1 Mose ku Israel banɔɔfo latɔkɔ batii nwu alɛ: "Biklee afiofa ya mmle amuu lɛta ye ni miɛ. 2 Nse bitɔɔtaalɛ Yordan Okle nwu biebuo kasɔ ka di SAATE Yaa lee kɔyɔ anta ye ni, biɛyɔ afuɔ kplɛ awo bise, biekpiitaa nya ku akaaloo. 3 Nse fatɔɔtaalɛ feebuo kasɔ ka di SAATE Yaa lɛfɔ kɔyɔ anta fɔ nii, kpana kufiofa ko mmle kumuu sɛlaa fatika di afuɔ nwu suoto, kasɔ ka di nnyɛɛntu ku bablɔ kubiɛ ninfe ni, fɛle mmle di bawa lɛfɔ Yaa laka ntam aata fɔ nii. 4 Ni nse fɛɛtaalɛ Yordan Okle, faase afuɔ ya mmle di Ebal Kobokote osi, fɛ mmle kɔtɔkɔ fɔ ni miɛ, kpiitaa nya ku akaaloo. 5 Pɛ afuɔ oleɔta akyikye fata SAATE Yaa lɛfɔ ninfa. Tan-yɔ abɔɔsaa lɛkpɛnsaa kuninwii faablako ɔkpɛ ninya suoto. 6 Yɔ afuɔ amuamu ya manankyɛkyɛsɛ ni fapɛ oleɔta akyikye fata SAATE Yaa lɛfɔ, faata ofiɛ asaaɔta ninnya suoto fata SAATE Yaa lɛfɔ. 7 Ta atoko ɔkyɛ ole asaaɔta ninfa, le nya ku suoto lɛyɔɔ ɔnya di SAATE Yaa lɛfɔ anu. 8 Kpana kufiofa ko mmle sɛlaa simuu klekle fatika di afuɔ ya mmle feese ni suoto."

9 Ninfɛ di Mose ku olebatatɛ ba ninle ni Lewi batii latɔkɔ Israel batii bamuu alɛ, "Oo Israel, bilo bienu! Kanunua bitookple SAATE Yaa lee batii. 10 Nioso binu SAATE Yaa lee ɔlaa, bietikanko afiofa ku sɛsaabla nɔɔ se kɔyɔ nta ye ni miɛ."

11 Di dii nwu nkpo kale Mose latɔkɔ batii nwu alɛ:

12 Nse bitɔɔtaalɛ Yordan Okle yi, ana ya mmle ayila di Gerisim Kobokote osi baata batii nwu lɛtɔtrɔ: Simeon, Lewi, Yuda, Isaka, Yosef ku Benyamin. 13 Di ana ya mmle ayila di Ebal Kobokote osi baakpaani: Ruben, Gad, Aser, Sebulon, Dan ku Naftali.

14 Lewi batii babuɛ ku sɛlɔ siene batɔkɔ Israel batii bamuu alɛ:

15 "Bɛɛkpaani otii lele niewola ee ɛɛbla ni lɛbɔɔsaa afiɔ- lɛsaa le ninle ni diyududusaa diɛta ni SAATE nwu, kule ni asaawolatɛ nnɛɛ ɔkpɛ ɔbla- ɛɛyɔ ni eese ni di lewofa kamɛ."

Di batii nwu bamuu batuna alɛ, "Diwa kaanya!"

16 "Bɛɛkpaani otii wɔ ninan-yɔ dibu ata ni ote ee ɔya."

Di batii nwu bamuu batuna alɛ, "Diwa kaanya!"

17 "Bɛɛkpaani otii wɔ niɛkpa ni owo nɔɔ lɛmɛke."

Di batii nwu bamuu batuna alɛ, "Diwa kaanya!"

18 "Bɛɛkpaani otii wɔ nieleko ni numbiɛtɛ katũ ɛɛtɔɔ eeyu ni osuku."

Di batii nwu bamuu batuna alɛ, "Diwa kaanya!"

19 "Bɛɛkpaani otii wɔ ninambuɛ ni ɔlaa di osuku kanya ata ni ɔfɔɔ ee kuɛbi ee kpisɔfɔ di kakankɔ."

Di batii nwu bamuu batuna alɛ, "Diwa kaanya!"

20 "Bɛɛkpaani otii wɔ nietenko ni ote ɔsɔfɔ, ta ɛɛkpɔnɔfɔsa ni ote atensaa oso."

Di batii nwu bamuu batuna alɛ, "Diwa kaanya!"

21 "Bɛɛkpaani otii wɔ nietenko ni bɔkɛɛ lele."

Di batii nwu bamuu batuna alɛ, "Diwa kaanya!"

22 "Bɛɛkpaani osuɔtɔ wɔ nietenko ni oblilɛma sankobi, ale ni ote obisankobi ee ɔya obisankobi."

Di batii nwu bamuu batuna alɛ, "Diwa kaanya!"

23 "Bɛɛkpaani otii wɔ nietenko ni ɔmaato nɔɔ."

Di batii nwu bamuu batuna alɛ, "Diwa kaanya!"

24 "Bɛɛkpaani otii wɔ nielo ni owo nɔɔ di lewofa kamɛ."

Di batii nwu bamuu batuna alɛ, "Diwa kaanya!"

25 "Bɛɛkpaani otii wɔ niefũ ni ditunu kamɛ lɛsaa alɛ ablo ni otii wɔ ninaambla ni okpile."

Di batii nwu bamuu batuna alɛ, "Diwa kaanya!"

26 "Bɛɛkpaani otii wɔ ninaamufũ kufiofa ko mmle sɛlaa ablako ni ɔkpɛ."

Di batii nwu bamuu batuna alɛ, "Diwa kaanya!"