1 Nse SAATE Yaa lɛfɔ ntɔɔwɔɔsa nnle be kasɔ ka ɔɔyɔ anta fɔ nii, nse fatootososa ma kafɔɔ feediki, nfɛ fasi di sekpoo ku ayo lɛma kamɛ yi, 2 faadiki eekpoo kplɛ etiɛ di kasɔ ka di SAATE Yaa lɛfɔ kɔyɔ anta fɔ alɛ yɔ ni. 3 Diki sisuku fata sĩ, faasɛ kasɔ nwu di SAATE Yaa lɛfɔ kɔyɔ anta fɔ ni fɛ atesaa, di akyuu atiɛ, alɛ nse otii owo lelo otii katoso ansifi ni nfa.

4 Nle mmle ninle kufiofa di otii wɔ nielo ni owo nɔɔ katoso ansifi anaafũ ni nkpa nɔɔ nɛ- otii wɔ nielo ni owo nɔɔ ninaanle ɔtɛ ɛɛtɛ nii, ninanle alɛ osi asi nwɔ ni oso. 5 Yɔ falɛ, otii lɛkyɛ lepoo ku owo nɔɔ alɛ ɔɔlaabudi kowoso, ni ɔɔnwanyi ni kafɛ nɔɔ alɛ oobudi ni kowoso nwu, kafɛ lɛbɔkɔtɛ kɛɛlaapɛ owo nɔɔ nwu eekpi. Ni otii lotɛ nwu kafuo otoso osifi sekpoo se mmle nkpo onwii kamɛ anaafũ nkpa nɔɔ. 6 Nse diele nkpo, di lɛkɔ lɛtɛ diekyo, di otii-saate leti nwɔ ɛɛlaawɛ nwɔ yi, abalo nwɔ, nu ninankaatɛ alɛ eelo nwɔ ni fiɛ, diekye diele osi di otii wɔ beelo ni nsi nwɔ ni oso diɛwa ninkpo. 7 Nle mmle oso lɛtɔkɔ fɔ nlɛ diki ekpoo etiɛ fatɛ fata suoto lɛfɔ nɛ.

8 Nse SAATE Yaa lɛfɔ lɛta kasɔ nwu lɛblɛfɛ kɛɛkyakaa, fɛ mmle aaka ntam aata ni bawa lɛfɔ, ɛɛta fɔ kasɔ nwu kamuu aabuɛ aatɛ aata ma nii, 9 ta feelolaa afiofa ya mmle amuu lɛtɔkɔ fɔ ni miɛ feetikanko ni- fɛɛbɔmbɔ ni SAATE Yaa lɛfɔ, fɛɛkyɛ ni di sisuku nɔɔ obe lele oso yi- ni dikpeni feediki ekpoo kplɛ etiɛ bamba fɛɛkyakaa di etiɛ kasale nwu suoto. 10 Bibla nkpo, di mmle manamawii ni ntɔ be ninambla ni okpile di kasɔ lɛfɔ ka di SAATE Yaa lɛfɔ kɔyɔ anta fɔ ni fɛ atesaa lɛfɔ suoto, di mmle fanamakpi ni lɛpɔɔ di ntɔ owii suoto.

11 Kafɔɔ nse otii lekyidi owo nɔɔ ɛɛtɛ nwɔ kala, ɛɛpɛ nwɔ eelo, eetoso eesifi sekpoo kplɛ se mmle onwii yi, 12 ni okpoo nɔɔ nwu banɔɔfo bakpee batii baalaakpaa otii lotɛ nwu nkpo di okpoo kplɛ nwu baakpleko bawako, baayɔ nwɔ bakpee di otii wɔ eelo ni otii-saate nnɛɛ, aalo nwɔ. 13 Bitan-nyɔɔ nyaami saa. Dikpeni biediki otii kpile wɔ niewii ni ntɔ be ninambla ni okpile di Israel batii kamɛ, di mmle dibalɛ ninta ye nii.

14 Tankpa owo lɛfɔ lɛmɛke le di bawa lɛfɔ lase ni di atesaa ya feefũ ni di kasɔ nwu di SAATE Yaa lɛfɔ kɔyɔ anta fɔ alɛ siɛ nii.

15 Kamaayilatɛ onwii diɛpɔ ata alɛ baalo ni otii lɛpɔɔ di nnwɔ boonyu alɛ ɛɛbla ni okpile ee ɛɛlalaasaa ni lɛsaa. Dikaatɛ alɛ beenu kamaabayilatɛ banyɔ ee batiɛ kanya ɔlaa fiɛ beefũ nwu beekpee.

16 Nse laatɛ ku funutɛ leyila alɛ ɔɔyɔ ɔlaa antika di otii suoto yi, 17 ni batii nwu banyɔ nikɔnaanfi ni ɔlaa bayila di SAATE nwu anu di olebatatɛ ku bakantɛ ba nin-yɛ ni kaanya di obe nwu nkpo kamɛ katũ. 18 Dikpeni bakantɛ nwu lewolaa ɔlaa nwu kamɛ nwaa, ni nse bɛɛnya alɛ kamaayilatɛ nwu laatɛ ale, ɛɛbalaa sɛlaa eetika di owo nɔɔ suoto yi, 19 ni biyɔ lɛsaa le ɛɛtɛ alɛ ababla ni owo nɔɔ nwu bibla nwɔ. Dikpeni biediki dikpile nwu kaamɛ lee. 20 Batii bule kamanu ɔlaa wɔ mmle manyɛkɛ, ni diidii blɔbasinkple babla lɛsaa kpile le mmle nwu okle di kamɛ lee. 21 Bitannya kuonwii nyaami: nkpa di nkpa disi, ninu di ninu disi, lɛnyɛɛ di lɛnyɛɛ disi, kɔnɛɛ di kɔnɛɛ disi, kɔkpaa di kɔkpaa disi.