1 Nse fatoobuo kasɔ ka di SAATE Yaa lɛfɔ kɔyɔ anta fɔ ni fɛle atesaa, fatɔɔyɔ ka nfɛ fasi yi, 2 yɔ kasɔ nwu di SAATE Yaa lɛfɔ kɔyɔ anta fɔ ni alesaa amuu kasale ya fɛɛyɔ ni di kofe lɛfɔ nwu fakpee di kakyikyɛ kamɛ. Faayɔ nya fasifiko lɛba le di SAATE Yaa lɛfɔ kamadiki anta alɛ Leyooto nɔɔ dite ni, 3 faatɔkɔ oletatɛ wɔ nfɛ ninsi ni di obe nwu kamɛ falɛ, "Kodiki ntuo SAATE Yaa lɛfɔ miɛ dii le mmle nlɛ ntɔɔwa kasɔ ka di SAATE Yaa loo laka ntam aata ni bawa loo alɛ abata wo nii." 4 Oletatɛ nwu kamafũ kakyikyɛ nwu di nnɛɛ lɛfɔ an-yɔ anse di SAATE Yaa lɛfɔ oleɔta akyikye anu. 5 Ni fababuɛ di SAATE Yaa lɛfɔ anu falɛ: "Teemi lale Aram otii wɔ niatookyikyii nii, ni aadie aasifi Egipte kasɔ manko batii kafii baalaasiɛ ninfa, ni baabakple kale kplɛ, baawɛ osie, ni baapɔ̀ kafɔɔ nɛ. 6 Kafɔɔ Egipte batii labla wo amumu, baata wo buabla sɛkpɛ ku osie, diabuo wo. 7 Ni buawi bualɛɛ SAATE nwu, bawa loo Yaa, ni di SAATE nwu lanu wo sɛlɔ aanya ninyinyi, dibuo ku nimiina loo nɛ. 8 Nioso SAATE nwu ladiki wo aakyeko Egipte ku kɔnɛɛ osie, kɔnɛɛ lɛnaanfi ku ayɛkɛsaa kplɛ ku atuosaa ku asaa ya niabla ni ɔkpɛ. 9 Ni aakpaa wo aawako lɛba le mmle, aabayɔ kasɔ ka mmle aata wo nɛ. Kasɔ ka di nnyɛɛtu ku bablɔ kobiɛ ninfe ni nɛ; 10 Oo SAATE, nioso nunua ntɔɔwako kasɔ nwu alesaa kasale ya fatɔɔtɛɛ nii." Yɔ kakyikyɛ nwu fase di SAATE Yaa lɛfɔ anu, faawakasɔ di anu nɔɔ. 11 Ni afɔ ku Lewi batii nwu ku bafɔɔ ba ninsi ni di kamɛ lee binya suoto lɛyɔɔ di asaa biene ya amuu di SAATE Yaa lɛfɔ lɛta fɔ ni minko leyo lɛfɔ batii.

12 Nse fatoodiki dikyuu fosile di kofe lɛfɔ asaa ya amuu fɛɛwɛ ni di lɛlɛɛ tiɛfa kamɛ fɛɛtɛ lete feeloo, dikyuu fosile lɛlɛɛ nwu, faayɔ ni fata Lewi batii, bafɔɔ ku bakuɛbi ku bakpisɔfɔ, di mmle babale nya ni di sekpoo lee kamɛ mammiɛ ni. 13 Ni faatɔkɔ SAATE Yaa lɛfɔ falɛ: "Ntoodiki kakleklekɔ lɛba nwu di leyo nii, ni lɛyɔ ni lɛta Lewi batii ku bafɔɔ ku bakuɛbi ku bakpisɔfɔ, di asaa ya feebuɛ ni amuu kanya nɛ. Ninkyi di afiofa lɛfɔ suoto ee n-yee kukunwii nikũ. 14 Nin-le kakleklekɔ lɛba nwu alesaa kuanwii di obe wɔ lasiɛ ni kaku, ee ndiki kuanwii di obe wɔ ntabla ni klekle, ee n-yɔ kuanwii nta bakpi. Lɛkyɔɔ kotoko lenu SAATE Yaa nii ɔlaa; lɛbla lɛsaa biala faatɔkɔ mi nii. 15 Nyu fakyeko osi, kasiɛkɔ lɛfɔ Klekle nwu, faata Israel batii lɛfɔ lɛtɔtrɔ ku kasɔ ka faaka ntam faata ni bawa loo, kasɔ ka di nnyɛɛntu ku bablɔ kubiɛ ninfe ni."

16 SAATE Yaa lɛfɔ kɔtɔkɔ fɔ miɛ dii le mmle alɛ tikanko afiofa ya mmle faakyɛ di sisuku nɔɔ; lolaa fanyu faale nya ku otu lɛfɔ omuu ku ɔkla lɛfɔ omuu. 17 Fatoodiki feebuɛ miɛ dii le mmle falɛ SAATE nwu ninle fɔ Yaa, ni fabakyɛ di sisuku nɔɔ, alɛ fabaklee sɛsaabla nɔɔ, ablasaa nɔɔ ku afiofa nɔɔ, ni fabanu nwɔ ɔlaa. 18 Ni di SAATE nwu ntoodiki eebuɛ miɛ dii le mmle alɛ batii nɔɔ bile, lɛsaawɛ nɔɔ asaa, fɛ mmle aabuɛ aatɛ nii, nioso dikpeni biele afiofa nɔɔ amuu. 19 Ni eebuɛ alɛ abata fansiɛ di katansa kamɛ, mannu fɔ leyooto ku dibu le niɛtaka katoo dilenke ni nnle be mmuu ɛɛbla nii, alɛ fabale kale Klekle fanta SAATE Yaa lɛfɔ nwu, fɛ mmle aabuɛ aatɛ nii.