1 Nse basuɔtɔ banyɔ kɔnanfi ɔlaa yi, bayɔ nwu bakyɛnko kakankɔ, di bakantɛ babuo di ɔlaa nwu kamɛ, baadiki lɛbɛ ku lɛpɔɔ. 2 Nse osuɔtɔ wɔ niɛkpi ni lɛpɔɔ lesiɛko lɛpɛ yi, ni kantɛ nwu atɔɔ ate kaasɔ di anu nɔɔ aata bapɛ nwɔ kowesee ko niesiɛko kuɔta ni okpile wɔ ɛɛbla ni kanya, 3 kafɔɔ diɛkaatɛ bɛɛpɛ nwɔ dielenkee kowesee afosi-ana. Nse bɛɛpɛ nwɔ kuolenkee nkpo, ni babawakosa obilee nwu kasɔ di anu lɛfɔ.

4 Tannii nankyue-suɔtɔ kanya di obe wɔ ayɛ oofiɛlɛ ni kamɔɔ.

5 Nse babilɛma-suɔtɔbi nsi di lɛba ninwii di onwii lɛma lekpi anaa osuɔtɔbi yi, ni kpisɔfɔ nɔɔ nwu atanaayɔ kɔsa di leyo bamba kamɛ. Ɔsa nɔɔ nwu osuɔtɔ-bilɛma ayɔ nwɔ ayɔ, aabla ɔsa obilɛma nwu nkpo lɛblasaa ata ɔsanko nwu. 6 Obisuɔtɔbi kasale wɔ abalofo ni ale obilɛma-suɔtɔbi nwu niakpi ni leyooto ta mmle di leyooto nɔɔ dilɔbayu ni di Israel kasɔ.

7 Kafɔɔ, nse osuɔtɔ owo diloomiɛ alɛ ayɔ obilɛma-suɔtɔbi nwu ɔsɔfɔ yi, ni ɔsanko nwu akyɛ banɔɔfo nfũ di okpoo nwu bawo kalɛɛkɔ alaatɔkɔ ma alɛ, "Ɔsa nii obilɛma-suɔtɔbi lesĩ alɛ ɔɔbabla obilɛma-suɔtɔbi lɛblasaa atɛɛ. Alɛ obilɛma-suɔtɔbi leyooto ditante di Israel kasɔ." 8 Ni okpoo nɔɔ nwu banɔɔfo kamalɛɛ osuɔtɔ nwu mankakatɛ mantɔɔ. Nse eetika nwu difuɔ eebuɛ alɛ, "Noomiɛ nlɛ n-yɔ nwɔ," 9 ni obilɛma-suɔtɔbi kpisɔfɔ nwu nkpo akyɛ osuɔtɔ nwu katũ di banɔɔfo nwu anu, aalaadiki osuɔtɔ nwu katokota kanwii di kɔkpaa nɔɔ, aatufa sita akpete nwɔ di anu aabuɛ alɛ, "Nnya lɛsaa le mambla ni osuɔtɔ wɔ ninoomiɛ alɛ obilɛma-suɔtɔbi awɛ ni banantii." 10 Ni baalɛɛ osuɔtɔ nwu kɔna di Israel alɛ Osuɔtɔ wɔ katokota Beediki ni Kɔɔkpaa Leyo.

11 Nse basuɔtɔ banyɔ kɔkpɛ, di onwii lɛma ɔsɔfɔ lɛwa alɛ oofũ ɔsa di owo nɔɔ nwu nnɛɛ, di ɔsanko nwu lemufũ osuɔtɔ nwu nyɔɔfa sisuɔtɔ yi, 12 bibudi ɔsanko nwu kɔnɛɛ biyu. Bitannyɔɔ nyaami.

13 Tankpee akadisaa anyɔ di kotofo lɛfɔ, ninutũle ku lɛfɛnflɛle. 14 Tanse aklapoosaa anyɔ di leyo lɛfɔ, lɛkplɛ ku dibiibii. 15 Dikpeni fɛɛwɛ akadisaa ku aklapoosaa ya niewo ni ɛɛkyɛkyɛ nii, di mmle faasiɛ nkpa fanklɛ ni di kasɔ ka di SAATE Yaa lɛfɔ kɔyɔ anta fɔ ni suoto. 16 Diekye SAATE Yaa lɛfɔ lekyidi otii lele nimbla ni asaa ya mmle, olele ninambla asaa di osuku kanya.

17 Nyuma lɛsaa le di Amalek batii labla fɔ ni di osuku, di obe wɔ biadie ni di Egipte biɔwa ni. 18 Di obe wɔ ditoobuo fɔ ni fatasinwɛ ni ɔnyɛɛ, baakyakako fɔ ni di osuku baalo ni batii ba niakpi ni sɛmaa bamuu; batayɛkɛ ni Yaa. 19 Nioso nse feebuo kasɔ ka di SAATE Yaa lɛfɔ kɔyɔ anta fɔ alɛ yɔ ni fɛ atesaa, ɛɛta fɔ ɔnyɛɛ ɔtɛ di balo ba bamuu niɛmana fɔ beekyi ni nnɛɛ yi, faawɔɔsa Amalek batii bamuu alɛ kuonwii dilaasinnyuma ma di kasɔ ka mmle suoto. Tan-yee!