1 SAATE Yaa lee babi bile. Bitankyankya suoto lee ee bikpaasu asi lee ta bakpi oso, 2 diekye batii klekle bile bita SAATE Yaa lee. Di batii bamuu di kasɔ anu suoto di SAATE nwu lediki ye alɛ bile nwɔ bale bamu.

3 Tanle diyududusaa kuninwii. 4 Nnya babɔkɛɛ ba bikpe osuku minle ni: nankyue, foso ku tie, 5 kakpini ku kuɔ, kapoodina, dufu, kɔkɔ̀, kafɛ ku ɔtrɔmu. 6 Biafuo bɔkɛɛ lele di obo nte ni di lɛkpɔbi nɔɔ, diɛsɛ ni di akyuu anyɔ, ankple anyiensa alesaa anwee ni ole. 7 Kafɔɔ mba ninwee ni sɛfa mankple manyiensa man-wee ni ee di obo diete ni di akpɔbi lɛma saa yi, bitanle ma. Mma ninle kapupɔnkɔ, fɔmisii ee saafɔ. Kuntɛ man-wee sɛfa mankple manyiensa man-wee yi, obo diete ma di akpɔbi; nioso baale babɔkɛɛ klekle bata ye. 8 Lɛplakuo kafɔɔ diɛbla klekle; kuntɛ obo nte di lɛkpɔbi nɔɔ yi, annwee alesaa aakple aayiensa aawee. Nioso bitanle sina lɛma ee biakpanko bakpi lɛma.

9 Di asaa ya amuu ninsi ni di ntu kamɛ yi, biafuo lelele di kobembe n-yɛ, akpe ni apoo kafɔɔ ole. 10 Kafɔɔ lɛsaa lele ninaa ni kobembe ku apoo yi, bitanle nya; aabla klekle ata ye.

11 Biafuo kansiɛ lele niɛbla ni klekle ole. 12 Kafɔɔ mba biɛtanle ni ninle: klikpo, lelente, lelente wɛɛfɛɛ, 13 kɔɔlɛ sɛɛle, kɔɔlɛ wɛɛfɛɛ, ku balele ninte ni fɛle klikpo, 14 bakwakwalobi lele, 15 disukusuku le nin-yɛ ni akya, basɛɛ disukusuku, lekpo kansiɛ, kakyɛ lele, 16 disukusuku le biibii, disukusuku le kplɛ, disukusuku le fututu, 17 ɔfaafuu disukusuku, kakyɛ ka kplɛ, lekpo kansiɛ kplɛ, 18 kakyakpodi, okle kotoko kansiɛ lele, ansĩi ku lɛpãa.

19 Kɔbɔbɔbii ko kumuu ninflɛlɛtɛ ni di dikudi kamɛ dieklekle kuta ye; bitanle kũ. 20 Kafɔɔ biafuo kabɔkɔbi lele ninkpe ni afoko keeklekle ni ole.

21 Bitanle lɛsaa lele biɛnya bilɛ ditookpi ni kofokofoko. Biafuo ni ɔyɔ ɔta ɔfɔɔ wɔ ninsi ni di sekpoo lee nwu lele kamɛ anle ee minsunsũ minta kale bamba otii. Kafɔɔ batii klekle bile bita SAATE Yaa lee.

Bitan-wa tie dibi di ɔya nnyɛɛntu kamɛ.

22 Nyu falɛ feediki dikyuu fosile di kofe lɛfɔ alesaa amuu fɛɛwɛ ni lɛlɛɛ biala fɛɛtɛ lete. 23 Faale dikyuu fosile di atitabi, nta fɔle, nnɔnyi, banankyue ku bafoso lɛfɔ lelofo kasale nwu di SAATE Yaa lɛfɔ anu, di lɛba le abadiki anta alɛ Leyooto nɔɔ dite ni, di mmle faatekete ni mmle fabayɔ dibu fanta ni SAATE Yaa lɛfɔ obe lele. 24 Kafɔɔ nse lɛba nwu lesii okyo, di SAATE Yaa lɛfɔ lɛta fɔ lɛtɔtrɔ, alɛ flɔbafuo dikyuu fosile lɛfɔ nwu otuka (ta lɛba le di SAATE kamadiki anta ni Leyooto nɔɔ kalɛɛkɔ lekyo ni oso yi), 25 ni kyɛlɛnsa dikyuu fosile lɛfɔ nwu faafũ koto fututu, faayɔ koto fututu nwu fasifiko lɛba le di SAATE Yaa lɛfɔ kamadiki antɛ ni. 26 Yɔ koto fututu nwu faya lɛsaa lele ninlɛ fɔ: nankyue, foso, nta ee nta siene ee lɛsaa lele niekye fɔ ni di otu. Di afɔ ku leyo lɛfɔ kamɛ batii bile nya ninfa, biɛnya suoto lɛyɔɔ di SAATE Yaa lɛfɔ anu. 27 Tantɛ Lewi batii ba ninsi ni di sekpoo lɛfɔ sɛmɛntu, diekye banaa kalekɔ ee atesaa lɛma amu.

28 Di lɛlɛɛ tiɛfa biala kayɛntɛkɔ yi, yɔ alesaa ya fɛɛwɛ ni dikyuu fosile fabatɛ di sekpoo lɛfɔ nwu, 29 di mmle di Lewi batii (ba ninaa ni kalekɔ ee atesaa lɛma amu) ku bafɔɔ, bakuɛbi ku bakpisɔfɔ ba ninsi ni di sekpoo lɛfɔ kawa mamale mam-miɛ nii, di mmle di SAATE Yaa lɛfɔ kata fɔ ni lɛtɔtrɔ di nnɛɛ lɛfɔ ɔkpɛ ɔbla omuu kamɛ.