1 Oo Israel binu, afiofa ku sisuku se nfɛ kamatuo ye ni kanunua. Bitikanko nya di mmle biasiɛ ni nkpa minkyɛ minaayɔ ni kasɔ ka di SAATE, bate lee Yaa kɔyɔ anta ye ni. 2 Bitankyakaa ɔlaa kuonwii di kufiofa nwu kɔta ye nii, bitandiki lɛsalɛsaa kafɔɔ kaamɛ, kafɔɔ bile SAATE Yaa lee afiofa ya lɛta ye ni.

3 Bianya aye bamu lɛsaa le di SAATE nwu labla ni di Baal Peor. SAATE Yaa lee lawɔɔsa otii biala niatikanko ni Baal Peor di kamɛ lee, 4 kafɔɔ aye ba bamuu niamufũ SAATE Yaa lee biaklee ni kpinkpĩ lekple bikpe nkpa bia miɛ.

5 Binyu, ntootuo ye afiofa ku sisuku nwu fɛ mmle di SAATE Yaa nii latɔkɔ mi nii, di mmle biatikanko nya ni di kasɔ ka biobuo minaayɔ nii. 6 Anu lee atika nya di suoto nwaa, diekye nle mmle nimatuo lɛsaatofo ku lɛsɔnu lee nɛ, nnle mmuu be nimanu ni afiofa ya mmle amuu kamabuɛ alɛ, "Nwaako kale kplɛ ka mmle nle banumbentɛ ku lɛsɔnu batii." 7 Kamɛ nnle bamba niɛtɛ keemuɔ nkpo, alɛ bakpe bayaa lɛma ba niɛtɛɛtɛɛ ma ni fɛ mmle kanya di SAATE Yaa loo lɛtɛɛtɛɛ wo ni, obe lele buɔpɛ ɔlaa buɔtɔɔ ni? 8 Kamɛ nnle bamba kafɔɔ niɛtɛ keemuɔ nkpo, alɛ bakpe afiofa ku sisuku tinini se mmle fɛ afiofa dikudi le mmle kɔyɔ ntɛ ye ni di anu miɛ?

9 Bilolaa binyu nwaa, bienyu suoto lee nwaa di mmle minaayee ni asaa ya di anu lee ntɔɔnya ni ee adie di otu lee, di obe wɔ biɛnya bisi ni nkpa. Bituo nya, babi lee ku babi lɛma ba nimawa ni di sɛmaa lɛma. 10 Nyuma dii le faayila ni di SAATE Yaa lɛfɔ anu di Horeb, aatɔkɔ mi ni alɛ, "Siisa batii nwu di anu nii, baanu sɛlaa nii, alɛ baatekete mmle baabu mi ni, mantuo ni babi lɛma kafɔɔ di obe wɔ basi ni nkpa di kasɔ nwu suoto." 11 Biayila biatɛɛtɛɛ kobokote nwu nkpaa di obe wɔ kuatoofiɛ ni ku ɔtɔ kunsifi ni bia osi ku alokonkyɛ wɛɛfɛɛ ku ditunu tunutunu. 12 Ninfɛ di SAATE nwu lakakatɛko ye aakyeko ɔtɔ nwu kamɛ nɛ. Bianu sɛlɔ nwu sɛlaa, kafɔɔ bitanya letembi kuninwii; sɛlɔ lete siale. 13 Aadiki kanya ninii nɔɔ nwu aatɔkɔ ye, Afiofa Lefosi ya aatɔkɔ ye alɛ bitikanko nii, aakpana nya kafɔɔ aatika ni di afuɔ nkyɛ nnyɔ suoto. 14 Ni di obe nwu kamɛ SAATE nwu latɔkɔ mi alɛ ntuo ye afiofa ku sisuku se dikaatɛ bietikanko ni di kasɔ ka biɔtaalɛ Yordan okle minaasiɛ ni nɛ.

15 Bitanya letembi kuninwii di dii le di SAATE nwu lakakatɛko ye aakyeko ni ɔtɔ kamɛ di Horeb. Nkpo oso bilolaa suoto lee binyu nwaa, 16 alɛ biekyisa disibu lee bibla afiɔ bita suoto lee, di letembi lele kanya, bɛɛbla ni fɛle osuɔtɔ ee ɔsanko, 17 ee fɛle bɔkɛɛ lele di kasɔ ka mmle suoto ee kansiɛ lele ninflɛlɛtɛ ni di kɔfɛɛfɔ, 18 ee fɛle kabɔkɔbii lele ninkyɛ ni kaasɔ ee kakpaku lele di ntu kamɛ kaalɔ. 19 Ni nse bienyu kolo biɛnya kufĩ, kɔwɛntɛ ku awɛntrɛbi- osi asaa nwu amuu- bitanta aakyɔnkyɔ ye alɛ biawakasɔ minta nya, mintɔɔtɔ asaa ya di SAATE Yaa lee lɛyɔ ɛɛta ni nnle mmuu di kolo kalɔ. 20 Kafɔɔ aye yi, SAATE nwu ladiki ye aakyeko abɔɔsaa okpetewu kamɛ, aakyeko Egipte kasɔ, alɛ biale atesaa nɔɔ baletɛ batii, fɛ mmle nfɛ bite ni kanunua.

21 SAATE lanya ɔblɔ aakpeekoe ta aye oso, ni aaka ntam osie kanya alɛ namataalɛ Yordan Okle nwu mbuo kasɔ ka biene di SAATE Yaa lee kɔyɔ anta ye ni fɛ atesaa lee nɛ. 22 Kamakpi di kasɔ ka mmle suoto; namataalɛ Yordan Okle; kafɔɔ aye nfɛ biɔwa ɔbataalɛ minaayɔ kasɔ biene nwu. 23 Bilolaa binyu bilɛ bieyee SAATE Yaa lee kanya ninii le aabla ni ku aye; bitambla afiɔ biata suoto lee di letembi kuninwii kanya di SAATE Yaa lee lekyidi nii. 24 Diekye SAATE Yaa lee nle ɔtɔ wɔ ninwɔɔsa ni asaa, Yaa wɔ ninkpɛ ni sɛsɔfɔwo.

25 Nse bitoolofo babi ku bawa bieloo, bitoosiɛ di kasɔ nwu suoto biɛklɛ- nse biɛlalaasa suoto lee biɛbla afiɔ di letembi lele kanya, biele sikpile di SAATE Yaa lee anu, biekpee nwɔ ɔblɔ yi, 26 kɔlɛɛ osi ku kasɔ fɛ kamaabayilatɛ di suoto lee miɛ dii le mmle alɛ, bibakpi wla di kasɔ ka biɔtaalɛ Yordan minaayɔ nii. Bilɔbasiɛ ninfa biklɛ, kafɔɔ nwaako bibawɔɔ. 27 SAATE nwu kamasamiisa ye ankpee di batii nwu kamɛ, basɛɛ lee lete nimabu minsiɛ nkpa di nnle be di SAATE nwu kamakpaa ye ansifiko ni kamɛ. 28 Nfa bibasumu bayaa ba di batii lɛyɔ sewoso ku afuɔ bɛɛbla nii, anamafuo ni ɔnya ee anu ee ale ni alesaa ee anu ni ofũfũ. 29 Kafɔɔ nfa nkpo, nse biemiɛ SAATE Yaa lee, bibanyɔɔ, nse biewolaa nwɔ ku otu lee omuu ku ɔkla lee omuu. 30 Nse diemiina ye di asaa ya mmle amuu lɛwa ye di suoto yi, ni dii kaamaa bibakple minsifi SAATE Yaa lee ɔkyɛ minaanu nwɔ ɔlaa. 31 Diekye SAATE Yaa lee nle nyaaminyatɛ Yaa; ɔlɔbadiɛ ye nnɛɛ ee awɔɔsa ye ee ayee kanya ninii le aabla ni ku bawa lee, nle aatika difuɔ aata ma aaka ni ntam.

32 Bikaalɛ ayi ya nitɔbafe ni kanunua, ditɔɔklɛ ni fiɛ di obe lee ntɔɔwa ni, diayɔ ni di dii le di Yaa labla ni otii di kasɔ ka mmle suoto; bikaalɛ di osi disi le, diɛlaase ni di disi le. Lɛsaa kplɛ lewo fɛle nle mmle okle ntoodiwa, ee batoodinu lɛsaa lewo fɛle nninkpo okle? 33 Batii bamba bawo lanu Yaa sɛlɔ kɔkakatɛ sinkye ɔtɔ kamɛ, fɛ mmle bianu ni, baawɛ nkpa? 34 Sɛɛ yaa owo ntoodikpee kɔnyaabe alɛ oodiki kale kawo ankyeko kale bamba kamɛ anta suoto nɔɔ, di ɔsɔ onyu, asaa ya niɛbla ni ɔkpɛ ku atuosaa, ku kakpɛ, ku kɔnɛɛ siene, ku kɔnɛɛ lɛnanfi, ee di osie ku difu sɛsaabla, fɛle asaa ya amuu di SAATE Yaa lee labla ni di Egipte kasɔ suoto di anu lee amu?

35 Baatuo ye asaa ya mmle, di mmle biatofo ni bilɛ SAATE nwu lete ninle ni Yaa; di nnwɔɔ kamaa ɔbamba nnaa nii. 36 Aata ye bianu nwɔ sɛlɔ siakye ni osi alɛ ɔɔnanfi ye. Aatuo ye ɔtɔ nɔɔ kplɛ kaasɔ suoto, ni bianu sɛlɔ nɔɔ ladie siakye ɔtɔ kamɛ nɛ. 37 Ta aambɔmbɔ ni bawa lee oso, ni aadiki banantii lɛma ba sɛɛmaa lɛma, aakpaa ye aadieko di Egipte di Nnwɔɔ omu nɔɔ ku osie nɔɔ kplɛ, 38 alɛ ootososa nnle be nimpɔ bakpe ni osie balenke ye ni di anu lee, alɛ ɔɔkpaa ye anwako kasɔ lɛma, an-yɔ ka anta ye fɛ atesaa lee, fɛ mmle dite ni miɛ.

39 Bitofo nle mmle, biefũ bikpee di otu lee miɛ dii le mmle bilɛ, SAATE nwu ninle Yaa kaatoo di osi ku kasɔ kaalɔ. Ɔbamba kuonwii nsinnaa. 40 Bimufũ afiofa ku sisuku nɔɔ biklee, n-ya kɔyɔ nta ye ni miɛ, di mmle dibalɛ ninta ye ni ku babi lee ba nikɔwa ni sɛɛmaa lee, alɛ biasiɛ nkpa minklɛ di kasɔ ka suoto di SAATE Yaa lee kɔta ye ni obe lele.

41 Ninfɛ di Mose latɛ ekpoo kplɛ etiɛ di Yordan kufĩ katunkɔ lɛkyɛ, 42 nsĩ di nse otii lele lelo otii katoso ansifi ni, nse diele ɔtɛ ɛɛtɛ eelo owo nɔɔ nwu, ninanle osi asi nwɔ ni oso. Otii wɔ nielo ni owo nɔɔ kafuo otoso osifi ekpoo kplɛ be mmle onwii kamɛ anfũ nkpa nɔɔ. 43 Sekpoo nwu niale: Beser di ɔfaafuu kobokote nsintɛɛ, niale ni Ruben batii ole; Ramot di Gilead, niale ni Gad batii ole; Golan di Basan, niale ni Manase batii ole.

44 Nnya kufiofa ko di Mose layɔ aatɛ ni di Israel batii anu. 45 Nnya ninle kɔkpaa didiki ku afiofa ku sisuku se di Mose layɔ aata ma ni di obe wɔ baadie ni di Egipte kasɔ, 46 baawɛ ni di ɔtaata wɔ niakaako ni Bet Peor di Yordan kufĩ katunkɔ, di Amori batii ɔka Sihon kasɔ suoto nɛ. Nnwɔ niale ni sɛka di Hesbon, di Mose ku Israel batii lalenkee nwɔ ni di obe wɔ baadie ni di Egipte. 47 Baafũ kasɔ nɔɔ ku Basan ɔka Og kasɔ, Amori batii baka nwu banyɔ di Yordan kufĩ katunkɔ. 48 Kasɔ ka mmle layɔ di Aroer di Arnon Okplo kyofole kotoko kaalaadu Siyon Kobokote (nkũ ninle Hermon nɛ), 49 di Araba omuu di Yordan kufĩ katunkɔ nkyakaa nii, kualaadu Araba Lekpo di Pisga kobokote lɛyɔnsa kalɔ.