1 Olebatatɛ ba ninle ni Lewi batii- nwaako Lewi kɔna kumuu- banaa kalekɔ ee atesaa ku Israel batii. Asaaɔta ya bɛɛta ni SAATE nwu ku ɔtɔ suoto babasiɛ nkpa, diekye nnya ninle atesaa lɛma nɛ. 2 Blɔbawɛ atesaa kuanwii di babilɛma kamɛ; SAATE nwu ninle atesaa lɛma, fɛ mmle aabuɛ aatɛ aata ma nii.

3 Nnya kalekɔ ka di olebatatɛ mafũ mankyeko ni batii ba niɛta ni nankyue-suɔtɔ ku foso oleɔta nfũ: kɔnɛɛ, kayɛɛ ku ayɔɔsaa. 4 Yɔ kofe lɛfɔ alesaa kasale, sɛlɔɔtu, nnɔnyi fɔle ku foso lɛfɔ kukũ kasale beediki ni fata ma, 5 diekye SAATE Yaa lɛfɔ niediki ma ku banantii lɛma di ana lee nwu amuu kamɛ alɛ bayila baasumu di SAATE nwu leyooto kamɛ obe lele.

6 Nse Lewi otii ledie di sekpoo lee onwii kamɛ di kakɔ lele di Israel di nfũ asi nii, ɛɛwa ku otu nɔɔ omuu di lɛba le di SAATE nwu kamadiki nii yi, 7 ni aafuo osumu di SAATE Yaa nɔɔ leyooto kamɛ fɛle mmle di Lewi batii wo nɔɔ bamuu kosumu ni ninfa di SAATE nwu anu. 8 Nnwɔɔ kafɔɔ batɔɔ asaa nwu bɛɛwɛ ni kyɛkyɛ, kuntɛ atoofũ koto eekyeko leyo lɛma kamɛ asaa osunsũ kamɛ.

9 Nse feebuo kasɔ ka di SAATE Yaa lɛfɔ kɔyɔ anta fɔ nii yi, tannyunko nnle nwu nkpo ninfa ayududusaa ya bɔɔbla nii. 10 Bitanta baanya alɛ onwii di kamɛ lee lɛyɔ obisuɔtɔbi ee obisankobi nɔɔ ɛɛta oleɔta di ɔtɔ kamɛ, mankaalɛ ni asaa, sɛbɔ-ɔpɛ ee asaa ɔnya kasɔ odiki, sɛsɛɛ, 11 ee afasaa ee kabia ee fablatɛ ee nnwɔ ninkpa ni bakpi. 12 Olele nimbla asaa ya mmle okle, lɛbla diyududusaa ɛɛta SAATE nwu, ta ayududusaa ya mmle ɔbla kafɔɔ oso di SAATE Yaa lɛfɔ kamatososa nnle nwu nkpo di anu lɛfɔ nɛ. 13 Tanta olè kuonwii lawɛ fɔ di suoto di SAATE Yaa lɛfɔ anu.

14 Nnle be foofe ni otososa lefũ sɛbɔ ɔpɛ ku asaa ɔkaalɛ beenu. Kafɔɔ afɔ SAATE Yaa lɛfɔ diɛta fɔ osuku alɛ bla nkpo. 15 SAATE Yaa lɛfɔ kamadiki Yaa ɔlaabuɛtɛtɛ di babilee suɔtɔbi kamɛ fɛle ami Mose okle anta ye. Nioso binu nwɔ ɔlaa. 16 Diekye nle mmle biakaalɛ SAATE Yaa lee di Horeb Kobokote nɛ, di dii le biasi ni dikudi biabuɛ ni bilɛ, "Tansinta wo buanu SAATE Yaa loo sɛlɔ ee buakple buanya ɔtɔ kplɛ wɔ mmle diidii, nse diele nkpo bubakpi."

17 Ni di SAATE nwu latɔkɔ mi alɛ: "Ɔlaa wɔ beebuɛ ni nlɛ. 18 Kamadiki Yaa ɔlaabuɛtɛtɛ fɛle afɔ okle di babilɛma-suɔtɔbi kamɛ nta ma; kamayɔ sɛlaa nii nkpee nwɔ kaanya, nnwɔɔ kafɔɔ abatɔkɔ ma lɛsaa biala lɛtɔkɔ nwɔ nii. 19 Nse otii lele ninankyɔɔ atoko di sɛlaa nii se di Yaa ɔlaabuɛtɛtɛ nwu kobuɛ ni di leyooto nii kamɛ yi, ni ami omu kamananfi nwɔ kootoko. 20 Kafɔɔ Yaa ɔlaabuɛtɛtɛ wɔ niekũ ɛɛkakatɛ ni di leyooto nii kamɛ, eebuɛ ɔlaa lele ninantɔkɔ nwɔ nlɛ abuɛ nii, ee Yaa ɔlaabuɛtɛtɛ wɔ niɛkakatɛ ni di bayaa bamba leyooto kamɛ yi, dikpeni beelo nwɔ."

21 Biafuo obuɛ di situ lee kamɛ bilɛ, "Lɛ bubafuo otofo bulɛ diele SAATE nwu niɛbuɛ ɔlaa nwu?" 22 Nse ɔlaa wɔ di Yaa ɔlaabuɛtɛtɛ kobuɛ ni di SAATE nwu leyooto kamɛ diɛwa kaanya ee diele nwaako yi, ni nnwu ninle ɔlaa wɔ di SAATE nwu diebuɛ ni nɛ. Ni Yaa ɔlaabuɛtɛtɛ nwu niakũ aabuɛ nwu nɛ. Nioso bitanyɛkɛ nwɔ.