1 Bilolaa binyu biele kufiofa biala kɔta ye ni miɛ, di mmle biasiɛ ni nkpa, minlofo minkpɛ ni, alɛ biabuo minnayɔ ni kasɔ ka di SAATE nwu laka ntam aata ni bawa lee. 2 Nyuma mmle di SAATE Yaa lɛfɔ laleko fɔ ni katũ di ɔfaafuu osuku omuu ɔkyɛ kamɛ, alɛɛ afosi-ana ya mmle, alɛ ɔɔwakosa fɔ kasɔ, ansɔ fɔ an-nyu antofo lɛsaa le ninsi ni di otu lɛfɔ kamɛ, nse fabale nwɔ afiofa nwu ee, flɔbale. 3 Aawakosa fɔ kasɔ, diata kɔka laklee fɔ, ni aata fɔ mana wɔ di afɔ ee bate lɛfɔ dieye ni faale ni, alɛ ootuo fɔ alɛ diele alesaa lete oso di otii kasiɛ nkpa, kafɔɔ di ɔlaa biala niedie ni di SAATE nwu kanya. 4 Di alɛɛ afosi-ana ya mmle kamɛ yi, akleesaa ditabɛbɛɛ di suoto lɛfɔ, nkpaa lɛfɔ kafɔɔ ditafufu. 5 Ni tofo di otu lɛfɔ kamɛ falɛ, fɛ mmle di otii nnaanfi ni obi nɔɔ kootoko yi, nkpo di SAATE Yaa lɛfɔ kafɔɔ nnaanfi fɔ kootoko nɛ.

6 Le SAATE Yaa lɛfɔ afiofa nwu, faakyɛ di sisuku nɔɔ suoto, faayɛkɛ nwɔ kafɔɔ. 7 Diekye SAATE Yaa lɛfɔ kɔkpaa fɔ anwako kasɔ biene suoto- kasɔ nwu ku sekle ku ntu apanta ku ntu ntaakɔ diobiɛ ninfe ni di sɛtaata ku akpenkpe kamɛ; 8 kasɔ ka ku akpaa ku kamɔɔ, nta awosobi ku abue awoso, akpaloo, nnɔnyi awoso ku bablɔ; 9 kasɔ ka di alesaa kamawɛ nii, di lɛsalɛsaa dilɔbafĩ fɔ nii; kasɔ ka di afuɔnkpaa nɔɔ nle ni abɔɔsaa, fabakutu ni abɔɔsaa sɛɛle di akpenkpe nwu.

10 Nse fatoole feemiɛ yi, faatansa SAATE Yaa lɛfɔ ta kasɔ biene ka ɛɛta fɔ ni oso.

11 Lolaa fanyu falɛ faayee SAATE Yaa lɛfɔ, alɛ faasĩ afiofa nɔɔ ole, ɔkyɛ di sisuku nɔɔ ku sɛsaabla nɔɔ nwu kɔta fɔ ni di dii le mmle. 12 Nse diele nkpo, feele feemiɛ, feetofo ayo biene feesiɛ kaamɛ, 13 di banankyue ku babɔkɛɛ sele lɛfɔ lɛlɛɛsa, di koto fututu ku koto sɛɛle lɛfɔ lɛbapɔ, di asaa ya ninkpe fɔ ni amuu lɛbakpɛ ɛɛkyakaa, 14 di otu lɛfɔ lɛbatakatɛsa suoto katoo, fɛɛbayee SAATE Yaa lɛfɔ wɔ niakpaa fɔ aadieko ni di Egipte, aakyeko ni sɛlanle kasɔ nwu suoto. 15 Nnwɔɔ nialeko fɔ katũ aafenko di difu ɔfaafuu foo kamɛ, otukɔnsɔ kasɔ ka di ntu ditawɛ ni, ku asaanwu kpile ku nkpakana lawɛ nii. Aata fɔ ntu diakye ni difuɔnkpaa siene kamɛ. 16 Aata fɔ mana faale di ɔfaafuu nwu, alesaa ya di bate lee ditatofo ni diidii, alɛ ɔɔwakosa fɔ kasɔ, ansɔ fɔ kafɔɔ annyu, di mmle dialɛ ninta fɔ ni di kayɛntɛkɔ. 17 Faafuo obuɛ di otu lɛfɔ kamɛ falɛ, "Osie nii ku kɔnyaabe nii niɛtɛɛ lɛsaawɛ le mmle nɛ." 18 Kafɔɔ nyuma SAATE Yaa lɛfɔ, diekye nnwɔɔ ninle nnwɔ ninta fɔ ni osie fan-wɛ ni lɛsaawɛ nwu nɛ. Nioso alɛ ootika difuɔ di kanya ninii nɔɔ le aaka ntam aata ni bawa lɛfɔ, fɛ mmle dite ni miɛ.

19 Nse nwaako feeyee SAATE Yaa lɛfɔ, feetikanko bayaa bamba, feesumu ma, feewakosa suoto kasɔ fɛɛta ma, nwaako kɔta ye mintofo miɛ nlɛ, nwaako bibawɔɔ. 20 Fɛle mmle di SAATE nwu lawɔɔsa ni nnle nwu di anu lee yi, nkpo babawɔɔsa ye ta biɛɛkyɔɔ ni SAATE Yaa lee atoko oso nɛ.