1 Ninfɛ di Mose ladie aalaakakatɛ sɛlaa se mmle aata Israel batii bamuu alɛ: 2 "Kanunua ntoobe lefũ alɛɛ kɔlafa-afosi-anyɔ, namasinfuo ye katũ oleko. SAATE nwu lɛtɔkɔ mi alɛ, ‘Flɔbawaalɛ Yordan Okle nwu.’ 3 SAATE Yaa lee omu kamale ye katũ anwaalɛ. Abawɔɔsa nnle be mmle di anu lee, minaayɔ kasɔ lɛma. Yosua kafɔɔ kamale ye katũ anwaalɛ, fɛ mmle di SAATE nwu labuɛ nii. 4 SAATE nwu kafɔɔ kamabla ma lɛsaa le okle aabla ni Amori batii baka Sihon ku Og ba aawɔɔsa ni ku kasɔ lɛma. 5 SAATE nwu kamayɔ ma ankpee ye ninnɛɛ, dikpeni biɛbla ma nle nimuu lɛtɔkɔ ye nii. 6 Biwɛ osie, biɛwɛ sɛkambi kafɔɔ. Bitanyɛka ee difu lapɛ ye ta mma oso, diekye SAATE Yaa lee nkyɛ ku aye; ɔlɔbadiɛ ye ee asĩ ye diidii."

7 Ninfɛ di Mose lalɛɛ Yosua di Israel batii bamuu anu aatɔkɔ nwɔ alɛ, "Wɛ osie faawɛ sɛkambi kafɔɔ, diekye dikpeni fɛɛkyɛ ku batii ba mmle biebuo kasɔ ka di SAATE nwu laka ntam aata ni bawa lɛma alɛ abayɔ anta ma nii, dikpeni fɛɛyɔ ka fɛɛsɛ fɛɛta ma fɛ atesaa lɛma. 8 SAATE nwu omu kamale fɔ katũ, abasiɛ ko fɔ kafɔɔ; ɔlɔbadiɛ fɔ ee asĩ fɔ diidii. Tan-yɛkɛ; tanta nnɛɛ lafee fɔ."

9 Nioso Mose lakpana kufiofa ko mmle, ni aayɔ kũ aata Lewi babisuɔtɔbi, olebatatɛ ba nintuka ni SAATE nwu kanya ninii lɛkaa nwu ku Israel banɔɔfo nwu bamuu nɛ. 10 Ninfɛ di Mose latɔkɔ ma alɛ: "Di lɛlɛɛ kuɛsinle biala kayɛntɛkɔ, dile ni ato ɔyɔ ɔkyɛ lɛlɛɛ kamɛ, di Akpanta Dii olebee kamɛ, 11 di Israel batii bamuu lɛbasi di SAATE Yaa lɛfɔ anu di lɛba le abadiki anta nii yi, ka kufiofa ko mmle di anu lɛma fata ma baanu. 12 Siisa batii nwu- basuɔtɔ, basanko, babisɔ ku bafɔɔ ba ninsi ni di sekpoo lɛfɔ- di mmle baanu mantekete ni mmle baayɛkɛ ni SAATE Yaa lɛfɔ, manlolaa kufiofa ko mmle kumuu sɛlaa mantikanko ni. 13 Dikpeni babi lɛma ba ninan-ye ni kufiofa ko mmle nnu kũ, mantekete mmle baayɛkɛ ni SAATE Yaa lee, di obe wɔ bisi ni di kasɔ ka biɔwaalɛ Yordan Okle minaayɔ nii."

14 SAATE nwu latɔkɔ Mose alɛ, "Kanunua kukpi lɛfɔ dii ntɔɔtɛɛtɛɛ. Lɛɛ Yosua biɛbayila di Lɛkpaayo le Mansi ni, di nfũ kamayɔ ɔkpɛ nkpee nwɔ ni ninnɛɛ." Nioso Mose ku Yosua labayila di Lɛkpaayo le Mansi ni.

15 Ninfɛ di SAATE nwu labakyɔɔ di Lɛkpaayo nwu di lelokonkyɛ takale letembi nɛ. Ni di lelokonkyɛ nwu layila di Lɛkpaayo nwu kayoko nɛ. 16 Ni di SAATE nwu latɔkɔ Mose alɛ: "Nfɛ foofe ɔnyɛɛ ɔtɛ ku bate lɛfɔ, n-se batii ba mmle ntɔɔyɔ suoto lɛma bɛɛta bafɔɔ bayaa ba di kasɔ ka boobuo nii. Babasĩ mi, manlalaasa kanya ninii le labla ni ku mma. 17 Di dii nwu nkpo kale ɔblɔ kamafiɛ mi, nsĩ ma; kamawofasa anu nii di suoto lɛma, nta manwɔɔsa ma. Di dii nwu nkpo, anyanyaasaa ku dibuo kpinwu kamawa ma di suoto mankaalɛ alɛ, ‘Diele Yaa loo wɔ ninasinsiko wo ni oso di anyanyaasaa ya mmle kɔwa wo di suoto nɛ?’ 18 Ni nwaako di dii nwu nkpo, kamawofasa anu nii di suoto lɛma ta akpilesaa lɛma amuu oso, bɛɛkyɛ boosumu ni bayaa bamba.

19 "Kanuna bikpana onu wɔ mmle bitɛ, bietuo nwu Israel batii, biɛta ma basa nwu alɛ kuale kamaadiyilasaa nintɛɛ di suoto lɛma. 20 Nse ntɔɔkpaa ma lɛwako kasɔ ka di nnyɛɛntu ku bablɔ kobiɛ ninfe nii, kasɔ ka laka ntam lata ni bawa lɛma, beele beemiɛ di asaa kɔlɛ ma ɔkyɛ yi, babakyi manaasumu bayaa bamba, manlalaasa kanya ninii nii, mansĩ mi kafɔɔ. 21 Ni nse anyanyaasaa ku dibuo nwu kɔwa ma di suoto yi, onu wɔ mmle kamale kamaadiyilasaa di suoto lɛma, diekye banantii lɛma dilɔbayee nwu. Bia fiɛ kamakpaa ma nwako ni kasɔ ka laka ntam latɛ lata ma ni yi, latofo lɛsaa le baatɛ ni ɔbla." 22 Nioso dii nwu nkpo Mose lakpana onu wɔ mmle aatɛ, ni aatuo nwu Israel batii nɛ.

23 Ni di SAATE nwu layɔ kufiofa ko mmle aata Nun obisuɔtɔbi Yosua alɛ: "Wɛ osie, faawɛ sɛkambi, diekye afɔ nimakpaa Israel batii fanwako kasɔ ka laka ntam latɛ lata ma ni nɛ, ni ami omu kamasiɛko fɔ."

24 Di Mose laloo ni kufiofa ko mmle sɛlaa ɔkpana di kukũ ko mmle kamɛ, diayɔ ni di kasɔ kakyekɔ dialaase ni di kayɛntɛkɔ yi, 25 ni aata Lewi batii ba niatuka ni SAATE nwu kanya ninii lɛlakaa kufiofa ko mmle alɛ, 26 "Yɔ Kufiofa Kukũ ko mmle fatɛ di SAATE Yaa lee kanya ninii lɛlakaa ɔlɔɔkɔ. Nfa kuɔwa ɔbate kunle kamaayilatɛ di suoto lee nɛ. 27 Diekye n-ye mmle bikpe ni otokopĩ ku onunsie. Nse biataka biayila di SAATE nwu suoto di obe wɔ nsi ni kaamɛ lee nkpe ni nkpa, ni lɛ nfɛ di ɔtaka oyila lee kamate di kakpimaa nii! 28 Bisiisa ana lee nwu banɔɔfo bamuu ku banɔɔfotii bamuu, di mmle kakakatɛ sɛlaa se mmle nta ma man-nu ni, ninlɛɛ osi ku kasɔ babale kamaabayilatɛ di suoto lɛma. 29 Diekye n-ye nlɛ di kakpimaa nii bibalalaa, minkyi kafɔɔ di sisuku se suoto latɔkɔ ye nlɛ bikyɛ nii. Di ayi ya nikɔwa ni kamɛ yi, anyanyaasaa kamawa di suoto lee, diekye bibabla okpile di SAATE nwu anu, minta aanya ɔblɔ ta asaa ya di nnɛɛ lee lɛbla ni oso."

30 Ni di Mose labuɛ onu wɔ mmle sɛlaa, diayɔ ni di kasɔkakyekɔ dialaase ni di kayɛntɛkɔ aata Israel batii dikudi nimuu lanu nɛ.