1 Di lɛlɛɛ kuɛnsinle biala kayɛntɛkɔ yi, dikpeni biɛyɔ ato biala basiko ye ni biɛkyɛ. 2 Nnya mmle kanya baabla ni: Otii biala niɛfɛnsa koto ɛɛta owo nɔɔ Israel otii yi, atantufu owo nɔɔ Israel otii ee obilɛma koto nwu, diekye batooyie lɛkya di obe wɔ di SAATE nwu lɛtɛ alɛ bayɔ ato nwu bakyɛ ni suoto. 3 Faafuo ɔfɔɔ koto otufu, kafɔɔ dikpeni fɛɛyɔ koto ko di obilee Israel otii nsiko fɔ ni fɛɛkyɛ nwɔ. 4 Kafɔɔ, diɛkaatɛ piitɛ kuonwii lɛwɛ di kamɛ lee, diekye SAATE Yaa lee kamata ye lɛtɔtrɔ nwaa di kasɔ ka ɔɔyɔ anta ye alɛ biyɔ ni fɛ atesaa lee, 5 nse nwaako feenu SAATE Yaa lɛfɔ ɔlaa, feelolaa afiofa ya mmle amuu kɔyɔ nta ye ni miɛ bietikanko. 6 Diekye SAATE Yaa lɛfɔ kamata fɔ lɛtɔtrɔ fɛ mmle aabuɛ aatɛ ni kanya, fabafɛnsa ato fanta nnle kpinwu, kafɔɔ afɔ flɔbafɛnsa di kuonwii ɔkyɛ. Fabale sɛka di nnle kpinwu suoto, kafɔɔ afɔ kale kukanwii dilɔbale sɛka di suoto lɛfɔ.

7 Nse otii owo nle piitɛ di babilee kamɛ di sekpoo se di SAATE Yaa lɛfɔ kɔyɔ anta fɔ ni owo kamɛ yi, tamblɔɔ disiosie ee kɔnɛɛ koklo di obilee piitɛ nwu suoto. 8 Kafɔɔ fukuti kɔnɛɛ ku otu, faafɛnsa nwɔ lɛsaa lele oomiɛ. 9 Lolaa fanyu falɛ disibu kpile le mmle diesiɛ fɔ diisi alɛ: "Lɛlɛɛ kuɛnsinle, ninle ni lɛlɛɛ le man-yɔ ato mankyɛ ni ntɔɔtɛɛtɛɛ," di mmle fanaanyu ni obilee nwu diefĩ ni nyakatãa alɛ faatɔɔ ni lɛsalɛsaa. Abafuo ɔfaa ɔlɛɛ SAATE nwu ankpee fɔ, nimale okpile ninta fɔ. 10 Fukuti kɔnɛɛ faatɔɔ, ninanle ni di ninukakatu kanya; ni ta nle mmle oso, SAATE Yaa lɛfɔ kamata fɔ lɛtɔtrɔ di ɔkpɛ lɛfɔ omuu kamɛ ku lɛsaa lele di kɔnɛɛ lɛfɔ lɛkpanko. 11 Bapiitɛ kamawɛ di kasɔ nwu obe lele. Nioso kɔtɔkɔ fɔ nlɛ fukuti kɔnɛɛ lɛfɔ fata babilee ku bapiitɛ ku mba diefĩ ni di kasɔ lɛfɔ suoto.

12 Nse owo lɛfɔ Hebri otii, osuɔtɔ ee ɔsanko lɛyɔ suoto nɔɔ eesunsũ, eesumu fɔ alɛɛ akuɔ yi, ni dikpeni fantɔɔ ansifi di lɛlɛɛ kuɛsinle kamɛ ku atoko ɔkyɛ ole. 13 Ni nse feediki nwɔ osuku yi, tantɔɔ aasifi nnɛɛ fukuti. 14 Fukuti kafutu, faatɔɔ babɔkɛɛ sele, atitabi ku nta lɛfɔ nwu. Tɔɔ asaa fɛ mmle kanya di SAATE Yaa lɛfɔ lɛta fɔ ni lɛtɔtrɔ. 15 Nyuma falɛ afɔɔ ɔlanle faale di Egipte kasɔ, ni di SAATE Yaa lɛfɔ ladiki fɔ nɛ. Nkpo oso kokpee fɔ kufiofa ko mmle miɛ nɛ.

16 Kafɔɔ nse kpɛmblatɛ lɛfɔ nwu lebuɛ alɛ, "Noomiɛ nlɛ nsifi ndiɛ fɔ," ta ambɔmbɔ ni afɔ ku leyo lɛfɔ kamɛ batii oso, di ɔkyɛ lɛfɔ nlɛ ditɔɔ yi, 17 ni yɔ ofutuwɛ faadufu nwɔ kotoko dibi di kokloo lɛfɔ suoto, ni abakple kpɛmblatɛ lɛfɔ ninaase di dikpiyi nɔɔ. Bla di akpanwu fata ɔsanko kpɛmblatɛ lɛfɔ.

18 Tanta diawɛ fɔ osie alɛ faadiki kpɛmblatɛ lɛfɔ osuku ansifi, diekye ɔkpɛ nɔɔ ɔbla ɔta fɔ alɛɛ akuɔ ya mmle ntɔɔbla fɛ paa-letɛ kablakɔ sɛnyɔ nɔɔ. Ni SAATE Yaa lɛfɔ kamata fɔ lɛtɔtrɔ di ɔsaabla lɛfɔ biala kamɛ.

19 Di banankyue ku bafoso lɛfɔ abi-suɔtɔbi beelofo ni kasale biala kamɛ yi, diki ma fase lete fata SAATE Yaa lɛfɔ. Tanta nankyue-suɔtɔ lɛfɔ kasale beelofo ni labla ɔkpɛ, tan-nwinwɛ kafɔɔ foso lɛfɔ kasale beelofo ni sinwini. 20 Di lɛlɛɛ biala kamɛ afɔ ku leyo lɛfɔ batii biwee ma di SAATE Yaa lɛfɔ anu di lɛba le abadiki antɛ ni. 21 Nse bɔkɛɛ owo nkpe kɔbɔ, ookpintĩ ee anu lɛbiɛ nwɔ ee lɛsaa lɛblɔɔ osie kanya yi, ni diɛkaatɛ fan-yɔ nwɔ fanta oleɔta fanta SAATE Yaa lɛfɔ. 22 Wee sĩ di afɔ omu sekpoo kamɛ. Batii ba niɛbla ni klekle ku mba ninambla ni klekle kafuo ma owee, fɛ nse kakpini ee kafɛ kale. 23 Kafɔɔ diɛkaatɛ biele ntɔ nwu; binyɛɛnɛ mi biwii kaasɔ fɛle ntu.