa akuɔ, nnɔnyi ataase alafa akuɔ, ku mmba kpinwu. 23 Lɛsaa lele di Yaa wɔ di osi letuo alɛ babla yi, ta babla ni di nimu kamɛ bata Yaa wɔ di osi olekatakɔ nwu. Obe oso di ɔblɔ nɔɔ yakayaka kawa di ɔka sɛka kalekɔ ku babi nɔɔ suoto? 24 Faatofo kafɔɔ falɛ fanaa osuku fantika akpooto, kɔsɔsĩ ee asaa basunsũtɛ koto ko manta ni abaa di olebatatɛ, Lewi batii, sinubasantɛ, n-yoko banyuntɛ, olekatakɔ bakpɛmblatɛ ee bakpɛmblatɛ bamba ba ninkpe ni di Yaa leyo le mmle kuonwii lɛma suoto.

25 "Ni afɔ, Esra, di Yaa lɛfɔ ninumbe le ninkpe fɔ ni kanya yi, diki bakantɛ-bisɔ ku bakantɛ-nɔɔfo baatoobuɛ sɛlaa batɔɔta Okle-Kamaa batii nwu bamuu- mba bamuu nin-ye ni Yaa lɛfɔ afiofa nwu. Faatuo kafɔɔ olele ninan-ye nya. 26 Otii lele ninanle Yaa lɛfɔ kufiofa nwu ku ɔka kufiofa nwu yi, nwaako dikpenii bɛɛnanfi nwɔ kootoko ku kukpi, otososa odiki di okpoo, lɛsaawɛ nɔɔ ofũ ninnɛɛ, ee baatɛ nwɔ di leyo katenkɔ."

27 Baatansa SAATE nwu, bate loo Yaa wɔ niɛyɔ eekpee ni di ɔka otu kamɛ alɛ aata dibu nwa ni di SAATE nwu leyo di Yerusalem di osuku wɔ mmle suoto, 28 ku nnwɔ niele mi ni sibualɛ nɔɔ biene di ɔka ku disibubatatɛ nɔɔ ku ɔka banɔɔfotii finle nɔɔ bamuu anu. Ta SAATE Yaa nii kɔnɛɛ latika mi ni di suoto oso, lakpee okyiini lasiisa basuɔtɔ batunletɛ di Israel baakata baakyɛ ku ami.