1 Mose Kukũ Nɔnle 16

Okpi Diisi Ofe Ole

1 Nyuma kɔwɛntɛ ko manlɛɛ ni Abib*16.1 nkũ ninle kɔwɛntɛ kasale di Israel batii awɛntɛ kamɛ nɛ, faale SAATE Yaa lɛfɔ Okpi Diisi Ofe Dii nwu, diekye Abib kɔwɛntɛ nwu kamɛ di SAATE Yaa lɛfɔ lakpaa fɔ aadieko di Egipte kasɔ ku kakyɛ nɛ. 2 Nioso ta nankyue ee foso fɛ Okpi Diisi Ofe oleɔta fata SAATE Yaa lɛfɔ di lɛba le di SAATE nwu kamadiki anta alɛ Leyooto nɔɔ dite ni. 3 Tanwee sĩ ku bloblo wɔ beekpee ni lɛnyankasaa, kafɔɔ le bloblo wɔ ninantaka ni ayi akuɛnsĩ, dibuo ɔnya bloblo nwu, diekye nkyenkye biadie di Egipte kasɔ- di mmle di obe lele faanyuma ni obe wɔ faadie ni di Egipte kasɔ di nkpa lɛfɔ ayi amuu kamɛ. 4 Tanta baanya lɛnyankasaa di suoto lɛfɔ di kasɔ lɛfɔ kamuu suoto di ayi akuɛnsĩ nwu kamɛ. Tanta sina se fɛɛyɔ fɛɛta ni ɔleɔta di dii kasale kɔtɔɔfɔ nwu kusinwii labu kale lasɛ.

5 Tanta Okpi Diisi Ofe oleɔta nwu di sekpoo se di SAATE Yaa lɛfɔ lɛta fɔ ni kuonwii kamɛ, 6 diediki di lɛba le di SAATE Yaa lɛfɔ kamadiki anta alɛ Leyooto nɔɔ dite nii. Lɛba nwu dikpeni fɛɛta Okpi Diisi Ofe bɔkɛɛ nwu ku kɔtɔɔfɔ nɛ, nse kufĩ ntɔɔmɛɛ, di odie lɛfɔ dii di Egipte kasɔ suoto. 7 Bifiɛ sĩ biwee di lɛba le di SAATE Yaa lee kamadiki anta ni. Ni kaleesɛ oyita faakple fasifi lɛkpaayo lɛfɔ kamɛ. 8 Le bloblo wɔ ninantaka ni ayi akuɔ, dii kuɛnsinle bisi dikudi biesumu SAATE Yaa lee, nioso bitambla ɔkpɛ kuonwii.

Ofiɛlɛbee Dii Ole

9 Ka banawɔkyi bakuɛnsĩ, diɛyɔ di obe wɔ feekye ni kamɔɔ ofiɛlɛ kasɔ. 10 Ni faale Banawɔkyi Dii nwu fata SAATE Yaa lɛfɔ, faata asaaɔta ku otu-fãa di mmle kanya di SAATE Yaa lɛfɔ lɛta fɔ ni lɛtɔtrɔ fɛɛwɛ ni. 11 Ni faanya suoto lɛyɔɔ, afɔ, babisuɔtɔbi ku babisankobi lɛfɔ, bakpɛmblatɛ basuɔtɔ ku bakpɛmblatɛ basanko lɛfɔ, Lewi batii ba di sekpoo lɛfɔ ku bafɔɔ, bakuɛbi ku bakpisɔfɔ ba ninsi ni di kamɛ lee- di SAATE Yaa lɛfɔ anu di lɛba le abadiki anta ni alɛ Leyooto nɔɔ dite ni. 12 Nyuma falɛ balanle biale di Egipte, nioso bilolaa afiofa ya mmle bitikanko nwaa.

Akpanta Klekle Dii Ole

13 Nse fatoosiisa kɔfe lɛfɔ asaa ku nta lɛfɔ feeloo yi, ni faale Akpanta Klekle Dii nwu ayi akuɛnsĩ. 14 Nya suoto lɛyɔɔ di Dii nwu ole kamɛ- afɔ, babisuɔtɔbi ku babisankobi lɛfɔ, bakpɛmblatɛ-suɔtɔ ku bakpɛmblatɛ-sanko, Lewi batii ku bafɔɔ, bakuɛbi ku bakpisɔfɔ ba ninsi ni di sekpoo lɛfɔ kamɛ. 15 Ayi akuɛnsĩ faale Dii nwu nkpo fata SAATE Yaa lɛfɔ di lɛba le di SAATE nwu kamadiki antɛ ni. Diekye SAATE Yaa lɛfɔ kamata fɔ lɛtɔtrɔ di alesaa lɛfɔ ku nnɛɛ lɛfɔ ɔkpɛ omuu, ni suoto lɛyɔɔ lɛfɔ kamawo niimu.

16 Dikpeni basuɔtɔ lɛfɔ bamuu lɛwa SAATE Yaa lɛfɔ anu sitiɛ di lɛlɛɛ kamɛ di lɛba le di Yaa lɛfɔ kamadiki antɛ nii: nnya ninle Bloblo wɔ Ninantaka ni Dii, Banawɔkyi Dii ku Akpanta Dii nɛ. Otii kuonwii atanwa SAATE nwu anu nnɛɛ fukuti: 17 Dikpeni obiala lee lɛwako lɛkyɛsaa di mmle kanya di SAATE Yaa lɛfɔ lɛta fɔ ni lɛtɔtrɔ.

Afiofa Ɛɛta ni Bakantɛ

18 Diki bakantɛ ku banɔɔfotii fata di kɔna lee biala kamɛ di okpoo biala di SAATE Yaa lee kɔta fɔ ni, mma kafɔɔ nimakanko batii nwu di osuku kanya nɛ. 19 Baka lɛka onukwale kanya ee batannyu kuonwii di anu. Batanfũ ditunu kamɛ lɛsaa, diekye ditunu kamɛ lɛsaa mmbiɛsa numbentɛ anu, ninfintinsa batii tinini sɛlaa. 20 Tikanko onukwale, onukwale lete, di mmle faasiɛ ni nkpa fanaayɔ ni kasɔ ka di SAATE Yaa lɛfɔ kɔta fɔ ni.

Bayaa Bamba Kasumu

21 Tanse Asera owoso kuonwii di oleɔta akyikye ya fɛɛpɛ fɛɛta ni SAATE Yaa lɛfɔ ɔlɔɔkɔ, 22 tantɛ difiɔtii kuninwii kafɔɔ, diekye SAATE Yaa lɛfɔ lekyidisaa dile.