2 SAMUEL 4

Baalo Is-Boset

1 Obe wɔ di Saul obisuɔtɔbi Is-Boset lanu alɛ Abner ntookpi ni di Hebron, nnɛɛ lafee nwɔ, Israel omuu latũkũ. 2 Saul obisuɔtɔbi nwu lawɛ basuɔtɔ banyɔ ba niale ni batunletɛ di mba nindieko ni batii akudi kanya. Onwii leyooto niale Baana, ɔnyɔɔfa niale Rekab; Beerot otii, Rimon, Beerot otii nwu niakye ni Benyamin kɔna babisuɔtɔbi baale-baabu Beerot fɛ Benyamin lɛba lewo, 3 diekye Beerot batii latoso baasifi Gitaim baalaasiɛ ninfa fɛ bafɔɔ diabadu dii le baakpana ni kukũ ko mmle.

4 (Saul obisuɔtɔbi Yonatan lawɛ obisuɔtɔbi onwii niafefee ni di nkpaa nɔɔ nwu nnyɔ. Alɛɛ anɔɔ aafũ fiɛ di Saul ku Yonatan ɔlaa lakye Yesreel kuawa. Ni di nyuntɛ nɔɔ layɔ nwɔ aatosoko, kafɔɔ di ɔsanko nwu latɔɔpɛ sɛwa alɛ oosifi nii, obisɔ nwu lakpa, ni aakple lɛbafa nɛ. Obisɔ nwu leyooto niale Mefiboset nɛ.)

5 Ninfɛ di Rimon, Beerot otii nwu babisuɔtɔbi Rekab ku Baana ladie alɛ bɔɔkyɛ Is-Boset leyo nɛ. Baalaabuo nfa kakũ kplamantãa, di obe wɔ aatɔɔtɛ ni kakũ nɔɔ ɔnyɛɛ. 6 Baabuo leyo nwu kaamɛ fɛ akpaa awo bookusii, ni baatofo nwɔ kapamii kaafutu nɛ. Ninfɛ di Rekab ku obilɛma-suɔtɔbi Baana lamaa buɛɛ baasifi nɛ.

7 Baakyɛ leyo nwu di obe wɔ aate ni di atensaa suoto di leten-yo nɔɔ kamɛ. Baatofo nwɔ kapamii baalo ni kamaa, baabudi nwɔ disi. Baayɔ ni baaklee baakyɛ di Araba osuku kakyɛ nwu kamuu. 8 Ni baayɔ Is-Boset disi nwu baawako Dawid di Hebron, ni baatɔkɔ nwɔ alɛ, "Nnya lo lɛfɔ Saul, nnwɔ niamiɛ alɛ oolo fɔ ni obisuɔtɔbi Is-Boset disi. Miɛ SAATE nwu ntɔɔbla eekyisa di saate nii ɔka Saul ku banantii nɔɔ suoto."

9 Ni di Dawid latɔkɔ Rimon, Beerot otii nwu babisuɔtɔbi, Rekab ku obilɛma-suɔtɔbi Baana alɛ, "Nwaako di SAATE nwu lɛnya akpe ni nkpa, nnwɔ niadiki mi aakyeko ni dibuo nimuu kamɛ, 10 obe wɔ di otii onwii latɔkɔ mi ni alɛ, ‘Saul ntookpi nii,’ aanyu alɛ ɔlaa biene ɔɔwako mi nii, lamufũ nwɔ lalo di Siklag. Nni niale letota le latɔɔ ni di ɔlaa nɔɔ nwu suoto nɛ! 11 Ni lɛ nfɛ mɔ-nse batii kpile lelo otii tinini di leyo nɔɔ nimu kamɛ di atensaa nɔɔ amu suoto-ni naakaalɛ ntɔ nɔɔ di nnɛɛ lee, nindiki ye kaasɔ ka mmle suoto!"

12 Nioso Dawid ladiki bakpɛtɛ nɔɔ kanya, ni baalo ma nɛ. Baabudi nnɛɛ ku nkpaa lɛma, baayɔ atiki lɛma baasaka di lɛpanta ninwii ɔlɔɔkɔ di Hebron. Kafɔɔ baayɔ Is-Boset disi nwu baakookaa di Abner ɔkya kamɛ di Hebron.