1 Oo osi, bikyɔɔ atoko, kamakakatɛ;

Oo kasɔ, nu kanya nii sɛlaa.

2 Ta asaa nii otuo anɔɔ fɛle kanto

sɛlaa nii kafɔɔ sisoo fɛle oblokyi,

fɛle kanto wɛɛwɛɛ di sɛfa fɔle suoto,

fɛle kanto kplɛ di asaa ya bɛɛpɛ ni suoto.

3 Kamayie lɛkya di SAATE nwu leyooto suoto,

Oo, tansa Yaa loo osie kplɛ nwu!

4 Nnwɔɔ ninle Difuɔnkpaa nwu nɛ, sɛkpɛ nɔɔ lewo niimu,

sisuku nɔɔ simuu nte tinini.

Onukwale Yaa wɔ ninambla ni lɛsaa lalaale,

ate tinini, ambla ni kafɔɔ asaa di osuku kanya.

5 Beediki kalalaa kɔkpaa di suoto nɔɔ;

sinunsɔ oso baasinle nwɔ batii,

kɔna kpile ku balaatɛ bale.

6 Oo batii ba ninankpa ni manan-ye ni lɛsaa,

nkpo dikaatɛ biabla SAATE nwu nɛ?

Diele nnwɔɔ ninle fɔ Kote, Blatɛ lɛfɔ,

nnwɔ niɛbla fɔ, ɛɛdiki fɔ ni kafɔɔ nɛ?

7 Nyuma saa obe nwu;

faabu diisi fanyu di saa bakofo suoto.

Kaalɛ teefɔ, abatɔkɔ fɔ,

banɔɔfo lɛfɔ, babadiki kamɛ manta fɔ.

8 Obe wɔ di Nnwɔ Niɛtaka Katoo alenke ni lata ni nnle nwu atesaa lɛma,

obe wɔ aasɛ ni batii-nyu bamuu,

aatika amɛ aata ni batii

di mmle di Israel babisuɔtɔbi lɛpɔ nte ni kanya.

9 Diekye SAATE nwu bale ninle batii nɔɔ nɛ,

Yakob ninle atesaa nɔɔ amu.

10 Ɔfaafuu kasɔ aanyɔɔ,

di kasɔ ka niakpi kaate ni, kate ni kafukuti kafɔɔ.

Aatĩtĩi nwɔ, aakɔkɔɔ nwɔ;

aatuo nwɔ osuku fɛle ninu nɔɔ naatĩ,

11 fɛle mmle di klikpo n-nyu ni leyo nɔɔ,

anflɛlɛtɛ ankyi ni abi nɔɔ,

anfukuti ni afoko nɔɔ kafɔɔ ammufũ nya

anklee ni di mmle anaakpa nii.

12 SAATE nwu lete nialeko nwɔ katũ;

bafɔɔ yaa kuonwii ditakyakaa di suoto nɔɔ.

13 Aatɔɔ aafe di nsɔ takale suoto

aatɔɔ afe nwu awosobi aale.

Aatɔɔ bablɔ ba niakye ni difuɔnkpaa kamɛ aanyi,

ku nnɔnyi be niakye ni afuɔ siene sɛkyɛɛfɛ,

14 ku nnyɛɛtu kpɛnkpɛ ku banankyue ku bafoso nnyɛɛntu

ku bafoso ku batie ba ninsi ni lɛla,

ku Basan akunumuu kplɛ

ku atitabi abi nwaa.

Faanyi nta be baaka baakyeko ni awosobi suoto.

15 Yesurun* labawɛ suoto kafɔɔ aawɛ otokopĩ;

aasiɛ lɛla, aabawɛ onutũ, aawɛ suoto.

Nioso aadiɛ Yaa wɔ niabla nwɔ ni aatɛ

aasĩ Difuɔnkpaa le ninle nwɔ ni Dikitɛ.

16 Baata Yaa lakpɛ sɛsɔfɔwo ku bafɔɔ bayaa lɛma nwu,

ni baakpee nwɔ ɔblɔ ku ayududusaa lɛma nwu nɛ.

17 Baata ole baata afiɔ ya ninanle ni Yaa-

bayaa ba batatofo nii,

bayaa ba niadie ni sɛfɔle,

bayaa ba di bate lee ditayɛkɛ nii.

18 Difuɔnkpaa le niale ye ni kote, biasĩ nii;

ni biayee Yaa wɔ nialofo ye ni nɛ.

19 Ni di SAATE nwu lanya nle mmle ni aasĩ ma nɛ,

diekye babisuɔtɔbi ku babisankobi nɔɔ lakpee nwɔ ɔblɔ.

20 Ni aabuɛ alɛ, "Kamawofasa anu nii di suoto lɛma,

nin-nya mmle di kayɛntɛkɔ lɛma kamate nii;

diekye kɔna lalaale kule,

babi ba ninaa ni onukwale.

21 Baatɛɛ lakpɛ sɛsɔfɔwo di asaa ya ninanle ni yaa suoto,

ni baakpee mi ɔblɔ ku afiɔ lɛma ya ninandie ni lɛsalɛsaa nɛ.

Nioso kamata mankpɛ sɛsɔfɔwo di mba ninanle ni batii suoto;

Kamata ɔblɔ nfiɛ ma di kale ka ninaa ni lɛsɔnu suoto.

22 Diekye kafutu nii nfɛ n-yɛ ɔtɔ kuɔkɛsɛɛ nii,

nnwɔ nikofiɛ kunkyɛ ni ɔkya kamɛ kaalɔ.

Ɔtɔ nwu kamawɔɔsa kasɔ ku asaa ya nin-yɛ ka ni di suoto

kunfiɛ abokote nwu asɔse.

23 "Kamasiisa sɛlaa kpile ntika ma di suoto,

nintaa kɔtaa nii nkpee ma.

24 Kamata kɔka siene nkpɛ ma,

kɔ̀bɔ ofiɛ ku ofiɛ kpile mapɛ ma;

Kamadiki lepoo kamɛ babɔkɛɛ yakayaka nkpee ma,

kɔsaanwu kpile ko ninwududu ni di kudu kamɛ mmanu ma.

25 Kapamii kamalo babi lɛma di lɛkpaka;

difu kamapɛ ma di ayo lɛma kamɛ.

Bakosopo ku bakpeele,

babifɔɔle ku banɔɔfo asifututu kamakpi.

26 Labuɛ nlɛ kamasamiisa ma

n-yɛɛsa ma ayooto alɛ batii dilɔbasinyuma ma,

27 kafɔɔ noomiɛ nlɛ balo lɛma bakpee mi ɔblɔ,

nse diele nkpo bakyiditɛ lɛma kamatakatɛ suoto katoo

mambuɛ alɛ, ‘Kɔnɛɛ loo nielenkee ma;

ni diele SAATE nwu niɛbla nle mmle nimuu.’ "

28 Kale ka ninan-ye ni lɛsaa bale,

di lɛsɔnu nnaa ni kaamɛ lɛma.

29 Nse loo beebe anu babawɛ lɛsɔnu le mmle,

mambu disi di mmle di kayɛntɛkɔ lɛma kamate nii!

30 Lɛ di otii onwii kafuo batii kakpe oyilako,

ee batii banyɔ kakpɛko batii nkpe lefosi,

Difuɔnkpaa lɛma nwu ntoosunsũ ma,

sɛɛ SAATE nwu ntoodiki ma ɛɛta?

31 Diekye difuɔnkpaa lɛma nwu diete fɛle Difuɔnkpaa loo,

fɛ mmle bia di balo loo lefũ beekpee nii.

32 Nta lɛma nkye Sodom nta kamɛ,

ninkye ni kafɔɔ Gomora afe kamɛ.

Awosobi lɛma leyii ku kɔfa kpile,

di ntu ninya nkpe ni olo.

33 Nta lɛma nle asaanwu adii,

kɔwɛɛfɛɛko adii kpile.

34 "Diele ɔyɔ lɛyɔ nle mmle lɛtɛ lɛta dii kaamaa

ni lɛsɛɛ ni lekpee di asaa nii katɛkɔ?

35 Ɔbla okyisa nwu ole mi kule; kamata letota.

Kɔkpaa lɛma kamafɛntɛ di obe kakuu kamɛ;

sɛlaa kpile otũ lɛma dii ntɔɔtɛɛtɛɛ

di kawɔɔ lɛma kafɔɔ mafua ma nii."

36 SAATE nwu kamakanko batii nɔɔ,

annya bakpɛmblatɛ nɔɔ nyaami

di obe wɔ ɛɛnya alɛ basinnaa ni osie

di ɔlanle ee otii wɔ nisiko ni suoto kuonwii diesimbu nii.

37 Ni ababuɛ alɛ: "Kanunua ɔfɛ nfɛ di bayaa lɛma nwu nkpe,

difuɔnkpaa nwu baataniko ni,

38 bayaa nwu niawee ni oleɔta lɛma sina

baanyi ni asaaɔta lɛma nta?

Bita ma bataka bayila baakyakaako ye!

Bita ma bata ye kasiɛkɔ!

39 "Binyu kanuna bilɛ ami omu ninle Nnwɔ nɛ!

Kuonwii nsinaa ale ni yaa akyakaa ni di ami.

Nlo otii, nkple nsɛnkɛsa,

Ntika kakɔ́, kamakple nta kankpi,

kuonwii kafɔɔ nnaa abafuo ni otii odiki di nnɛɛ nii.

40 Lekplesa kɔnɛɛ nii katoo lɛkyɔɔ osi lebuɛ nlɛ:

Lɛnya nsi ni osi nkpa dinaa ni kaloo,

41 nse lɛlɔɔfɔ kapamii nii ka nikosesee nii

di kɔnɛɛ nii lɛkpanko ka di lɛkanko kamɛ yi,

kamabla nkyisa di balo nii suoto,

ninnanfi mba niekyidi mi ni kootoko.

42 Kamata akplɔ nii nnyi ntɔ ansiɛ,

di obe wɔ di kapamii nii kowee ni sina:

mba niɛnɔɔ ni kakpɛ ku balanle nwu ntɔ,

ku balo nwu batunletɛ asi."

43 Oo nnle, ku batii nɔɔ, binya suoto lɛyɔɔ,

diekye ababla ankyisa di bakpɛmblatɛ nɔɔ ntɔ suoto;

ababla ɔbla okyisa nwu di balo nɔɔ suoto

anta koto di kasɔ ku batii nɔɔ disi.

44 Mose lawa ku Nun obisuɔtɔbi Yosua baabaka onu wɔ mmle sɛlaa simuu baata batii nwu lanu.

45 Obe wɔ di Mose laloo ni sɛlaa se mmle simuu obuɛ ɔtɔkɔ ni Israel batii nwu bamuu yi, 46 ni aatɔkɔ ma alɛ, "Biyɔ sɛlaa nwu simuu ntɔɔtɛ lediki lɛtɔkɔ ye ni miɛ dii le mmle bikpee di situ lee, di mmle di ayee biatɔkɔ ni babi lee manlolaa ni kufiofa ko mmle sɛlaa simuu manklee ni nwaa. 47 Diele sɛlaa fukuti lete sile sita ye- nkpa lee sile. Nsĩ nimata ye minsiɛ nkpa minklɛ di kasɔ ka biɔwaalɛ Yordan Okle minaayɔ ni nɛ."

48 Di dii nwu nkpo kale SAATE nwu latɔkɔ Mose alɛ, 49 "Kata fakyɛ Abarim Kobokote fasifi Nebo Kobokote nwu di Moab kasɔ, di Yeriko sɛmaa, faanyu Kanaan, kasɔ ka kɔyɔ nta ni Israel batii fɛ atesaa lɛma amu. 50 Nfa di kobokote nwu fɛɛkata ni fabakpi fansifi batii lɛfɔ ɔkyɛ nɛ, fɛ mmle di obilee Aron lakpi ni di Hor Kobokote osi aasifi ni batii nɔɔ ɔkyɛ. 51 Diekye banyɔ lee bitale onukwale biatɛɛ di Israel batii anu di Meriba Kades ntu katũ di Sin Ɔfaafuu, diekye bitayɔ dibu biata leklekle nii di Israel batii kamɛ. 52 Nkpo oso fabanya kasɔ nwu di kakyonkɔ lete; kafɔɔ flɔbabuo kasɔ nwu kɔyɔ nta ni Israel batii."