1 Tan-yɔ nankyue ee foso wɔ ninkpe ni kɔbɔ ee ɛɛkyɛlɛ ni faata oleɔta faata SAATE Yaa lɛfɔ, diekye diyududusaa dibale nintɔɔ.

2 Nse fɛɛnya osuɔtɔ ee ɔsanko owo ninsi ni di kamɛ lee di sekpoo se di SAATE nwu lɛta fɔ ni onwii kamɛ, kɔbla sikpile di SAATE Yaa lefɔ anu, ɛɛwaalɛ kanya ninii nɔɔ nwu yi, 3 eesĩ kufiofa nii nwu ɛɛlaasumu bayaa bamba, ɛɛwakasɔ ɛɛta ma, kufĩ ee kɔwɛntɛ ee awɛntrɛbi di kolo, 4 bɛɛta fɔ letofo, ni dikpeni feewolaa nwu kamɛ nwaa. Nse nwaako dile di kamɛ lɛkpa alɛ bɛɛbla diyududusaa le mmle di Israel kasɔ yi, 5 ni kpaa osuɔtɔ ee ɔsanko nwu niɛbla ni dikpilesaa le mmle fasifiko okpoo kplɛ lɛfɔ nwu lɛkpaka biɛsafɔ otii nwu afuɔ bilo. 6 Di kamaabayilatɛ banyɔ ee batiɛ kanya ɔlaa suoto fiɛ bielo otii nwu, kafɔɔ bitan-yɔ kamaayilatɛ onwii lete kanya ɔlaa bialo otii. 7 Kamaabayilatɛ nwu nnɛɛ ninkasa nwɔ afuɔ ɔsafɔ, fiɛ di batii bamuu nnɛɛ basafɔ nwɔ afuɔ aakpi. Dikpeni biediki dikpilesaa nwu di kamɛ lee.

8 Nse bɛɛwako sɛlaa se niesii ni osie di nkankɔ lɛfɔ alɛ ka- fɛle ntɔ owii, ɔlaa ɔsama ee kakpɛ ɔlaa yi- kpaa ma fasifiko lɛba le di SAATE Yaa lɛfɔ kamadiki antɛ ni. 9 Yɔ ɔlaa nwu fatɛ di olebatatɛ ba ninle ni Lewi batii ku kantɛ wɔ nin-yɛ ni kaanya di obe nwu nkpo kamɛ anu. Bababuɛ ɔlaa nwu mambudi nwu disi. 10 Dikpeni feediki kɔkpaa di mmle kanya bɛɛtɔkɔ fɔ ni di lɛba le di SAATE nwu kamadiki nii. Lolaa fanyu, faabla di lɛsaa biala bɛɛtɔkɔ fɔ alɛ bla ni kanya. 11 Tankyi faafe oletanɛɛkyɛ ee ɔmɛntukyɛ di ɔlaa wɔ bɛɛtɔkɔ fɔ nii. Diki kɔkpaa di kufiofa ko beetuo fɔ ni ku mmle beebudisa ni ɔlaa nwu nkpo kanya. 12 Dikpeni beelo otii wɔ ninambu ni kantɛ nwu ɔlaa ee oletatɛ wɔ nin-yɛ ɔɔka ni lɛka ninfa anta ni SAATE Yaa lɛfɔ ɔlaa. Dikpeni feediki dikpilesaa nwu di Israel. 13 Batii bamuu kamanu ɔlaa nwu man-yɛkɛ kafɔɔ, mandiɛ lɛsaa-tambu nwu okle.

14 Nse feebuo kasɔ ka di SAATE Yaa lɛfɔ kɔta fɔ ni, fatɔɔyɔ ka nfɛ fasi ninka suoto, feebuɛ falɛ, "Ta buse ɔka buta suoto fɛle nnle be niɛmana wo diekyi ni yi," 15 ni nyu falɛ feese ɔka wɔ di SAATE Yaa lɛfɔ kamadiki ni. Dikpeni ankye babilee-suɔtɔbi bamu kamɛ. Tanse ɔfɔɔ ɔka faata suoto, nnwɔ ninanle ni obilee-suɔtɔbi Israel otii omu. 16 Kafɔɔ diɛkaatɛ ɔka nwu n-wɛ bapɔnkɔ kpinwu ɛɛta suoto nɔɔ ee ata batii nwu lakple baasifi Egipte balaamiɛ ma bakyakaa, diekye SAATE nwu latɔkɔ ye alɛ, "Bitasinkple biasifi di osuku nwu suoto." 17 Diɛkaatɛ ɔka nwu n-yɔ basɔfɔ kpinwu, nse diele nkpo, otu nɔɔ kamayu osuku. Diɛkaatɛ an-wɛ koto fututu ku koto sɛɛle kpinwu.

18 Nse ɛɛbasiɛ di sɛka kalekɔ nɔɔ lɛkakpomii suoto yi, aase kufiofa ko mmle eefũ eekyeko ni Lewi batii ba ninle ni olebatatɛ ɔkyɛ lɛ̀kpana di kukũ suoto ata suoto nɔɔ. 19 Kukũ nwu kuwɛ di ɔkyɛ nɔɔ, aaka kũ di nkpa nɔɔ ayi amuu kamɛ, di mmle abatekete ni mmle aayɔ dibu anta ni SAATE Yaa nɔɔ, anlolaa afiofa nɔɔ ya mmle sɛlaa ku sisuku se mmle simuu antikanko ni nwaa. 20 Atannyu suoto nɔɔ alɛ ɛɛtaka katoo alenke babilɛma-suɔtɔbi, diata aakyi di kufiofa nwu suoto afe oletanɛɛkyɛ ee ɔmɛntukyɛ. Ni nnwɔɔ ku banantii nɔɔ kamale sɛka ninklɛ di sɛka kalekɔ nɔɔ nwu di Israel kasɔ suoto.