1 Ninfɛ buakple nkpaamaa buakyɔɔ anu ɔfaafuu buafe di Lekpo Sɛɛle osuku, fɛ mmle di SAATE nwu lakyɔɔ mi ni kɔnɛɛ nɛ. Diekye buakyɛ buakyi Seir kale lekpenkpe nwu diaklɛ.

2 Ni di SAATE nwu latɔkɔ mi alɛ, 3 "Bitɔɔkyɛ biekyi lekpenkpe kale ka mmle diɛklɛ; nunua bimunikĩi di katoo-kasɔ. 4 Tɔkɔ batii nwu sɛlaa se mmle falɛ: ‘Nfɛ bibafe di babilee-suɔtɔbi Esau banantii kasɔ suoto, mba ninsi ni di Seir. Babayɛkɛ ye, kafɔɔ bilolaa binyu nwaa. 5 Bitankpee ma ɔblɔ kakpɛ lawa, diekye namata ye kasɔ lɛma nwu kukanwii, bia kaapɔ biase ni kɔkpaa lee. Lɛyɔ Seir lekpenkpe kale nwu lɛta Esau fɛ kale nwɔ kamu. 6 Bita ma koto di koto-fututu kamɛ di alesaa ya biele ni ku ntu be bienyi ni.’ "

7 SAATE Yaa lee ntɔɔta ye lɛtɔtrɔ di nnɛɛ lee ɔkpɛ omuu kamɛ. Aanyu ye di osuku lee ɔkyɛ di ɔfaafuu foo wɔ mmle kamɛ. Di alɛɛ afosi-ana ya mmle SAATE Yaa lee ntoosiɛko ye, lɛsalɛsaa kafɔɔ ditafĩ ye.

8 Nioso buakyɛ bualaawaalɛ babiloo-suɔtɔbi Esau banantii ba ninsi ni di Seir buafe. Buadiɛ Araba osuku wɔ niakye ni Elat ku Esion Geber osi nwu, buafe di Moab ɔfaafuu osuku buasifi.

9 Ninfɛ di SAATE nwu latɔkɔ mi alɛ, "Bitankpee Moab batii kubuɛ ee biakpee ma ɔblɔ kakpɛ lawa, diekye namata ye kasɔ lɛma nwu lɛba kukanwii. Ntɔɔyɔ Ar lɛta Lot banantii fɛ kalekɔ lɛma."

10 (Obe nwu Emi batii niasiɛ ninfa- batii nwu lawɛ osie, baapɔ baakaana fɛ Anak batii. 11 Fɛle Anak batii yi, baanya ma fɛ Refait batii okle, kafɔɔ Moab batii nlɛɛ ma alɛ Emi batii. 12 Saa yi, Hori batii niasiɛ di Seir, kafɔɔ Esau banantii latososa ma. Baawɔɔsa Hori batii di anu lɛma, ni baasiɛ di kasiɛkɔ lɛma, fɛ mmle di Israel batii labla ni di kasɔ ka di SAATE nwu lata ma ni fɛ kalekɔ lɛma nɛ.)

13 Ni di SAATE nwu labuɛ alɛ, "Kanunua bitaka biɛlaawaalɛ Sered Ɔtaata nwu." Nioso bualaawaalɛ ɔtaata nwu.

14 Afosi-atiɛ alɛɛ anɛ lafe diayɔ ni di obe wɔ buadie ni di Kades Barnea dialaase ni di obe wɔ buawaalɛ ni Sered Ɔtaata nwu. Di obe nwu kamɛ, basuɔtɔ ba bamuu nikakpɛ ni kakpɛ ntookpi beedie di kasiɛkɔ nwu kamɛ, fɛ mmle di SAATE nwu laka ni ntam aata ma nii. 15 SAATE nwu kɔnɛɛ lataka di suoto lɛma dialaase di obe wɔ aalo ni bamuu lɛma aaloo ni di kasiɛkɔ nwu kamɛ.

16 Di obe wɔ di basuɔtɔ bakpɛtɛ yɛntɛle ba mmle di batii nwu kamɛ ntookpi nii yi, 17 SAATE nwu latɔkɔ mi alɛ, 18 "Miɛ fabafe di Moab kasɔ di Ar. 19 Nse biɛbadu Amon batii nfũ yi, bitankpee ma kubuɛ ee biakpee ma ɔblɔ kakpɛ lawa, diekye namata ye kasɔ lɛba kukanwii ninle ni Amon batii kale. Ntɔɔyɔ ka lɛta Lot banantii fɛ kalekɔ lɛma."

20 (Nka kafɔɔ baanya ka fɛ Rafait batii kasɔ, baasiɛ ni ninfa saa; kafɔɔ Amon batii nlɛɛ ma Samsum batii. 21 Baale batii ba niawɛ ni osie, baapɔ ni, baakaana ni fɛ Anak batii. Kafɔɔ SAATE nwu lawɔɔsa ma di Amon batii anu, baatososa ma, ni baasiɛ di kasiɛkɔ lɛma nɛ. 22 Nkpo kafɔɔ di SAATE nwu labla aata Esau banantii ba niasiɛ ni di Seir, di obe wɔ aawɔɔsa ni Hori batii di anu lɛma nɛ. Baatososa ma, ni basi di kasiɛkɔ lɛma diɛbase bia miɛ nɛ. 23 Kafɔɔ Awi batii ba niasiɛ ni di sekpooenyii nwu baalaadu ni Gasa yi, Kaftor batii ba niakye ni Kaftor lawɔɔsa ma, ni baasiɛ di kasiɛkɔ lɛma nɛ.)

24 "Bitaka nunua biɛlaataalɛ Arnon Okplo kyofole. Binyu, ntɔɔyɔ Amori otii nwu, Hesbon ɔka Sihon ku kale nɔɔ lekpee ye ninnɛɛ. Bikpɛ ko nwɔ kakpɛ biekye kasɔ bitoofũ kasɔ nwu. 25 Miɛ dii le mmle makye kasɔ nta suoto lee difu ku lɛyɛkɛ mpɛ nnle mmuu di kolo kalɔ. Babanu suoto lee ɔlaa mantũtũkũ ku lɛyɛkɛ ta aye oso."

26 Lakpee batɔkyɛntɛ baakye Kedemot ɔfaafuu baakyɛ Hesbon ɔka Sihon nfũ, latɔɔ ni atoko ɔkyɛ ole sɛlaa nlɛ, 27 "Ta wo bubuo bufe di kale lɛfɔ. Bubafe di osuku kplɛ suoto lete; bulɔbakɛ bufe oletanɛɛkyɛ ee ɔmɛntukyɛ. 28 Sunsũ alesaa ya bubale ni ku ntu be bubanyi ni fata wo di koto fututu kɔya kanya. Ta wo bubuo bufe ku nkpaa lete- 29 fɛ mmle di Esau banantii ba ninsi ni di Seir, ku Moab batii ba ninsi ni di Ar, labla baata wo ni- dialaase ni di obe wɔ buataalɛ ni Yordan buabuo ni kasɔ ka di SAATE Yaa loo kɔyɔ anta wo ni." 30 Kafɔɔ Hesbon ɔka Sihon lasĩ, atata wo buabuo buafe. Diekye SAATE Yaa lee lata ninwuna nɔɔ lawɛ otokopĩ, otu nɔɔ kafɔɔ lawɛ osie alɛ ɔɔyɔ nwɔ ankpee di nnɛɛ lee, fɛ mmle atɔɔbla ni kanunua.

31 Ni di SAATE nwu latɔkɔ mi alɛ, "Nyu, ntookye kasɔ kɔyɔ Sihon ku kale nɔɔ nkpee fɔ ninnɛɛ. Kanunua kye kasɔ faalenkee nwɔ faafũ kasɔ nɔɔ nwu."

32 Obe wɔ di Sihon ku bakpɛtɛ nɔɔ bamuu ladie baawa babadieko wo ni kakpɛ di Yahas yi, 33 SAATE Yaa loo layɔ nwɔ aakpee wo ninnɛɛ, bualo nwɔ ku babisuɔtɔbi nɔɔ ku bakpɛtɛ nɔɔ bamuu buatɛ. 34 Di obe nwu kamɛ, buafũ sekpoo nɔɔ simuu, buawɔɔsa sĩ klekle- basuɔtɔ, basanko ku babisɔ. Butabu kuonwii lasiɛ nkpa. 35 Kafɔɔ babɔkɛɛ sele ku kakpɛ kamɛ asaa lɛma ya buayɔ ni di sekpoo nwu nnya buayɔ buasifiko buata suoto loo. 36 Diayɔ ni di Aroer di Arnon Okplo kyofole kotoko, diakple diayɔ ni kafɔɔ di okpoo nwu di kɔwɛ nwu kamɛ, bia dialaadu ni Gilead, okpoo kuonwii ditawɛ kuawɛ ni osie kualenkee wo nii. SAATE Yaa loo layɔ simuu aata wo. 37 Kafɔɔ di SAATE Yaa loo ɔlaa kanya didiki yi, bitakpanko Amon batii kasɔ kukanwii, ee kasɔ ka ninte ni di Yabok okle ɔlɔɔkɔ ee nka di akpenkpe sekpoo ɔlɔɔkɔ.