1 Obe wɔ di Yuda ku Benyamin balo lanu alɛ balanle nwu nfɛ kotofo ni olekatakɔ manta ni SAATE, Israel Yaa nwu yi, 2 baawa Serubabel ku ayo kamɛ banɔɔfo nfũ baatɔkɔ ma alɛ, "Bita bukyakaako ye bietofo, diekye, fɛle aye okle yi, munsumu Yaa lee nwu, muntɔɔta oleɔta kafɔɔ muntɔtɔɔ, diayɔ ni di Asiria ɔka Esarhadon obe kamɛ, nnwɔ niakpaa wo aawako ni nfũ."

3 Kafɔɔ Serubabel, Yesua ku Israel ayo kamɛ banɔɔfo nwu bule ladiki kanya alɛ, "Binaa kablakɔ kukanwii ku awo di olekatakɔ nwu otofo ɔta Yaa loo. Leteloo bubatofo ni munta SAATE, Israel Yaa nwu, fɛ mmle di Persia ɔka, Ɔka Kores latɔkɔ wo nii."

4 Ni di batii ba niamana ma baakyi ni ladie baakyɛ baalafefeesa Yuda batii nnɛɛ, baakpee ma lɛyɛkɛ ku olekatakɔ nwu otofo nɛ. 5 Baata asibubatatɛ koto alɛ bayila ma di suoto baakpɔkpɔtɔsa asibu lɛma ɔkpɛ di Persia ɔka Kores sɛka ole simuu kamɛ dialaase ni di Persia ɔka Dario sɛka ole kamɛ.

6 Di Akasweros sɛka ole kasɔ kakyekɔ yi, baabudi ɔlaa baatika di Yuda ku Yerusalem batii suoto.

7 Ninfɛ di Persia ɔka Artasasta obe kamɛ yi, Bislam, Mitredat, Tabeel ku bakyakaakotɛ lɛma lakpana kukũ baata Artasasta nɛ. Baakpana kukũ nwu di Siria kɔkpana kamɛ di Siria sele kamɛ.

8 Kakpɛ kanyayilatɛ Rehum ku kukũ kpanatɛ Simsai lakpana kukũ kuayila di Yerusalem suoto aata ɔka Artasasta fɛ mmle diɔwa nii:

9 Kakpɛ kanyayilatɛ Rehum ku kukũ kpanatɛ Simsai, diɛkyakaa ni di bakyakaakotɛ lɛma bule- bakantɛ ku kasɔ nwu banɔɔfotii ba niakye ni, Tripoli, Persia, Erek, Babel, Susa, Elam batii nwu, 10 ku batii bamba ba di ɔnɔɔfotii kplɛ ku dibu otii nwu Asnapar latososa aadiki ni baalasiɛ ni di Samaria okpoo kplɛ nwu ku aba bamba di Okle-Kamaa sekpoo.

11 (Nnya kukũ nwu kamɛ sɛlaa se baakyesee nwɔ ni.)

Kuokye ni bakpɛmblatɛ lɛfɔ, Okle-Kamaa sekpoo batii nfũ,

Kuɔta ni ɔka Artasasta:

12 Ɔka atofo alɛ Yuda batii ba niakata baawa ni ɔkyɛ loo, baakye ni ɔkyɛ lɛfɔ ntoosifi Yerusalem bɛɛkyɛ boose ɔtaka oyila ku amumu okpoo kplɛ nwu letofo. Bookple manse seyoyiɛ nwu lese, manlolaa asɔse nwu kafɔɔ.

13 Diɛkyakaa nii, ɔka atofo alɛ nse beetofo okpoo kplɛ nwu beese seyoyiɛ nini kafɔɔ lese yi, akpooto, kɔsɔsĩ ee asaa osunsũ ato ɔta dilɔbasinwɛ nɛ, ni ɔka leyo ato ɔwɛ kafɔɔ kamawakasɔ. 14 Nunua bule ni bakpɛmblatɛ buɔta ni lɛkayo, ninankaatɛ alɛ buosiɛ buonyu bulɛ baayɔ dibu bata ni ɔka oso yi, nioso buokyesee kanya ka mmle bulɛ buɔta ɔka letofo nɛ, 15 di mmle baawowolaa ni akũ kamɛ di mba nintoole fɔ katũ beele ni sɛka bɛɛbafe ni suoto. Fabanya di akũ ya mmle kamɛ falɛ ɔtaka oyila okpoo kplɛ ninle okpoo wɔ mmle, mankpee ni baka ku nsɔ nwu batii kubuɛ. Batokopĩtɛ kasiɛkɔ diayɔ ni di saa obe kamɛ. Nkpo oso baawɔɔsa okpoo kplɛ wɔ mmle nɛ. 16 Buɔta ɔka letofo bulɛ nse beetofo okpoo kplɛ wɔ mmle beese kafɔɔ seyoyiɛ ninwu lese yi, lɛsalɛsaa kuninwii dilabasimbu fɔ di Okle-Kamaa.

17 Ninfɛ di ɔka nwu lakyesee kanya didiki ka mmle alɛ:

Kalaadu kakpɛ kanyayilatɛ Rehum, kukũ kpanatɛ Simsai ku bakpɛmblatɛwo lɛma bule nwu ninsi ni di Samaria aba bamba di Okle-Kamaa:

Kɔsɛsɛɛsa ye.

18 Batɔɔka kukũ ko biekyesee wo nii, beediki kasɔ kafɔɔ di anu nii. 19 Lata osuku baawowolaa asaa kamɛ, ni baanya alɛ diayɔ ni di saa yi, okpoo kplɛ wɔ mmle lataka kuayila di baka suoto, kuale kafɔɔ batokopĩtɛ ku banunsientɛ kasiɛkɔ. 20 Yerusalem lawɛ baka siene baatoole ni sɛka di Okle-Kamaa kamuu suoto, ni baatɔɔta akpooto, kɔsɔsĩ ku asaa osunsũ ato ya manta ni abaa baatɔɔta ma nɛ. 21 Nioso bikpee batii ba mmle kufiofa baadiɛ ɔkpɛ nwu, alɛ balaasinse okpoo wɔ mmle ose letofo diɛlase di obe wɔ lɛta ni osuku. 22 Bilolaa binyu bilɛ biɛblako ɔlaa wɔ mmle ɔkpɛ. Obe oso buata osuku dikpilesaa le mmle mmuɔ, ninlalasa asaa di ɔka suoto?

23 Obe wɔ baaka ni Ɔka Artasasta kukũ nwu bata ni Rehum ku kukũ kpanatɛ Simsai ku bakpɛmblatɛwo lɛma yi, nfanwu baasifi Yuda batii nfũ di Yerusalem, baayɔ osie baata ma baadiɛ ɔkpɛ nwu ɔbla.

24 Nkpo oso baadiɛ Yaa leyo nwu ɔkpɛ di Yerusalem ɔbla dialaase di Persia ɔka Dario sɛka ole lɛlɛɛ nyɔɔfa kamɛ.