1 Obe wɔ di SAATE nwu lɛlakaa lawɛ ni di Filisti batii kasɔ awɛntɛ akuɛnsĩ yi, 2 ni di Filisti batii lalɛɛ olebatatɛ ku babɔmpɛtɛ baatɔkɔ alɛ, "Be bubablako SAATE nwu lɛlakaa? Bitɔkɔ wo mmle bubakplesa ni munsifiko ni kayilakɔ nini."

3 Ni baadiki kanya alɛ, "Nse biokplesa Israel afiɔ lɛlakaa nwu yi, bitankplesa ni biasifiko difukuti. Kafɔɔ dikpeni biɛkyɛnko nwɔ lɛpɔɔ okpi asaaɔta. Ni babakya ye sifiɛ, mintofo kafɔɔ lɛsaa le oso di letoko nanfi nɔɔ diitekete ni di suoto lee."

4 Ninfɛ di Filisti batii nwu lakaalɛ babɔmpɛtɛ nwu alɛ, "Be lɛpɔɔ okpi asaaɔta buɔkyɛnko nwɔ?"

Ni baadiki kanya alɛ, "Bibla koto sɛɛle adiesaa atembi anɔɔ ku koto sɛɛle nfusu atembi anɔɔ, di Filisti batii batunletɛ lɛpɔ kanya. Diekye ofiɛ kpile nwu onwii niapɛ aye ku batunletɛ nwu akyuu lee anyɔ nɛ. 5 Bibla adiesaa nwu ku nfusu nwu atembi nikɔwɔɔsa ni kale nwu, biɛyɔ dibu bita Israel afiɔ nwu. Loobia abatekete letoko nanfi nɔɔ nwu di suoto lee ku afiɔ lee ku kasɔ lee. 6 Be oso biɔwɛnsa situ lee osie fɛ mmle di Egipte batii ku Farao labla ni? Obe wɔ aabla ma ni amumu osie kanya, batadiki Israel batii osuku alɛ basifi osuku lɛma?

7 "Nunua, bimiɛ keke wɔ mannafi ni ɔfɔle bise, ku banankyue banyɔ ba ninkle ni abi, manadita ma babla ni ɔkpɛ diidii. Binii banankyue nwu bikaasa di keke nwu, kafɔɔ bikpaa abi lɛma nwu bilaakpee di kakpeekɔ lɛma. 8 Biyɔ SAATE nwu lɛlakaa bitika di keke nwu suoto, biɛyɔ koto sɛɛle asaa nwu biɛbla bilɛ biokplesa minkyɛnko nwɔ ni fɛ lɛpɔɔ okpi asaaɔta bikpee di kalɛkɛɛ ka nintika ni di lɛlakaa nwu ɔlɔɔkɔ. Bidiki ni osuku diɛtɔɔkyɛ, 9 kafɔɔ bitoonyu ni. Nse diɛkata diesifi nni nimu kasɔ, diofe ni Bet Semes yi, ni SAATE nwu niata letoko nanfi kplɛ nwu lawa di suoto loo. Kafɔɔ nse diesifi, ni bubatofo bulɛ diele SAATE nwu niɛnanfi wo kootoko, kafɔɔ ɔwa ko diawa wo di suoto."

10 Nioso baabla nle mmle. Baayɔ banankyue nwu banyɔ baanii di keke suoto ni baakpee abi nwu di leyo lɛma nɛ. 11 Baayɔ SAATE nwu lɛlakaa baatika di keke nwu ku kalɛkɛɛ ka di koto sɛɛle nfusu ku koto sɛɛle adiesaa atembi ya baabla ni lasiɛ ni kaamɛ. 12 Ninfɛ di banankyue nwu lakata baakyɛ tinini baakyɔɔ anu Bet Semes, baatoowi di osuku. Batakɛ baafe oletanɛɛkyɛ ee ɔmɛntukyɛ. Filisti batii batunletɛ nwu latikanko ma baalaadu bia Bet Semes kɔmɛ.

13 Di obe nwu kamɛ Bet Semes batii latoofee akpaa lɛma di ɔtaata nwu, obe wɔ baatakatɛsa ni anu katoo, baanya ni lɛlakaa nwu yi, baanya suoto lɛyɔɔ ninfa. 14 Keke nwu lakyɛ aawa Yosua, Bet Semes otii nwu kofe, aabayila ninfa di difuɔ kplɛ ninwii ɔlɔɔkɔ. Ni di batii nwu labɛbɛɛ keke nwu sewoso, baayɔ banankyue nwu baata oleɔta fɛ ofiɛ asaaɔta baata SAATE nwu nɛ. 15 Ninfɛ di Lewi batii latekete SAATE nwu lɛlakaa ku kalɛkɛɛ nwu di koto sɛɛle asaa nwu lasiɛ ni kaamɛ baase kaasɔ, ni baakɛnkɛ nya baatika di difuɔ kplɛ nwu suoto nɛ. Di dii nwu nkpo, Bet Semes batii lata ofiɛ asaaɔta oleɔta baata SAATE nwu. 16 Filisti batii batunletɛ nwu banɔɔ lanya nle mmle nimuu, ni baakple baasifi Ekron di dii nwu nɛ.

17 N-ya mmle ninle koto sɛɛle adiesaa atembi ya di Filisti batii lakyɛnko ni SAATE nwu fɛ lɛpɔɔ okpi asaaɔta nɛ- okpoo biala lawɛ ninwii, ninwii, Asdod, Gasa, Askelon, Gat ku Ekron. 18 Koto sɛɛle nfusu atembi nwu kafɔɔ di Filisti batii sekpoo lɛpɔ kanya, sile ni batunletɛ banɔɔ nwu sele- sekpoo se beetofo seyoyiɛ beekyisa ni ku nnle lɛma kokpoenyii. Difuɔ kplɛ le suoto baatika ni SAATE nwu lɛlakaa nle kamaadiyilasaa diabadu dii le baakpana ni kukũ ko mmle di Yosua, Bet Semes otii nwu kofe.

19 Kafɔɔ Yaa lalo Bet Semes batii bawo. Aalo afosi-akuɛnsĩ lɛma ta baanyu ni SAATE nwu lɛlakaa kamɛ oso. Batii nwu lawi ta mmle di SAATE nwu labla ma ni oso.

20 Ni di Bet Semes batii lakaalɛ alɛ, "Owe nimafuo oyila di SAATE nwu anu, Yaa klekle wɔ mmle? Owe ɔkyɛ di lɛlakaa le mmle kamakata ninkyɛ, nse diedie ninfũ?"

21 Ninfɛ baakpee batɔkyɛntɛ di Kiriat Yearim batii nfũ baabuɛ alɛ, "Filisti batii ntookplesa SAATE nwu lɛlakaa bɛɛwako. Bisoo biwa biɛbayɔ ni bikatako bisifiko ɔkyɛ lee."