1 Ɔblɔ lakple kuafiɛ Saate nwu di Israel suoto, ni aata Dawid lakpee ma aadiki, aabuɛ alɛ, "Kyɛ faalaaka Israel ku Yuda bakpɛtɛ."

2 Nioso ɔka latɔkɔ Yoab ku bakpɛtɛ kanyabayilatɛ ba di ɔkyɛ nɔɔ alɛ, "Bikyi biefenfe di Israel ana amuu, diɛyɔ ni di Dan diɛlaase ni di Beerseba, biɛka basuɔtɔ bakpɛtɛ nwu, di mmle katofo ma ni lɛpɔ."

3 Kafɔɔ Yoab latɔkɔ ɔka alɛ, "Saate Yaa lɛfɔ akpɛnsa bakpɛtɛ nwu alenkee kɔlafa kanya, di saate nii ɔka anu anya ni. Kafɔɔ be oso di saate nii komiɛ alɛ abla lɛsaa le mmle?"

4 Ɔka ɔlaa nwu kafɔɔ lalenkee Yoab ku kakpɛ kanyabayilatɛ nwu; nioso baakyɛ di ɔka anu baasifi alɛ bɔɔlaaka Israel batii bakpɛtɛ nwu.

5 Baawaalɛ Yordan okle baaloo nii, baasiɛ di Aroer ɔlɔɔkɔ, okpoo nwu kala kasɔ di kɔwɛ nwu, ninfɛ baafenfe di Gad baafe baasifi Yaser. 6 Baakyɛ Gilead ku Tatim Hodsi kasɔ suoto, baafe baasifi Dan Yaan baakyi ku Sidon. 7 Ninfɛ baafe baakyɔɔ anu Tiro seyoyiɛ ku Hewi batii ku Kanaan batii sekpoo simuu. Lɛyɛntɛle, baafe baakyɛ Beeseba di Yuda kasɔ ka bɔɔlɛɛ ni Negef.

8 Baakyi kasɔ kamuu baaloo nii, baakple baasifi Yerusalem di awɛntɛ anaasĩ ku ayi afosi-anyɔ kayɛntɛkɔ.

9 Ni di Yoab layɔ bakpɛtɛ nwu lɛpɔ aawako ɔka nɛ: Di Israel, basuɔtɔ ba nikafuo ni kapamii ɔkpɛ ɔblako baawɛ ni suoto, labla nkpe alafa-anɛ, di Yuda, nkpe alafa-anɔɔ.

10 Kafɔɔ Dawid otu lakpa, di bakpɛtɛ nwu ɔka sɛmaa, ni aatɔkɔ SAATE nwu alɛ, "Lɛbla okpile kplɛ di lɛsaa le lɛbla nii. Oo SAATE, lekoto kotikiti fɔ, yɔ kpɛmblatɛ lɛfɔ okpile fakyɛ nwɔ. Lɛbla dibuusaa kplɛ ninwii."

11 Fiɛ di Dawid lataka ni kaleesɛ ku oyita, SAATE nwu latɔkɔ Dawid asaanyatɛ, ɔlaabuɛtɛtɛ Gad alɛ: 12 "Kyɛ faalaatɔkɔ Dawid falɛ, ‘Nnya ɔlaa wɔ di SAATE nwu kobuɛ ni: Kamatɛ fɔ ɛlaa etiɛ di anu. Diki onwii ninwu, nin-yɔ nwu mbla fɔ.’ "

13 Nioso Yaa ɔlaabuɛtɛtɛ Gad lakyɛ Dawid nfũ aalaatɔkɔ nwɔ alɛ, "Kɔka kukpɛ di kasɔ lɛfɔ suoto alɛɛ atiɛ ɛɛ? Sɛɛ faatoototoso balo lɛfɔ awɛntɛ atiɛ, di obe wɔ batikanko fɔ ni ɛɛ? Sɛɛ ofiɛ kpile di kasɔ lɛfɔ suoto ayi atiɛ? Kanunua, bu nwu disi nfɛ, faatɔkɔ mi mmle ninaatɔkɔ ni nnwɔ niekpee mi ni kɔtɔ."

14 Ninfɛ di Dawid latɔkɔ Yaa ɔlaabuɛtɛtɛ Gad alɛ, "Nsi di nimiina kplɛ kamɛ osie kanya. Ta SAATE nwu ananfi wo kootoko, diekye nyaami nɔɔ ɔnya lemuɔ; kafɔɔ tanta batii lananfi mi kootoko."

15 Nioso SAATE nwu lata ofiɛ kpile lawa di Israel, diayɔ ni di olesɛ nwu dialaadu ni di obe wɔ aatɛ nii. Ni diayɔ ni di Dan dialaadu ni Beeseba batii ba niakpi ni labla nkpe afosi-akuɛnsĩ. 16 Di tɔkyɛntɛ nwu lananfi ni kɔnɛɛ nɔɔ alɛ ɔɔwɔɔsa ni Yerusalem yi, SAATE nwu labuo sɛnyaami, ta letoko naanfi nwu oso. Ni aatɔkɔ tɔkyɛntɛ wɔ niatɔɔta ni batii nwu ofiɛ alɛ, "Nfɛ dilɛ! Kplesa kɔnɛɛ lɛfɔ." Obe nwu SAATE nwu tɔkyɛntɛ nfɛ nkpe di Arauna, Yebusi otii nwu kakpaa.

17 Di Dawid lanya ni tɔkyɛntɛ wɔ niatoolo ni batii, ni aatɔkɔ SAATE nwu alɛ, "Ami ninle nnwɔ niabla ni okpile, nintalolaa labla nii. Batii ba mmle ninte ni fɛle bafoso, obe bɛɛbla? Ta letoko naanfi lɛfɔ diwa di suoto nii ku leyo nii batii suoto."

18 Di dii nwu nkpo, Yaa ɔlaabuɛtɛtɛ Gad lakyɛ Dawid nfũ aalaatɔkɔ nwɔ alɛ, "Kata faakyɛ faalaapɛ SAATE nwu oleɔta akyikye di Arauna, Yebusi otii nwu kakpaa." 19 Nioso Dawid lakata aakyɛ fɛ mmle di SAATE nwu ladiki ni kanya aafenko ni di Yaa ɔlaabuɛtɛtɛ Gad suoto. 20 Obe wɔ di Arauna lanyu, aanya ni ɔka ku batii nɔɔ kɔwa ni ɔkyɛ nɔɔ, ni aadie aalaawakasɔ di ɔka anu, aase katũ nɔɔ kaasɔ nɛ.

21 Ni di Arauna labuɛ alɛ, "Be oso di saate nii ɔka kɔwa kpɛmblatɛ nɔɔ ɔkyɛ?"

Ninfɛ di Dawid ladiki kanya alɛ, "Kɔbaya kakpaa lɛfɔ, di mmle kapɛ ni oleɔta akyikye nta ni SAATE nwu, alɛ ofiɛ kpile nwu kadiɛ ni batii ɔpɛ."

22 Ni di Arauna latɔkɔ Dawid alɛ, "Ta saate nii ɔka ayɔ lelele ninlɛ nwɔ ni, aayɔ ata. Nnya banankyue ba baata ni ɔfiɛ asaaɔta, nnya kafɔɔ kamɔɔ ɔpɛ sewoso ku banankyue sewoso se mananfi ni, diɛta ni ɔtɔ okutaa. 23 O ɔka, Arauna lɛyɔ n-ya mmle amuu ɛɛta ɔka." Arauna latɔkɔ nwɔ kafɔɔ alɛ, "SAATE Yaa lɛfɔ afũ fɔ kanya."

24 Kafɔɔ ɔka nwu labunka Arauna alɛ, "Oowo, letuna nlɛ kamata koto nta fɔ. Namata oleɔta wɔ ninan-ya ni lɛsaalɛsaa n-yɔ nta ɔfiɛ asaaɔta nta ni SAATE, Yaa nii."

Nioso Dawid laya kakpaa nwu ku banankyue nwu aata nya koto fututu afosi anɔɔ. 25 Ni di Dawid lapɛ oleɔta akyikye aata SAATE nwu ninfa, aata ɔfiɛ asaaɔta ku atoko ɔkyɛ ole asaaɔta oleɔta nɛ. Ninfɛ di SAATE nwu latuna di ɔlaa ɔpɛ nwu di kasɔ nwu disi nɛ. Ni di ofiɛ kpile nwu di Israel suoto ladiɛ nɛ.