1 Semaa, buamunikĩi buakata buafe di osuku buakyɔɔ anu Basan, ni di Basan ɔka Og ku bakpɛtɛ nɔɔ bamuu ladie babakyakako wo ku kakpɛ di Edrei nɛ. 2 Ni di SAATE nwu latɔkɔ mi alɛ, "Tanyɛkɛ nwɔ, diekye ntɔɔyɔ nwɔ ku bakpɛtɛ nɔɔ bamuu ku kasɔ nɔɔ lekpee ninnɛɛ lɛfɔ. Bla nwɔ fɛ mmle faabla ni Amori batii ɔka Sihon wɔ niale ni sɛka di Hesbon."

3 Nioso SAATE Yaa loo layɔ Basan ɔka Og ku bakpɛtɛ nɔɔ bamuu kafɔɔ aakpee ninnɛɛ loo. Bualo bamuu lɛma, kuonwii ditabu aasiɛ nkpa. 4 Di obe nwu kamɛ buafũ sekpoo kplɛ nɔɔ nwu simuu. Sekpoo kplɛ afosi-akuɔ nwu kuonwii ditabu alɛ butafũ ni di ɔkyɛ lɛma- Argob kasɔ kamuu, Basan ɔka Og sɛka kalekɔ. 5 Baatofo seyoyiɛ takale ku n-yoko ku abɔɔsaa baakyisa sekpoo kplɛ se mmle simuu, sekpoenyii siene kpinwu lawɛ batatofo seyoyiɛ baakyisa nii. 6 Buawɔɔsa simuu klekle, fɛ mmle buabla ni Hesbon ɔka Sihon, baawɔɔsa okpoo kplɛ biala- basuɔtɔ, basanko ku babisɔ. 7 Kafɔɔ babɔkɛɛ sele bamuu ku kakpɛ kamɛ asaa di sekpoo kplɛ lɛma yi, nnya buayɔ nya buata suoto loo.

8 Nioso di obe nwu kamɛ buafũ kasɔ ka di Yordan kufĩ katunkɔ di Amori batii baka ba mmle nnɛɛ, diayɔ ni di Arnon Okplo kyofole dialaadu Hermon Kobokote. 9 (Sidon batii nlɛɛ Hermon Kobokote alɛ Sirion; Amori batii nlɛɛ kũ Senir.) 10 Buafũ sekpoo se simuu di abokote nsintɛɛ, ku Gilead omuu ku Basan omuu dialaadu Salka ku Edrei, Og sɛka kalekɔ okpoo di Basan. 11 (Basan ɔka Og lete niabu di Refait batii nwu yɛntɛle kamɛ. Abɔɔsaa baayɔ baabla mpa nɔɔ, lɛkaana lalenkee lefosi nkpaa ntiɛ, lɛblɛfɛ kafɔɔ labla nkpaa nkuɔ. Diekple diyɛ di Amon batii okpoo wɔ bɔɔlɛɛ ni Raba.)

12 Di kasɔ ka buafũ ni di obe nwu kamɛ yi, layɔ kasɔ ka di Aroer katoo-kasɔ di Arnon Okplo kyofole ɔlɔɔkɔ lata Ruben batii ku Gad batii, di Gilead lekpenkpe kale nwu kakyɛ ku sɛkpoo nɔɔ nkyakaa nii. 13 Layɔ Gilead kasɔ bule ku Basan omuu niale ni Og sɛka kalekɔ nwu kafɔɔ lata Manase kɔna nwu kakyɛ. (Argob kasɔ nwu kamuu di Basan baatɔɔlɛɛ alɛ Refait batii kasɔ nɛ. 14 Manase ɔnantii onwii bɔɔlɛɛ ni Yair, layɔ Argob kasɔ nwu kamuu dialaase di Gesur batii ku Maakat batii kɔmɛ; ni baayɔ leyooto nɔɔ baatika lɛba nwu nɛ. Nioso diɛbase bia miɛ Hawot Yair nfɛ bɔɔlɛɛ Basan.) 15 Ni layɔ Gilead kasɔ lata Makir nɛ. 16 Kafɔɔ layɔ kasɔ ka niadie ni di Gilead kaasifi ni Arnon Okplo kyofole nwu lata Ruben batii ku Gad batii (Okplo kyofole nwu ntɛɛ ninle kɔmɛ nɛ) kuadie kualaadu Yabok Okle ninle ni Amon batii kɔmɛ. 17 Kufĩ kamɛɛkɔ kɔmɛ niale Yordan di Araba, kuayɔ di Kineret kualaadu Araba Lekpo (Mmba Lekpo nɛ), Pisga kobokote lɛyɔnsa kalɔ.

18 Ninfɛ latɔkɔ ye di obe nwu kamɛ nlɛ: "SAATE Yaa lee ntɔɔta ye kasɔ ka mmle alɛ biyɔ bibla kale ye. Kafɔɔ basuɔtɔ basientɛ lee bamuu bayɔ akpɛsaa baataalɛ Yordan Okle baale babilee-suɔtɔbi Israel batii katũ. 19 Kafɔɔ basɔfɔ lee, babi lee ku babɔkɛɛ sele lee (n-ye nlɛ bikpe babɔkɛɛ sele kpinwu) mma bawɛ di sekpoo se ntɔɔta ye ni kamɛ, 20 dilaase di obe wɔ di SAATE kamata ni babilee-suɔtɔbi ɔnyɛɛ ɔtɛ fɛ mmle ɛɛbla ɛɛta ye ni, alɛ mma kafɔɔ baayɔ kasɔ ka di SAATE Yaa lee kɔyɔ anta ma ni di Yordan Okle sɛmaa. Nni kamaa, obiala lee akple asifi kalekɔ ka ntɔɔta ye ni."

21 Di obe nwu nkpo kamɛ latɔkɔ Yosua nlɛ: "Fatɔɔnya ku anu lɛfɔ amu asaa ya amuu di SAATE Yaa loo ntɔɔbla ni baka ba mmle banyɔ. SAATE nwu kamabla nkpo okle di sɛka nlekɔ mmuu di nfũ biofe nii. 22 Bitanyɛkɛ ma; SAATE Yaa lee omu kamakpɛ anta ye."

23 Di obe nwu nkpo kamɛ latikiti SAATE lekoto nlɛ: 24 "Oo SAATE Kplɛ, fatookye kasɔ footuo kpɛmblatɛ lɛfɔ nimuɔ kplɛ lɛfɔ ku kɔnɛɛ lɛfɔ osie. Diekye ɔmɛ yaa ninkpe di osi ee kasɔ suoto abafuo ni sɛsaabla ku sɛkpɛ kplɛ se fɔɔbla ni ɔbla? 25 Tɛɛ nkyɛ ninaanyu kasɔ biene nwu di Yordan sɛmaa- lekpenkpe kale biene nwu nkpo ku Lebanon."

26 Kafɔɔ ta aye oso SAATE nwu lanya ɔblɔ aakpeekoe, ni atanu mi ɔlaa nɛ. Ni di SAATE nwu labuɛ alɛ, "Nninkpo mpɔ, tansinkple faakakatɛkoe di ɔlaa wɔ mmle suoto. 27 Kata fakyɛ Pisga Kobokote osi, faanyu kufĩ-kamɛɛkɔ ku katoo-kasɔ ku kala-kasɔ ku kufĩ-katunkɔ. Nyu kasɔ nwu ku anu lɛfɔ amu, diekye flɔbataalɛ Yordan Okle wɔ mmle. 28 Kafɔɔ yɔ ɔkpɛ fakpee di Yosua nnɛɛ, faakpee nwɔ osie, faakpee nwɔ kafɔɔ ɔnyɛɛ, diekye nnwɔɔ nimaleko batii ba mmle katũ mantaalɛ, anta ma manaale kasɔ ka fabanya ni nɛ." 29 Nioso buasiɛ di ɔtaata di Bet Peor ɔlɔɔkɔ.