1 Nse SAATE Yaa lɛfɔ lɛkpaa fɔ ɛɛwako kasɔ ka suoto fababuo fanaayɔ ni, fantososa ni nnle kpinwu di anu lɛfɔ- Hiti batii, Girgasi batii, Amori batii, Kanaan batii, Perisi batii, Hiwi batii ku Yebusi batii, nnle nkuɛnsĩ nwu niemuɔ ni, bakpe ni osie kafɔɔ balenke fɔ ni yi- 2 ni nse SAATE Yaa lɛfɔ lɛyɔ ma eekpee fɔ ninnɛɛ fatoolenkee ma yi, ni dikpeni fɛɛwɔɔsa ma klekle. Tambla kanya ninii ku mma, tannya ma kafɔɔ nyaami. 3 Minko ma bitan-yɔ bawo. Tan-yɔ babisankobi lɛfɔ faata babisuɔtɔbi lɛma ee faakaalɛ babisankobi lɛma faata babisuɔtɔbi lɛfɔ baayɔ, 4 diekye babakyisa babisuɔtɔbi lee anu, mandiɛ mi otikanko, manaasumu bayaa bamba, ni ɔblɔ kamafiɛ SAATE nwu di suoto lee, anwɔɔsa ye wla. 5 Nnya lɛsaa le dikaatɛ biɛbla ma ni: Bibibiɛ oleɔta akyikye lɛma nwu, biɛkpakpaa afiɔtii lɛma nwu, biebudi Asera sewoso bitɛ kaasɔ, biefiɛ kafɔɔ afiɔ lɛma nwu di ɔtɔ kamɛ. 6 Diekye bile batii klekle biɛta SAATE Yaa lee. SAATE Yaa lɛfɔ niediki fɔ eekyeko batii nwu bamuu kamɛ di kasɔ suoto alɛ bibale nwɔ batii, lɛsaawɛ finle nɔɔ.

7 SAATE nwu ditayɔ lɛbɔmbɔ nɔɔ aadiki ye ta biapɔ kpinwu bialenke ni batii bule oso, diekye aye niale batii kafii bialenkee di batii bamuu kamɛ nɛ. 8 Kafɔɔ ta mmle di SAATE nwu labɔmbɔ ye ni, aabla di ntam be aaka aata ni bawa lee, ni aakpaa ye ku kɔnɛɛ nɔɔ osie, aadiki di sɛlanle kasɔ, di Egipte ɔka Farao nnɛɛ nɛ. 9 Nioso tofo falɛ SAATE Yaa lɛfɔ ninle Yaa; nnwɔɔ ninle onukwale Yaa nwu nɛ, ɔɔbla ni di kanya ninii nɔɔ lɛbɔmbɔ nwu anta ni ana nkpe be nimbɔmbɔ nwɔ, bakle ni afiofa nɔɔ. 10 Kafɔɔ

mba niekyidi nwɔ nii, abanaanfi ma kootoko di anu lɛma, manwɔɔ.

ɔlɔbaku nkpaa ku letoko naanfi di mba niekyidi nwɔ ni anu.

11 Nioso lolaa fanyu, faakyɛ di sisuku nwu, faaklee sɛsaabla nwu, faale kafɔɔ afiofa ya kɔta fɔ ni miɛ.

12 Nse biele afiofa ya mmle, bielolaa nya bietikanko, ni SAATE Yaa lee kamaklee kanya ninii lɛbɔmbɔ nɔɔ nwu ku aye, fɛ mmle aaka ntam aata ni bawa lee. 13 Ababɔmbɔ fɔ, anta fɔ lɛtɔtrɔ, anta fɔ fankpɛ fampɔɔsa. Abata lɛtɔtrɔ di olofofɔtɔ lɛfɔ babi ku kasɔ lɛfɔ alesaa- atita, nta fɔle ku nnɔnyi lɛfɔ- banankyue ku bafoso lɛfɔ abi suoto di kasɔ ka suoto di SAATE nwu laka ntam aata ni bawa lɛfɔ alɛ abata fɔ nii. 14 Abata fɔ lɛtɔtrɔ anlenkee batii biala; basuɔtɔ ee basanko lɛfɔ kuonwii dilɔbale ɔlɛma ee babɔkɛɛ sele lɛfɔ kuonwii dilɔbawɛ alɛ aalofo abi. 15 SAATE nwu kamatĩi ofiɛ biala osuku di suoto lɛfɔ. Ɔlɔbata sifiɛ kpile se faatofo ni di Egipte kasɔ sipɛ fɔ, kafɔɔ abayɔ sĩ ankpete di mba niekyidi fɔ ni suoto. 16 Dikpeni fɛɛwɔɔsa batii ba bamuu di SAATE Yaa lɛfɔ lɛyɔ eekpee fɔ ni ninnɛɛ. Tannya ma nyaami, tansumu bayaa lɛma kafɔɔ, diekye nni nimale dikyĩ ninta fɔ nɛ.

17 Biafuo obuɛ di situ lee kamɛ bilɛ, "Nnle be mmle nkpe osie balenke wo. Lɛ bubafuo ma otososa odiki?" 18 Kafɔɔ tanyɛkɛ ma; nyuma lɛsaa le di SAATE Yaa lɛfɔ labla ni ɔka Farao ku Egipte kasɔ kamuu. 19 Faanya ku anu lɛfɔ amu ɔsɔ onyu kplɛ nwu, atuosaa ya niabla ni ɔkpɛ ku anyasaa ya di SAATE Yaa lɛfɔ kɔnɛɛ osie ku kɔnɛɛ nɔɔ lɛnanfi le aayɔ aakpaa fɔ aadieko nii. SAATE Yaa lɛfɔ kamabla di akpanwu anta batii ba nfɛ fɔɔyɛkɛ ni kanunua. 20 Mia nwu kafɔɔ, SAATE Yaa lɛfɔ kamakyesee bayɛkɛkɛ kaamɛ lɛma, ninaase bia mba niebu bakpe ni nkpa beewofa fɔ ni kamakpi nii. 21 Bitanta difu lapɛ ye di suoto lɛma, diekye SAATE Yaa lee wɔ ninsi ye ni kaamɛ nle Yaa wɔ ninkpe ni osie baayɛkɛ nii. 22 SAATE Yaa lɛfɔ kamatososa nnle nwu andiki di anu lɛfɔ kɛɛkɛkɛɛkɛ. Blɔbata fɔ osuku fadiki bamuu lɛma kanya kanwii, nse diele nkpo ni lepoo kamɛ babɔkɛɛ kamadie di lɛpɔ kanya mammana fɔ mankyi. 23 Kafɔɔ SAATE Yaa lee nwu kamayɔ ma ankpee ye ninnɛɛ, abata kudú kplɛ mbuo ma kaamɛ, ninaase di obe wɔ babawɔɔ nii. 24 Abayɔ baka lɛma ankpee fɔ ninnɛɛ, fanyɛɛsa ayooto lɛma di kasɔ ka mmle suoto. Kuonwii dilɔbafuo ɔtaka oyila di suoto lɛfɔ; fabawɔɔsa bamuu lɛma. 25 Bifiɛ bayaa lɛma atembi nwu di ɔtɔ kamɛ. Bitanta koto fututu ku koto sɛɛle nwu di afiɔ lɛma suoto lasɛɛ ye anu, batan-yɔ nya kafɔɔ biabla ale ye, nse diele nkpo ni okũ wɔ bɛɛkyɔɔ ni mamufũ ye, diekye diyududusaa dile dita SAATE Yaa lee. 26 Tan-yɔ diyududusaa kuninwii faawako leyo lɛfɔ, se diele nkpo ni afɔ ku lɛsaa nwu bibawɔɔ. Bisĩ nya, biekyidi nya, diekye beediki nya bɛɛtɛ bɛɛta kawɔɔ.