1 Nse lɛtɔtrɔ ku lɛkpaani le nimuu lɛyɔ lɛtɛ fɔ ni di anu lɛwa fɔ di suoto, feemufũ nya feekpee di otu, di lɛba lele di SAATE Yaa lɛfɔ lɛtɛ fɔ di nnle nwu kamɛ yi, 2 di afɔ ku babi lɛfɔ biekple biɛwa SAATE Yaa lee ɔkyɛ, biɛkyɔɔ nwɔ ɔlaa atoko ku situ lee simuu ku sɛkla lee simuu di lɛsaa biala lɛtɔkɔ ye ni miɛ yi, 3 ni SAATE Yaa lɛfɔ kamanya fɔ nyaami ankplesa lɛlɛ lɛfɔ anta fɔ, ankple ansiisa ye ankyeko nnle be mmuu kamɛ ɛɛsamiisa ye eekpee nii. 4 Nse bia kasɔ fanfa suoto di kolo kalɔ bɛɛkpaa ye beesifiko yi, SAATE Yaa lee kamasiisa ye ankplesa ye anwako. 5 SAATE nwu kamakpaa ye anwako kasɔ ka ninle ni bate lee kale, minaayɔ ka. Abata ninlɛ ye ninkyakaa, mimpɔ̀ minlenkee bate lee. 6 SAATE Yaa lee nwu kamakyisa aye ku banantii lee situ, di mmle biabɔmbɔ nwɔ ni ku situ lee simuu ku sɛkla lee simuu minsiɛ ni nkpa. 7 SAATE Yaa lee nwu kamayɔ akpaani nwu amuu antika di balo lee ba niekyidi ye bɔɔkpɛko ye ni suoto. 8 Bibakple minkyɔɔ SAATE nwu ɔlaa atoko, mintikanko afiofa nɔɔ nwu amuu kɔyɔ nta ye ni miɛ. 9 Ni SAATE Yaa lɛfɔ nwu kamata lɛlɛ ntɛ ninlɛ fɔ di nnɛɛ lɛfɔ ɔkpɛ omuu kamɛ ku olofo-fɔtɔ lɛfɔ babi, babɔkɛɛ sele lɛfɔ abi ku kasɔ lɛfɔ alesaa. Suoto kamakple sinyɔɔ SAATE nwu di suoto lɛfɔ anta ninlɛ fɔ, fɛ mmle okle di suoto layɔɔ nwɔ ni di bate lɛfɔ suoto, 10 nse fɛɛkyɔɔ SAATE Yaa lɛfɔ ɔlaa atoko, feeklee afiofa nɔɔ, fɛɛkyɛ di sisuku nɔɔ se bɛɛkpani ni di Kufiofa Kukũ ko mmle kamɛ, feemunikĩi fɛɛwa SAATE Yaa lɛfɔ ɔkyɛ ku otu lɛfɔ omuu ku ɔkla lɛfɔ omuu.

11 Kanunua kufiofa ko kokpee fɔ ni miɛ diesii fɔ osie ee kukyo di ɔkyɛ lɛfɔ. 12 Diele osi kaatoo kukpe alɛ faakaalɛ falɛ, "Owe nimakata ankyɛ osi nwu anaayɔ amayie kũ lɛkya anta wo alɛ buakyɔɔ kũ atoko?" 13 Ee kukpe di lekpo sɛmaa, alɛ faakaalɛ falɛ, "Owe nimataalɛ lekpo nwu anaayɔ kũ amayie lɛkya anta wo alɛ buakyɔɔ kũ atoko?" 14 Oowo, ɔlaa nwu ntɔɔtɛɛtɛɛ fɔ nwaa; nfɛ kusi fɔ kaanya ku otu lɛfɔ kamɛ nioso faafuo nwu atoko ɔkyɔɔ.

15 Nyu, lɛyɔ nkpa ku lɛlɛ, kukpi ku kawɔɔ lɛtɛ fɔ di anu miɛ. 16 Diekye kɔtɔkɔ fɔ miɛ nlɛ bɔmbɔ SAATE Yaa lɛfɔ, faakyɛ di sisuku nɔɔ, faaklee asaa otuo nɔɔ, ablasaa ku afiofa nɔɔ; ni fabasiɛ nkpa fanlofo fanse fansaa fanse, ni SAATE Yaa lɛfɔ kamata fɔ lɛtɔtrɔ di kasɔ ka foobuo fanaayɔ ni suoto.

17 Kafɔɔ nse otu lɛfɔ lemunukĩi, fanankyɔɔ kotoko, ni nse feesifi fɛɛlaawakasɔ fɛɛta bayaa bamba feesumu ma yi, 18 ni kɔtɔkɔ fɔ miɛ nlɛ, nwaako babawɔɔsa fɔ. Flɔbasiɛ nkpa faklɛ di kasɔ ka fɔɔtaalɛ Yordan Okle fambuo fanaayɔ ni suoto.

19 Miɛ dii le mmle lɛlɛɛ osi ku kasɔ fɛ kamaabayilatɛ di suoto lɛfɔ nlɛ, lɛyɔ nkpa ku kukpi, lɛtɔtrɔ ku lɛkpaani lɛtɛ fɔ di anu. Nioso nunua diki nkpa, di mmle di afɔ ku babi lɛfɔ kasiɛ ni nkpa, 20 alɛ faabɔmbɔ ni SAATE Yaa lɛfɔ, fan-nu ni ɔlaa nɔɔ, famufũ nwɔ fanklee ni kpinkpĩ. Diekye SAATE nwu ninle fɔ nkpa, nnwɔɔ nimata fɔ alɛɛ kpinwu di kasɔ ka suoto aaka ntam aata ni bate lɛfɔ Abraham, Isak ku Yakob nɛ.