1 Nse obilee nankyue-suɔtɔ ee foso leyu osuku fɛɛnyɔɔ yi, tan-waalɛ nwɔ faafɛ, kafɔɔ nyu falɛ fɛɛkplesa nwɔ fɛɛkyɛnko nwɔ. 2 Nse obilee nwu diesi akaako fɔ ee faaye owe ole ale yi, ni kpaa nwɔ fasifiko leyo lɛfɔ falaase dilaase di obe wɔ abawa amawolaa nwɔ ni. Ni faakplesa nwɔ fatɔɔ. 3 Bla di akpanwu, nse fɛɛwɛ obilee bɔkɛɛ wɔ nintuka ni atoo ee dibula nɔɔ ee lɛsaa lele nieyu nwɔ. Tan-waalɛ ni faafe.

4 Nse fɛɛnya obilee bɔkɛɛ wɔ nintuka ni atoo ee nankyue-suɔtɔ nɔɔ lɛnɔɔ di osuku yi, tan-waalɛ nwɔ faafe. Kyakaako obilee nwu aatakatɛsa nwɔ ase.

5 Ɔsanko antankpee basuɔtɔ akpeele ee osuɔtɔ atankpee basanko akpeele, diekye SAATE Yaa lɛfɔ lekyidi otii lele niɛbla lɛsaa le mmle okle.

6 Nse fɛɛnya kansiɛ leyo di osuku kotoko, kuntɛ kowoso suoto ee kasɔ, di ɔya nfuu di abi suoto ee afuɔ suoto yi, tan-yɔ ɔya ku abi nwu. 7 Afɔ faafuo abi nwu ɔyɔ, kafɔɔ nyu falɛ fɛɛta ɔya lɛma lesifi, ta mmle dibalɛ ninta fɔ, fansiɛ ni nkpa kaanale.

8 Nse feetofo leyo fɔle, kpee kɔba fakyisa lɛkya lɛfɔ, ta mmle di otii kuonwii dilɔbakpa ni ninfa, di mmle ninaawako ni ntɔ owii letokonanfi.

9 Tampɛ asaa ateate akyuu anyɔ faakpɔtɔɔsa di awosobi lɛfɔ kofe kamɛ. Nse fɛɛbla nkpo ni asaa nwu fɛɛpɛ ni ku awosobi kofe nwu awosobi amuu kamakpɔnɔfɔ.

10 Tan-nii nankyue-suɔtɔ ku bɔkɛɛ wɔ nintuka ni atoo di owoso onwii suoto baafuu kasɔ baata fɔ.

11 Tankpee akpeele ya bɛɛyɔ foso sinwini ku oleteku beeloso bɛɛkpɔtɔɔsa nii.

12 Bla sɛkpaalɛ fasakasa di akpeele ya feekpee ni atokosi nwu ana suoto.

13 Nse osuɔtɔ lɛyɔ ɔsɔfɔ, eetenko nwɔ eeloo, eekyidi nwɔ, 14 ɛɛkpɔnɔfɔsɔɔ, ɛɛtɔɔ leyooto kpile eebuɛ alɛ, "Layɔ ɔsanko wɔ mmle, kafɔɔ lakyɛ ni ɔkyɛ nɔɔ lanya nlɛ nfɛ aye osuɔtɔ," 15 ni ɔsankobi nwu ote ku ɔya kamakpasa kamɛ di okpoo banɔɔfo anu di lɛkpaka alɛ kabitɛ aale. 16 Ɔsankobi nwu ote kamatɔkɔ banɔɔfo nwu alɛ, "Layɔ obisankobi nii lata osuɔtɔ wɔ mmle nlɛ ayɔ, kafɔɔ alɛ aasinlɛ nwɔ. 17 Nunua atɔɔkpɔnɔfɔsɔɔ eebuɛ alɛ, ‘Lɛnya nlɛ obisankobi lɛfɔ nwu diele kabitɛ.’ Kafɔɔ nnya nle nikotuo alɛ obisankobi nii nwu kabitɛ ale ni." N-se ɔsankobi nwu balofotɛ ntoofukuti dibula nwu bɛɛtɛ di okpoo banɔɔfo nwu anu, 18 ni banɔɔfo nwu kamakpaa osuɔtɔ nwu mannaanfi nwɔ kootoko. 19 Babafũ koto fututu aboo kɔlafa di osuɔtɔ nwu ɔkyɛ manta ɔsankobi ote, diekye osuɔtɔ nwu lɛta Israel batii kabitɛ leyooto kpile. Dikpeni, ankple anle osuɔtɔ nwu ɔsɔfɔ; dinaa alɛ ansĩ nwɔ, di obe wɔ di osuɔtɔ nwu lɛnya akpe ni nkpa.

20 Kafɔɔ, nse nwaako di ɔlaa nwu nle, di kamɛ lɛkpa alɛ ɔsankobi nwu diele kabitɛ yi, 21 ni bakpaa ɔsankobi nwu basifiko ote kayokontũ, di okpoo nwu basuɔtɔ basafɔ nwɔ afuɔ balo. Diekye ɛɛbla anunsɔsaa di Israel kasɔ suoto, aate di basuɔtɔ sɛkyɛ di obe wɔ aakple aawɛ ni di ote leyo. Dikpeni biediki dikpile nwu di kamɛ lee.

22 Nse bɛɛnya osuɔtɔ owo kotenko osuɔtɔ bamba ɔsɔfɔ yi, dikpeni beelo banyɔ lɛma nwu, osuɔtɔ wɔ niatenko nwɔ ni ku ɔsanko nwu. Dikpeni biediki lɛsaa kpile nwu di Israel kasɔ suoto.

23 Nse osuɔtɔ owo lɛkyakako kabitɛ ka disi batɔɔkaalɛ bɛɛtɛ ni di okpoo kamɛ, eetenko ɔsanko nwu yi, 24 bikpaa banyɔ lɛma nwu bisifiko okpoo nwu kasukunya biɛlaasafɔ ma afuɔ bilo. Ta okpoo kamɛ diale ni oso yi, ɔsankobi nwu ditayiisa kudu baafũ nwɔ nii, osuɔtɔ nwu kafɔɔ, ta ɛɛlalaasa ni osuɔtɔ bamba ɔsɔfɔ oso. Dikpeni biediki dikpile nwu di kamɛ lee.

25 Kafɔɔ nse diɛwa alɛ osuɔtɔ owo lakyakako ɔsankobi wɔ disi batɔɔkaalɛ bɛɛtɛ ni di lepoo kamɛ, ɛɛyɔ suoto osie eetenko ɔsanko nwu yi, ni osuɔtɔ wɔ niɛbla ni lɛsaa le mmle lete bielo. 26 Bitambla ɔsankobi nwu lɛsaalɛsaa; nnwɔɔ aabla okpile kuonwii dikaatɛ aakpi nii. Ɔlaa nɔɔ nwu nte fɛle mmle di otii owo ndieko ni owo nɔɔ anlo nwɔ nii. 27 Diekye lepoo kamɛ di osuɔtɔ nwu lanya ɔsankobi nwu, ni kuntɛ ɔsankobi wɔ disi baakaalɛ ni layiisa kudu yi, otii kuonwii ditawɛ ninfa aafũ nwɔ nii.

28 Nse osuɔtɔ owo lɛkyakako kabitɛ ka disi manadikaalɛ alɛ babayɔ ni, ɛɛyɔ suoto osie eetenko ɔsanko nwu, diedie ma kayi, 29 ni osuɔtɔ nwu kamata koto fututu aboo afosi anɔɔ anta ɔsankobi nwu ote. Dikpeni osuɔtɔ nwu kafɔɔ lɛyɔ ɔsankobi nwu, diekye atɔɔlalaasɔɔ. Ɔlɔbafuo ɔsanko nwu osĩ diidii, di obe wɔ di osuɔtɔ nwu lɛnya akpe ni nkpa.

30 Osuɔtɔ kuonwii antan-yɔ ote ɔsɔfɔ; diɛkaatɛ andiki anu an-nya ote ɔsɔfɔ lɛkyɔtɔ.