1 Mose lalɛɛ Israel batii bamuu aasiisa ni aatɔkɔ ma alɛ:

Oo Israel, binu, afiofa ku sisuku se kobuɛ bionu ni miɛ dii le mmle. Bitekete nya bienyu bilɛ bietikanko nya. 2 SAATE Yaa loo lanii kanya ku awo di Horeb Kobokote. 3 Diele ku bate loo di SAATE nwu lanii kanya ka mmle, kafɔɔ ku awo, ku bamuu loo ba ninkpe ni nkpa ninfũ miɛ. 4 SAATE nwu lakakatɛko ye aakyeko ɔtɔ kamɛ di kobokote osi anu ku anu. 5 (Di obe nwu nkpo kamɛ layila di SAATE nwu ku aye ntɛɛ latɔkɔ ye SAATE nwu ɔlaa, diekye biatɔɔyɛkɛ ɔtɔ nwu nioso bitakyɛ kobokote nwu osi.) Ni di SAATE nwu labuɛ alɛ:

6 "Ami ninle SAATE Yaa lɛfɔ wɔ niakpaa fɔ aadieko ni di Egipte sɛlanle kasɔ nwu nɛ.

7 "Tansumu bayaa bamba faakyakaa di ami.

8 "Tambla afiɔ di lɛsaa lele letembi kanya di osi kaatoo ee kasɔ kaalɔ suoto ee di ntu kamɛ kaalɔ faata suoto lɛfɔ. 9 Tanwakasɔ faata nya ee faasumu nya; diekye ami, SAATE Yaa lɛfɔ, Yaa wɔ ninkpɛ ni sɛsɔfɔwo nle, ninaanfi ni babi kootoko ta bate lɛma sikpile oso, diɛlaase ni di kɔna tiɛfa ku kɔnaafa di mba niekyidi mi nii, 10 kafɔɔ nintuo ni ana kakpe ya nimbɔmbɔ mi ni beemufũ afiofa nii bakle ni lɛbɔmbɔ.

11 "Tamblako SAATE Yaa lɛfɔ leyooto ɔkpɛ kasakasa, diekye SAATE nwu kamalo otii lele niɛblako leyooto nɔɔ ɔkpɛ kasakasa lɛpɔɔ.

12 "Klee Lɛnyɛɛtɛyi nwu nkpo, faabla ni klekle, fɛ mmle di SAATE Yaa lɛfɔ lɛtɔkɔ fɔ nii. 13 Ayi akuɔ faabakyɛ ɔkpɛ kamɛ, fambla sɛkpɛ lɛfɔ simuu, 14 kafɔɔ dii kuɛsinle nle Lɛnyɛɛtɛyi diɛta SAATE Yaa lɛfɔ. Di dii nwu nkpo tambla ɔkpɛ kuonwii, kuntɛ afɔ omu ee kuntɛ obisuɔtɔbi lɛfɔ ee obisankobi lɛfɔ ee osuɔtɔ kpɛmblatɛ ee ɔsanko kpɛmblatɛ lɛfɔ ee nankyue lɛfɔ ee bɔkɛɛ lɛfɔ wɔ nintuka ni atoo, ee bɔkɛɛ lɛfɔ lele ee ɔfɔɔ wɔ ninsi ni di leyo lɛfɔ, ta mmle di osuɔtɔ kpɛmblatɛ ee ɔsanko kpɛmblatɛ lɛfɔ kamatɛ ni ɔnyɛɛ, fɛ mmle di afɔ fɔɔtɛ ni ɔnyɛɛ. 15 Nyuma falɛ ɔlanle faale di Egipte kasɔ fiɛ di SAATE Yaa lɛfɔ lakpaa fɔ aakyeko nfa ku kɔnɛɛ kplɛ nɔɔ ku kɔnɛɛ nɔɔ lɛnanfi. Nioso SAATE Yaa lɛfɔ lɛtɔkɔ fɔ alɛ le Lɛnyɛɛtɛyi nwu nkpo.

16 "Bu teefɔ ku yaafɔ, fɛ mmle di SAATE Yaa lɛfɔ lɛtɔkɔ fɔ ni, alɛ faasiɛ nkpa fanklɛ, ninlɛ ninta fɔ ni di kasɔ ka di SAATE Yaa lɛfɔ kɔyɔ anta fɔ nii.

17 "Tanlo otii.

18 "Tankpee asɔnɔ.

19 "Tan-yu.

20 "Tanlaa sɛlaa ku afunu faatika di owo-lɛfɔ* suoto.

21 "Tanta owo-lɛfɔ ɔsɔfɔ lasɛɛ fɔ anu. Tanta owo-lɛfɔ leyo ee kasɔ ee osuɔtɔ kpɛmblatɛ ee ɔsanko kpɛmblatɛ nɔɔ ee nankyue ee bɔkɛɛ nɔɔ wɔ nintuka ni atoo, ee lɛsaa lele ninle ni owo-lɛfɔ lele lasɛɛ fɔ anu."

22 Nnya ninle afiofa ya di SAATE nwu layie ni lɛkya ku sɛlɔ siene aatɔkɔ ni kasikɔ lee kamuu ninfa di kobokote nwu osi di ɔtɔ ku lelokonkyɛ nwu ku ditunu tunutunu kamɛ nɛ; atasin-yɔ ni lɛsalɛsaa aakyakaa nii. Ni aakpana nya di afuɔ nkyɛ nnyɔ suoto aayɔ aatɛɛ nɛ.

23 Obe wɔ bianu sɛlɔ kodie sinkye ni ditunu nwu kamɛ, di kobokote nwu latoofiɛ ni bembe ku ɔtɔ yi, basuɔtɔ batunletɛ bamuu di ana lee ku banɔɔfo lee lawa ɔkyɛ nii. 24 Ni biatɔkɔ mi bilɛ, "SAATE Yaa loo ntootuo wo leklekle nɔɔ ku sɛka nɔɔ, ni butoonu sɛlɔ nɔɔ, siekye ni ɔtɔ kamɛ nɛ. Miɛ butɔɔnya bulɛ otii kafuo nkpa osiɛ nse kuntɛ Yaa lɛkakatɛko nwɔ. 25 Kafɔɔ kanunua, be oso nfɛ buakpi? Ɔtɔ kplɛ wɔ mmle kamafiɛ wo, munkpi nse buokple buonu SAATE Yaa loo sɛlɔ. 26 Diekye ɔmɛntii-nyu nitoodinu Yaa wɔ ninkpe ni nkpa sɛlɔ kɔkakatɛ sinkye ɔtɔ kamɛ, anwɛ nkpa, fɛ mmle di awo buonu ni? 27 Kyɛ falaatɛɛtɛɛ faanu ɔlaa wɔ omuu di SAATE Yaa loo kobuɛ ni. Ni faabatɔkɔ wo ɔlaa lele di SAATE Yaa loo lɛtɔkɔ fɔ ni. Bubanu, munkyɔɔ atoko kafɔɔ."

28 SAATE nwu lanu ye ɔlaa di obe wɔ biakakatɛkoe nii, ni di SAATE nwu latɔkɔ mi alɛ, "Ntoonu ɔlaa wɔ di batii ba mmle lɛtɔkɔ fɔ nii. Ɔlaa biala baabuɛ ni lalɛ. 29 Oo, alɛ situ lɛma kamata ma manyɛkɛ mi manle afiofa nii amuu obe lele, di mmle dibalɛ ninta ma ni ku babi lɛma dinaa ni kaloo!

30 "Tɔɔkyɛ faalaatɔkɔ ma falɛ bakple basifi akpaayo lɛma kamɛ. 31 Kafɔɔ afɔ siɛ di ɔkyɛ nii ninfũ ninta fɔ sɛlaa ku sisuku ku afiofa amuu ya fabatuo ma mantikanko ni di kasɔ ka kɔta ma manaayɔ ni."

32 Nioso bilolaa binyu, biɛbla di lɛsaa le di SAATE Yaa lee lɛtɔkɔ ye ni; batamunikĩi biafe oletanɛɛkyɛ ee ɔmɛntukyɛ. 33 Bikyɛ di osuku wɔ omuu di SAATE Yaa lee lɛtɔkɔ ye ni, di mmle biasiɛ ni nkpa, ninlɛ ninta ye ni, ayi lee kafɔɔ mpɔ ni di kasɔ ka biofe ni ɔyɔ suoto.