1 Nse bɛɛnya otii lekpi ate di lepoo kamɛ di kasɔ ka di SAATE Yaa lee kɔyɔ anta ye ni alɛ biyɔ nii, manan-ye otii wɔ nielo nwɔ nii, 2 ni banɔɔfo ku bakantɛ lee bakyɛ baalaaklapoosa obo wɔ ninte ni di sekpoo se ninkaako ni ku kpi nwu ntɛɛ. 3 Ni okpoo wɔ niɛtɛɛtɛɛ ni kpi nwu nkpo kulenke ni banɔɔfo bayɔ nankyue-sanko dibi le manadiyɔ bablako ni ɔkpɛ ee bakpee ni simu owoso diidii 4 di banɔɔfo nwu basooko nankyue nwu basifiko ɔtaata wɔ manadikpɛ ni ee bakpee ni alesaa, di kaklenyii ka nikobiɛ kanfe ni. Baafee nankyue nwu simu di ɔtaata nwu ninfa. 5 Olebatatɛ, Lewi babisuɔtɔbi nwu bayilakaanya ninfa, diekye SAATE Yaa lee niediki ma alɛ basumu, baata lɛtɔtrɔ di SAATE nwu leyooto kamɛ, baabuɛ nlɔ ku nkpɛ sɛlaa simuu. 6 Di okpoo wɔ niɛtɛɛtɛɛ ni kpi nwu banɔɔfo bamuu bafoto nnɛɛ lɛma bakpete nankyue-sanko nwu beefee ni simu di ɔtaata nwu, 7 baabuɛ alɛ: "Diele awo niewii ntɔ be mmle, ee anu loo lɛnya mmle bɔɔbla nii. 8 Oo SAATE, fũ ɔyɔ ɔkyɛ asaa ya mmle fata batii lɛfɔ Israel ba feediki ni, tanlo batii lɛfɔ lɛpɔɔ di otii wɔ ninambla ni okpile ntɔ suoto." Ni ɔyɔ ɔkyɛ mawɛ di ntɔ nwu owii suoto. 9 Nioso bibadiki ntɔ be ninambla ni okpile di suoto lee, diekye bitɔɔbla lɛsaa le niesiɛko ni di SAATE nwu anu.

10 Nse fɛɛtaka kakpɛ di balo lɛfɔ suoto di SAATE Yaa lɛfɔ lɛyɔ ma eekpee fɔ ninnɛɛ, feemufũ ma yi, 11 fɛɛnya ɔsanko owo di mba feemufũ ni kamɛ, alɛ sekpeele ɔɔlɛ fɔ onyu yi, faafuo nwɔ ɔyɔ fɛ ɔsɔfɔ lɛfɔ. 12 Kpaa nwɔ fawako leyo lɛfɔ faata ɔsanko nwu aakpaasu disi nɔɔ, aatekete sɛnɛɛfɔɔ nɔɔ 13 aadiki akleesaa ya aaklee ni di obe wɔ baamufũ nwɔ ni atɛ. Nse atoosiɛ di leyo lɛfɔ, atoowi ote ku ɔya di kɔwɛntɛ kunwii kamɛ eeloo yi, nfɛ faafuo ɔkyɛ nɔɔ ɔkyɛ fanle nwɔ ɔsa nnwɔɔ kafɔɔ anle fɔ ɔsɔfɔ. 14 Nse aabuo fɔ anu, faatɔɔ asifi lɛba lele ninlɛ nwɔ ni. Diɛkaatɛ fansunsũ nwɔ ee fanklee nwɔ fɛ ɔlanle, ta fatootenko nwɔ ni oso.

15 Nse osuɔtɔ owo nkpe basɔfɔ banyɔ, ambɔmbɔ onwii anlenkee, di banyɔ nwu lelofo basuɔtɔbi bɛɛtɔɔ, kafɔɔ ɔsɔfɔ nɔɔ wɔ anambɔmbɔ ni lelofo kasale nle osuɔtɔbi yi, 16 ni nse ɔɔsɛ asaa nɔɔ anta babisuɔtɔbi nɔɔ yi, atan-yɔ dibite kalekɔ aata ɔsɔfɔ wɔ ambɔmbɔ ni obisuɔtɔbi, ayɔ ata dibite nɔɔ kasale nimu, ɔsɔfɔ wɔ anambɔmbɔ ni obisuɔtɔbi. 17 Dikpeni ɛɛyɔ dibu ɛɛta ɔsɔfɔ wɔ anambɔmbɔ ni obisuɔtɔbi fɛ dibite nɔɔ kasale, antɔɔ nlekɔ akyuu anyɔ di atesaa nɔɔ ya amuu ninkpe nwɔ ni kamɛ. Obisuɔtɔbi nwu nkpo ninle ote nwu sisuɔtɔ osie lɛblasaa kasale nɛ. Nioso dibite kalekɔ nle nwɔ kale.

18 Nse otii owo nkpe obisuɔtɔbi tokopĩtɛ ku nunsientɛ wɔ ninoobu ni ote ku ɔya, nse bɛɛfaa nwɔ anaanu ma ni ɔlaa yi, 19 ni ote ku ɔya bakpaa nwɔ bakyɛnko banɔɔfo nfũ di okpoo nwu bawo kalɛɛkɔ. 20 Baatɔkɔ banɔɔfo nwu alɛ, "Obisuɔtɔbi loo wɔ mmle nkpe otokopĩ ku onunsie. Oloonu wo ɔlaa. Ditiipɛ ku tanyintɛ ale." 21 Ni basuɔtɔ bamuu di okpoo nɔɔ nwu basafɔ nwɔ afuɔ balo. Dikpeni biediki dikpile nwu kamɛ lee. Ni Israel omuu kamanu ɔlaa nwu man-yɛkɛ.

22 Nse otii owo lekpi kukpi lɛpɔɔ beelo nwɔ, di kpi nɔɔ nwu nsaka di kowoso suoto yi, 23 tandiɛ kpi nɔɔ nwu lasaka di kowoso suoto kale kasɛ. Nyu falɛ feekookaa nwɔ di dii nkpo kale, diekye Yaa lɛkpaani ntika di otii lele bɛɛsaka di kowoso suoto. Tanlalaasa kasɔ ka di SAATE Yaa lɛfɔ kɔyɔ anta fɔ ni fɛ atesaa.