1 Di obe wɔ di Esra latɔɔpɛ ni ɔlaa aatoodiki sikpile aatoobuɛ, aatoowi, aatɔɔpɛpɛɛ ni suoto nɔɔ kaasɔ di Yaa leyo nwu anu yi, Israel batii dikudi kplɛ ninwii- basuɔtɔ, basanko ku babisɔ- lamana nwɔ baakyi. Mma kafɔɔ baawi osie kanya. 2 Ninfɛ di Yehiel obisuɔtɔbi Sekania, Elam banantii onwii lɛma, latɔkɔ Esra alɛ, "Butale onukwale buata Yaa loo ku bafɔɔ basanko ba buayɔ buakyeko ni batii ba niɛmana wo beekyi ni nfũ. Kafɔɔ di nle mmle sɛmaa yi, osuku onyu lekple kukpe kuɔta Israel. 3 Nunua yi, bita bubla kanya ninii di Yaa loo anu alɛ buatososa basanko ba mmle ku babi lɛma bamuu mansifi, di saate nii kɔkà ku mba nin-yɛkɛ ni Yaa loo afiofa kanya. Bita babla ni di Kufiofa nwu kanya. 4 Taka; diekye ɔlaa wɔ mmle nsi fɔ ninnɛɛ. Bubayila fɔ kamaa, nioso wɛ osie, faabla nkpo."

5 Nioso Esra lataka ni aayɔ olebatatɛ-nɔɔfo ku Lewi batunletɛ ku Israel batii bamuu aakpee di ntam kalɔ alɛ babla di ɔlaa wɔ bɛɛtɔkɔ nwɔ ni suoto nɛ. Ni baaka ntam nwu nɛ. 6 Ninfɛ di Esra ladie di Yaa leyo nwu aasifi Eliasib obisuɔtɔbi Yehohanan leyo nɛ. Di obe wɔ aawɛ ni ninfa, atale alesaa kuanwii, anyi ntu kunwii, diekye aakple aatoowi di balanle nwu onukwale ɔtanle suoto.

7 Ni baayie lɛkya di Yuda ku Yerusalem omuu alɛ balanle nwu bamuu babasi di Yerusalem nɛ. 8 Otii lele niesĩ ɔwa di ayi atiɛ kamɛ kamayu lɛsaawɛ nɔɔ nimuu, di banɔɔfotii ku okpoo banɔɔfo nwu kɔkpaa didikibi kanya, mandiki otii nwu omu kafɔɔ di balanle nwu dikudi kamɛ.

9 Di ayi atiɛ nwu kamɛ yi, Yuda ku Benyamin basuɔtɔ bamuu labasi di Yerusalem. Di Yuda batii kɔwɛntɛ naasinle di dii afosi-anyɔ suoto, batii nwu bamuu lasisiɛ di Yaa leyo kaflɔnkɔ nwu anu, di lɛyɛkɛ kplɛ ku dii nwu kanto oso. 10 Ninfɛ di oletatɛ Esra lataka aayila aabuɛ aatɔkɔ ma alɛ, "Bieele onukwale; biɛyɔ bafɔɔ basanko biɛkyakaa di Israel lɛpɔɔ okpi suoto. 11 Nunua bidiki sikpile bibuɛ bitɔkɔ SAATE nwu, bate lee Yaa nwu, biɛbla dibiesaa nɔɔ. Biblasa suoto lee di batii ba niɛmana ye beekyi ni ku bafɔɔ-sɔfɔ lee nwu suoto."

12 Ni di dikudi nwu nimuu latuna ku sɛlɔ siene alɛ: "Ole-fɔ nkpe! Dikpe ni buɔbla fɛ mmle feebuɛ nii. 13 Kafɔɔ batii kpinwu nkpe ninfũ, kanto ɔnɔɔ-bee kafɔɔ dile; nioso bulɔbafuo oyila kaayi. Diɛkyakaa ni yi, ɔlaa wɔ mmle dilɔbafuo ose di dii ninwii ee ayi anyɔ kamɛ, diekye butɔɔbla okpile kplɛ di nle mmle kamɛ. 14 Nioso bita banɔɔfotii loo badiki kɔkpaa bata kasikɔ nwu kamuu. Ni biɛta otii biala di sekpoo loo kamɛ ɛɛyɔ ni ɔfɔɔ-sanko awa di obe wɔ bɛɛtɛ ni kamɛ, diɛkyakaa ni di okpoo biala banɔɔfo ku bakantɛ, dilaase di obe wɔ di Yaa loo ɔblɔ yakayaka nwu di ɔlaa wɔ mmle suoto kamataka wo ni di suoto." 15 Asahel obisuɔtɔbi Yonatan ku Tikwa obisuɔtɔbi Yaseia, di Mesulam ku Sabetai, Lewi otii nwu layila ma ni kamaa lete niale batii ba niataka baayila ni di ɔlaa wɔ mmle suoto nɛ.

16 Nioso balanle nwu labla fɛ mmle baabuɛ nii. Ni di oletatɛ Esra ladiki basuɔtɔ ba niale ni ayo kamɛ banɔɔfo, di leyo kamɛ biala otii onwii, bamuu lɛma di ayooto lɛma kanya. Baasiɛ baabuo di sɛlaa nwu kamɛ di Yuda batii kɔwɛntɛ fosile dii kasale suoto, 17 ni baaloo bamuu ɔkpɛ ɔblako di Yuda batii kɔwɛntɛ kasale dii kasale suoto di basuɔtɔ ba niayɔ ni bafɔɔ-sanko suoto nɛ.

18 Di olebatatɛ banantii nwu kamɛ yi, batii ba mmle niayɔ bafɔɔ-sanko nɛ:

Di Yosadak obisuɔtɔbi Yesua banantii kamɛ, ku babilɛma-suɔtɔbi kamɛ yi: Maaseia, Eliesa, Yarib ku Gedalia. 19 (Bamuu lɛma laka ntam alɛ babadiɛ basɔfɔ lɛma nwu, ni di lɛpɔɔ okpi lɛma kafɔɔ yi, obiala lata dikunumuu ninwii, ninwii baakyeko bafoso kamɛ fɛ lɛpɔɔ okpi asaaɔta.)

20 Di Imer banantii kamɛ yi:

Hanani ku Sebadia.

21 Di Harim banantii kamɛ yi:

Maaseia, Elia, Semaia, Yehiel ku Usia.

22 Di Pashur banantii kamɛ yi:

Eliehoenai, Maaseia, Ismael, Netanel, Yosabad ku Elasa.

23 Di Lewi batii kamɛ yi:

Yosabad, Simei, Kelaia (ninle ni, Kelita), Petahia, Yuda ku Elieser.

24 Di sinu basantɛ kamɛ yi:

Eliasib.

Di n-yoko banyuntɛ kamɛ yi:

Salum, Telem ku Uri.

25 Di Israel batii bamba kamɛ kafɔɔ:

Di Paros banantii kamɛ yi:

Ramia, Yisia, Malkiya, Miyamin, Eleasar, Malkiya ku Benaia.

26 Di Elam banantii kamɛ yi:

Matania, Sakaria, Yehiel, Abdi Yeremot ku Elia.

27 Di Satu banantii kamɛ yi:

Eliehoenai, Eliasib, Matania, Yeremot, Sabad ku Asisa.

28 Di Bebai banantii kamɛ yi:

Yehohanan, Hanania, Sabai ku Atlai.

29 Di Bani banantii kamɛ yi:

Mesulam, Maluk, Adaia, Yasub, Seal ku Yeremot.

30 Di Pahat-Moab banantii kamɛ yi:

Adna, Kelal, Benaia, Maaseia, Matania, Besalel, Binui ku Manase.

31 Di Harim banantii kamɛ yi:

Eliesa, Yissia, Malkiya, Semaia, Simeon, 32 Benyamin, Maluk, ku Semaria.

33 Di Hasum banantii kamɛ yi:

Matenai, Matata, Sabad, Elifelet, Yeremai, Manase ku Simei.

34 Di Bani banantii kamɛ yi:

Maadai, Amram, Uel, 35 Benaia, Bedeia, Keluhi, 36 Wania, Meremot, Eliasib, 37 Matania, Matenai ku Yaasau.

38 Di Binui banantii kamɛ yi:

Simei, 39 Selemia, Natan, Adaia, 40 Maknadebai, Sasai, Sarai, 41 Asarel, Selemia, Semaria, 42 Salum, Amaria ku Yosef.

43 Di Nebo banantii kamɛ yi:

Yeiel, Matitia, Sabad, Sebina, Yadai, Yoel ku Benaia.

44 Mba mmle bamuu niayɔ bafɔɔ-sanko, di bawo lalofo ni babi ku basɔfɔ lɛma nwu nɛ.