1 Nse ɔlaabuɛtɛtɛ ee alaafɔ kasɔ dikitɛ nsi di kamɛ lee, ɛɛbla lɛsaa le niɛbla ni ɔkpɛ ee dituosaa lewo, 2 di lɛsaa le niɛbla ni ɔkpɛ ee lɛblasaa nwu eebuɛ ni lɛwa kaanya, kafɔɔ eebuɛ alɛ, "Bita butikanko bayaa bamba" (bayaa ba bitatofo nii) ni bitabusumu ma yi," 3 bitannu ɔlaabuɛtɛtɛ ee kɔlaafɔ kasɔ dikitɛ nwu nkpo ɔlaa. SAATE Yaa lee nikɔsɔ ye annyu nse mimbɔmbɔ nwɔ ku otu lee omuu ku ɔkla lee omuu. 4 SAATE Yaa lee dikpeni bietakanko, lete nɔɔ kafɔɔ dikpeni biɛyɔ dibu biɛta. Bile afiofa nɔɔ, bienu nwɔ ɔlaa; bisumu nwɔ, bieklee nwɔ kpinkpĩ. 5 Dikpeni bielo ɔlaabuɛtɛtɛ ee alaafɔ kasɔ dikitɛ nwu nkpo, diekye eebuɛ ɔtaka oyila ɔlaa di SAATE Yaa lee suoto, nnwɔ niakpaa ye aadieko ni di Egipte, aadiki ye ni di sɛlanle kasɔ suoto; eekpee kɔnyaabe alɛ ookyisa ye anu di osuku wɔ suoto di SAATE Yaa lee latɔkɔ ye alɛ bikyɛ nii. Dikpeni biediki otii kpile nwu di kamɛ lee.

6 Nse obilee-suɔtɔbi omuomu, ee obisuɔtɔbi ee obisankobi lɛfɔ, ee ɔsɔfɔ lɛfɔ wɔ fambɔmbɔ ni, ee siɛwo lɛfɔ wɔ niɛtɛ akaako fɔ ni lɛkyɔnkyɔ fɔ di lewofa kamɛ alɛ, "Ta bukyɛ buɔlaasumu bayaa bamba" (bayaa ba di afɔ ee bawa lɛfɔ ditatofo nii, 7 batii ba ninsi bɛɛmana fɔ beekyi ni bayaa, kuntɛ bɛɛtɛɛtɛɛ ee beekyo, diɛyɔ ni di kasɔ disi le diɛlaase ni di disi le), 8 tannu nwɔ ɔlaa ee faakyɔɔ nwɔ atoko. Tan-nyɔɔ nyaami. Tankyɛ nwɔ ee faatĩtĩi nwɔ. 9 Nwaako dikpeni feelo nwɔ. Kɔnɛɛ lɛfɔ dikpeni kuole kɔkasale nimalo nwɔ nii, fiɛ di batii bamuu nnɛɛ. 10 Safɔ nwɔ afuɔ aakpi, diekye eemiɛ alɛ ookyisa fɔ di SAATE Yaa lɛfɔ wɔ niakpaa fɔ aadieko ni di Egipte, aadiki ni di sɛlanle kasɔ suoto. 11 Ni Israel batii bamuu kamanu manyɛkɛ, ni otii kuonwii di kamɛ lee dilɔbasinkple abla lɛsaa kpile le mmle okle.

12 Nse feenu di sekpoo se di SAATE Yaa lefɔ kɔyɔ anta fɔ ni alɛ siɛ ni owo kamɛ alɛ, 13 batii kpile bawo ntɔɔtaka kaamɛ lee bɛɛkyɔnkyɔ okpoo lɛma batii, boobuɛ alɛ, "Bita bukyɛ buɔlaasumu bayaa bamba" (bayaa ba bitatofo nii), 14 ni dikpeni feewolaa, fɛɛkpɛnkpɛ, feebuo kafɔɔ kaamɛ nwaa feenyu. Ni nse nwaako dietuo alɛ bɛɛbla diyududusaa le mmle kaamɛ lee yi, 15 ni dikpeni bielo batii nwu bamuu ninsi ni di okpoo nwu kamɛ. Biwɔɔsa okpoo nwu klekle, batii ku babɔkɛɛ sele lɛma, akyuu nwu anyɔ. 16 Bisiisa okpoo nwu asaa amuu di lɛkpaka ntɛɛ, biɛfiɛ okpoo nwu ku asaa ninwu amuu fɛ ofiɛ asaaɔta ya bɛɛta ni SAATE Yaa lee. Diekple kawɔɔ ka ninaa ni kaloo, alɛ blaasinse nwu letofo diidii. 17 Dinaa alɛ bɛɛnyako ye kawɔɔsa asaa nwu di nnɛɛ lee, di mmle di SAATE nwu ɔblɔ yakayaka nɔɔ nwu kayɔɔ ni; abanya fɔ nyaami, anle fɔ sibualɛ, anta kɔna lɛfɔ nkpɛ, fɛ mmle aabuɛ aatɛ aata ni bawa lɛfɔ, 18 ta mmle feenu ni SAATE Yaa lɛfɔ ɔlaa, feele ni afiofa nɔɔ nwu amuu ya kɔyɔ nta fɔ ni miɛ, fambla ni lɛsaa le ninlɛ ni di anu nɔɔ oso.