1 Otii lele ataabi beebiɛ ee sisiɔtɔ beebudi ni kakuu nnaa osuku ambuo SAATE nwu kasiisakɔ.

2 Otii lele beelofo ale ɔsɔnɔbi ee banantii nɔɔ kuonwii atambuo SAATE nwu kasiisakɔ, bia diɛlaase ni di kɔna fosile.

3 Amon otii ee Moab otii kuonwii ee banantii lɛma kuonwii atambuo SAATE nwu kasiisakɔ, bia diɛlaase ni di kɔna fosile. 4 Diekye batawa baabata ye alesaa ku ntu di osuku lee ɔkyɛ kamɛ di obe wɔ biadie ni di Egipte. Ni baayɔ Beor obisuɔtɔbi Bileam wɔ niakye ni Petor di Mesopotamia alɛ abakpaani ye nɛ. 5 Kafɔɔ SAATE Yaa lee ditanu Bileam ɔlaa, kafɔɔ aamunikĩisa lɛkpaani nwu aabla lɛtɔtrɔ aata ye. Diekye SAATE Yaa lee mbɔmbɔ ye. 6 Bitambla basiɛwo kanya ninii ku mma, di obe wɔ bisi ni nkpa.

7 Bitankyidi Edom otii kuonwii, diekye babilee bale. Bitankyidi Egipte otii kuonwii, diekye biasiɛ di kale nɔɔ fɛ ɔfɔɔ. 8 Edom batii ku Egipte batii kɔna tiɛfa lelofo babi ba beelofo bɛɛta ma ni kafuo SAATE nwu kasiisakɔ kamɛ obuo.

9 Nse biesi di kasiɛkɔ lee, biɛtaka kakpɛ di balo lee suoto yi, biblasa suoto di lɛsaa biala ninambla ni klekle suoto. 10 Nse osuɔtɔ lee owo lɛsɛ kɔlaafɔ eesoosa alombi ku kakyɛ yi, ni suoto nɔɔ diɛbla klekle, nioso adie asifi kasiɛkɔ nwu sɛmaa aalaasiɛ ninfa. 11 Kafɔɔ nse kɔtɔɔfɔ nfɛ kowo aakpe ntu, aakple awa kasiɛkɔ nwu kamɛ nse kufĩ ntɔɔmɛɛ.

12 Bidiki lɛba di kasiɛkɔ nwu sɛmaa, di nfũ di otii kakyɛ ni okpo. 13 Biklee lɛsaa le biakutu ni kasɔ bikyakaa di akpɛsaa lee suoto, alɛ nse biɛkyɛ okpo bieloo, biayɔ minkutu kɔtɛ mintĩi mmbi lee nwu. 14 Diekye SAATE Yaa lee nkyɛ antookyi kasiɛkɔ lee nwu antoonyu ye, anta ye minlenkee balo lee. Nioso dikpeni kasiɛkɔ lee nwu mbla klekle, ta mmle anamanya ni diyududusaa kuninwii di kamɛ lee ditɔɔ akple asifi adiɛ ye nii.

15 Nse ɔlanle letoso ɛɛbataniko ye yi, bitankplesa nwɔ biata saate nɔɔ. 16 Bitɔɔ asiɛ di kamɛ lee di kakɔ lele ninlɛ nwɔ di okpoo lele ninkaatɛko nwɔ ni. Bitambla nwɔ amumu.

17 Israel osuɔtɔ ee ɔsanko kuonwii antanle kafiofa sɔnɔkpeetɛ. 18 Bitan-yɔ ɔsanko sɔnɔkpeetɛ ee osuɔtɔ sɔnɔkpeetɛ koto ko ɛɛwɛ ni di lɛsɔnɔkpee kamɛ aawako SAATE Yaa lee leyo aabata koto lele eebuɛ ɛɛtɛ alɛ abata nii, diekye SAATE Yaa lee lekyidi akyuu nwu anyɔ.

19 Tantikasa lɛsaa faata obilee, kuntɛ koto ee alesaa ee lɛsaa lele fɛɛfɛnsa nwɔ dikaatɛ feetiksa lɛsaa fɛɛtɔɔ nii. 20 Faafuo lɛsaa otikasa ɔta ɔfɔɔ, kafɔɔ diele obilee Israel otii, di mmle di SAATE Yaa lɛfɔ kata fɔ ni lɛtɔtrɔ di lɛsaa biala di kɔnɛɛ lɛfɔ lɛkpanko ni di kasɔ ka foobuo fanaayɔ ni suoto.

21 Nse feebuɛ fɛɛtɛ falɛ fabata SAATE Yaa lɛfɔ lɛsaa yi, tanku-nkpaa ku lɛsaa nwu ɔta, diekye nwaako SAATE Yaa lɛfɔ kamatufu lɛsaa nwu aankyeko ɔkyɛ lɛfɔ, ni fabakpi lɛpɔɔ di okpile suoto. 22 Kafɔɔ nse fatabuɛ fatɛ falɛ fabata lɛsaa yi, ni flɔbakpi lɛpɔɔ di okpile suoto. 23 Lɛsaa lele di anyasibi lɛfɔ lɛbɛ eebuɛ yi, nyu falɛ dikpeni fɛɛbla, diekye kanya lɛfɔ fukuti feebuɛ fɛɛtɛ SAATE Yaa lɛfɔ.

24 Nse feebuo owo lɛfɔ awosobi kofe kamɛ, faafuo awosobi ya amuu foomiɛ ni ole, kafɔɔ tan-yɔ kuninwii faakpee di letoo lɛfɔ faasifiko. 25 Nse feebuo owo lɛfɔ atita kofe kamɛ yi, faafuo atita ofee ku nnɛɛ lɛfɔ owee, kafɔɔ tan-yɔ kɔpa faablɛ atitita nwu nin-yɛ nii.