1 Nse fɛɛkyɔɔ kotoko feenu SAATE Yaa lɛfɔ ɔlaa nwaa, feelolaa afiofa nɔɔ amuu lɛta fɔ ni miɛ feetikanko yi, ni SAATE Yaa lɛfɔ kamatakatɛ fɔ katoo fanlenkee nnle mmuu di kasɔ ka mmle nwu suoto. 2 Lɛtɔtrɔ le mmle nimuu kamawa fɔ di suoto, nintikanko fɔ kafɔɔ, nse fɛɛkyɔɔ kotoko feenu SAATE Yaa lɛfɔ ɔlaa:

3 Babata fɔ lɛtɔtrɔ di okpoo ku kofe lefɔ.

4 Babata olofo-fɔtɔ lɛfɔ babi lɛtɔtrɔ ku kasɔ lɛfɔ alesaa ku babɔkɛɛ sele lɛfɔ abi- banankyue lɛfɔ abi ku bafoso lɛfɔ abi.

5 Babata lɛtɔtrɔ kakyikyɛ lɛfɔ ku nnaafũ ɔkɛkɛ lɛfɔ.

6 Babata fɔ lɛtɔtrɔ nse fakpe leeyo, babata fɔ lɛtɔtrɔ nse feedie kayi kafɔɔ.

7 SAATE nwu kamata alɛ fabalenkee balo lɛfɔ ba nimataka manyila fɔ ni di suoto di anu lɛfɔ. Babakye di osuku onwii suoto man-wa fɔ suoto, kafɔɔ babatoso mandiɛ fɔ di esuku ekuɛnsĩ suoto.

8 SAATE nwu kamata lɛtɔtrɔ di alesaa lɛfɔ ntɛkɔ ku lɛsaa biala di kɔnɛɛ lɛfɔ lɛkpanko. SAATE Yaa lɛfɔ kamata fɔ lɛtɔtrɔ di kasɔ ka ɔɔyɔ anta fɔ ni suoto.

9 Nse feele SAATE Yaa lɛfɔ afiofa nwu fɛɛkyɛ di sisuku nɔɔ suoto yi, ni SAATE nwu kamase fɔ fɛle batii nɔɔ klekle, fɛ mmle aaka ntam aatɛ aata fɔ nii. 10 Ni kayi ka mmle batii bamuu kamanya alɛ SAATE nwu leyooto bɔɔlɛɛ fɔ, ni babayɛkɛ fɔ. 11 SAATE nwu kamata lɛsaawɛ lɛfɔ mpɔ- di olofo-fɔtɔ lɛfɔ kamɛ babi, babɔkɛɛ sele lɛfɔ abi ku kasɔ lɛfɔ alesaa- di kasɔ ka suoto aaka ntam aata ni bawa lɛfɔ alɛ abayɔ anta fɔ nii.

12 SAATE nwu kamasɛkɛtɛ osi, lɛsaawɛ nɔɔ asaakatɛkɔ leyo, anta kanto nnɔɔ di kasɔ lɛfɔ suoto di obe kanya, anta lɛtɔtrɔ kafɔɔ di nnɛɛ lɛfɔ ɔkpɛ omuu kamɛ. Fabafɛnsa asaa fanta nnle kpinwu, kafɔɔ afɔ flɔbafɛnsa fakyeko kuonwii nfũ. 13 SAATE nwu kamayɔ fɔ ambla disi, diele ɔkà. Nse fɛɛkyɔɔ atoko feele SAATE Yaa lɛfɔ afiofa ya kɔta fɔ ni miɛ dii le mmle, feelolaa nya feetikanko nwaa kafɔɔ yi, ni obe lele fabatika di osi, diidii flɔbate kasɔ. 14 Tankyi di afiofa ya mmle kɔta fɔ ni miɛ kuanwii suoto, faafe koletanɛɛkyɛ ee kɔmɛntukyɛ, faalaatikanko bayaa bamba falaatoosumu ma kafɔɔ.

15 Kafɔɔ, nse faakyɔɔ SAATE Yaa lɛfɔ ɔlaa atoko, fananlolaa afiofa ku sɛsaabla nɔɔ se simuu kɔta fɔ ni miɛ fale yi, ni akpaani ya mmle amuu kamawa fɔ di suoto nimalenkee fɔ nnɛɛ:

16 Babakpaani fɔ di okpoo, mankpaani fɔ di kofe.

17 Babakpaani kakyikyɛ ku nnaafũ ɔkɛkɛ lɛfɔ.

18 Babakpaani olofo-fɔtɔ lɛfɔ babi ku kasɔ lɛfɔ alesaa ku banankyue lɛfɔ abi ku bafoso lɛfɔ abi.

19 Babakpaani fɔ nse fakpe leeyo, babakpaani fɔ nse feedie kayi kafɔɔ.

20 SAATE nwu kamata lɛkpaani, kakpɔkpɔtɔ ku disi obu n-wa di suoto lɛfɔ di lɛsaa biala di kɔnɛɛ lɛfɔ lɛkpanko, ninaase di obe wɔ fabawɔɔ, fanfua fampɛ ni kaasɔ, ta okpile wɔ fɛɛbla, feesĩ nwɔ ni oso. 21 SAATE nwu kamata sifiɛ kpile mpɛ fɔ ninaase di obe wɔ atɔɔwɔɔsa fɔ ni di kasɔ ka fababuo fannaayɔ ni suoto. 22 SAATE nwu kamata okoso-fiɛ, kɔbɔ̀ ku adiesaa ku difila kpankpa ku koleele n-wa di suoto lɛfɔ, anta asaa lɛfɔ nkpi ambuu ninta ninkpɛko fɔ ninaase di obe wɔ fabakpi nii. 23 Kolo ko di disi lɛfɔ osi kamaklee kumbla fɛle abɔɔsaa sɛɛle, kasɔ di nkpaa lɛfɔ kalɔ kamaklee kambla kekleke fɛle lɛbɔɔsaa. 24 SAATE nwu kamata kanto nkyi ambla kudu ku mpu di kasɔ lɛfɔ suoto; abakye kolo an-wa kasɔ ninaase di obe wɔ fɛɛwɔɔ nii. 25 SAATE nwu kamata manlenkee fɔ di balo lɛfɔ anu. Fabakye di osuku onwii suoto fankyɛ ɔkyɛ lɛma, kafɔɔ fabatoso di esuku ekuɛnsĩ suoto fandiɛ ma, n-se fatookple lɛyɛkɛsaa fɛɛta sɛka nlekɔ mmuu di kasɔ ka mmle suoto. 26 Kpi lɛfɔ kamale alesaa anta bakansiɛ bamuu di kɔfɛɛfɔ ku babɔkɛɛ ba di kasɔ suoto, kuonwii kafɔɔ dilɔbawɛ abayɛkɛsa ma mantoso nii. 27 SAATE nwu kamata Egipte adiesaa nwu okle ku adiesaa kplɛ ndie fɔ, akpaakuu ku oduɔfɔ ndie fɔ, manamafuo fɔ ni ofiɛ ɔkyà diidii. 28 SAATE nwu kamata fɔ difĩibuo, anu obiɛ ku disi kamɛ ɔkpɔkpɔtɔ. 29 Fabatɔɔpɛpɛɛ nnɛɛ fantoofenfe ku kakũ fɛle numbiɛtɛ di ditunu kamɛ. Lɛsaa biala fɛɛbla dilɔbalɛ dita fɔ; dii biala babanyinka fɔ, man-yu fɔ asaa, di kuonwii dilɔbawɛ abafũ fɔ nii.

30 Fabakaalɛ ɔsanko falɛ fɔɔyɔ, kafɔɔ osuɔtɔ bamba kamatenko nwɔ. Fabatofo leyo, kafɔɔ flɔbasiɛ nini kamɛ. Fabakpɛ awosobi kofe, kafɔɔ bia flɔbale nya abi. 31 Babalo nankyue lɛfɔ di anu lɛfɔ fan-nya, kafɔɔ flɔbawee sina nɔɔ kusinwii. Babayɔ osie manfũ bɔkɛɛ lɛfɔ wɔ nintuka ni atoo di nnɛɛ lɛfɔ, blɔbasinkplesa bawako fɔ kafɔɔ. Babayɔ bafoso lɛfɔ manta balo lɛfɔ, di kuonwii dilɔbafũ ma ata fɔ nii. 32 Babayɔ babisuɔtɔbi lɛfɔ ku babisankobi lɛfɔ manta nnle bamba, dii biala fabayɔ anu fantɛ fantoonyu osuku nimbuo fɔ, kafɔɔ ɔnyɛɛ dilɔbawɛ fɔ fabadiki ni kɔkpaa. 33 Batii ba fanaan-ye ni nimale kasɔ ku dibuo lɛfɔ alesaa ya fɛɛkpɛ nii. Flɔbawɛ lɛsalɛsaa, kafɔɔ babanyinka fɔ mambla fɔ amumu di ayi lɛfɔ amuu kamɛ. 34 Asaa ya fɔnyanyaa ni kamata fɔ fambuo afĩi. 35 SAATE nwu kamata adiesaa ndie fɔ di akunkyi ku nkpaa ku dibuo manamafuo fɔ ni ɔkyà, dibakpɛ ninkye di nkpaasɔ lɛfɔ ninsifi disi lɛfɔ.

36 SAATE nwu kamakpaa afɔ ku ɔka wɔ feese fɛɛta ni suoto lɛfɔ ansifiko kale ka fanaaye ee bate lɛfɔ dieye nii. Nfa fabasumu bayaa bamba nɛ, bayaa ba ninle ni awosoku ku afuɔ. 37 Fabakple lɛyɛkɛsaa ku ɔfɔ̀ɔ-disifisaa ku lɛmansaa fanta nnle be mmuu di SAATE nwu kamakpaa fɔ ansifiko nii.

38 Fabapɛ asaa kpinwu di kofe, kafɔɔ kɛɛkɛɛ ko fabawɛ, diekye balososo kamawee nya. 39 Fabakpɛ awosobi kofe fannyu nya disi, kafɔɔ flɔbanyi nya nta ee fatɛsɛ nya, diekye akudikudi kamale nya. 40 Fabawɛ nnɔnyi awoso afe di kale lɛfɔ kamuu, kafɔɔ flɔbablako nnɔnyi nwu ɔkpɛ, diekye abi nwu kamakpakpaa an-wii. 41 Fabawɛ babisuɔtɔbi ku babisankobi kafɔɔ flɔbale ma, diekye babasifi sɛlanle kamɛ. 42 Balososo sɛlambu kamayɔ awoso lɛfɔ ku alesaa ya amuu fɛɛkpɛ ni di kasɔ lɛfɔ.

43 Ɔfɔɔ wɔ ninsi ni di ɔkyɛ lɛfɔ kamataka katoo fanfã anlenkee fɔ, kafɔɔ afɔ fabawakasɔ lɛkɛtɛɛ. 44 Abata fɔ asaa fanfɛnsa, kafɔɔ afɔ flɔbatɔɔ kɔfɛnsa. Abale disi, kafɔɔ afɔ fabale ɔkà.

45 Akpaani ya mmle amuu kamawa di suoto lɛfɔ. Abatikanko fɔ ankpɛko fɔ ninaase di obe wɔ abawɔɔsa fɔ nii. Diekye fatakyɔɔ SAATE Yaa lɛfɔ ɔlaa atoko, fale afiofa nɔɔ, fakyɛ di sisuku nɔɔ se ɛɛta fɔ ni suoto. 46 Abale dituosaa ku lɛsaa le niɛbla ni ɔkpɛ anta afɔ ku banantii lɛfɔ dinaa ni kaloo. 47 Diekye fatasumu SAATE Yaa lɛfɔ ku suoto lɛyɔɔ ku lɛpɔ̀ di obe wɔ kamɛ faale ni saawɛntɛ, 48 nioso fabasumu balo lɛfɔ ba di SAATE nwu lediki eekpee fɔ ni di kɔka ku otukɔnsɔ, lɛkyɔtɔ ku dipii nimu kamɛ. Abayɔ lɛbɔɔsaa ankpee fɔ siimu ninaase di obe wɔ abawɔɔsa fɔ nii.

49 SAATE nwu kamadiki kale fanfa batii ankpee fɔ, ankyeko kasɔ n-yɛntɛlekɔ, fɛle klikpo nikosoo an-wa ni kasɔ, kale ka sele fɔnɔbanu nii, 50 kale ka niɛbla ni yakayaka banaa ni dibu bɛɛta ni banɔɔfo ee banya ni babisɔ nyaami. 51 Bababɛbɛɛ babɔkɛɛ sele lɛfɔ abi ku kasɔ lɛfɔ alesaa ninaase di obe wɔ fabawɔɔ nii. Blɔbabu fɔ alesaa kuanwii, nta fɔle ee nnɔnyi ee banankyue abi kuanwii di banankyue lɛfɔ kamɛ ee afosobi di bafoso lɛfɔ kamɛ ninaase di obe wɔ fɛɛwɔɔ nii. 52 Babamana mankyi sekpoo kplɛ nwu simuu di kasɔ lɛfɔ nwu ninaase di obe wɔ di siyoyiɛ takale siene lɛfɔ nwu feetika ni disi kamabiɛ simpɛ ni kaasɔ. Babamana mankyi sekpoo kplɛ simuu di kasɔ ka di SAATE Yaa lɛfɔ kɔyɔ anta fɔ nii.

53 Ta dibuo le di balo lɛfɔ kamata fɔ ni di obe wɔ bɛɛmana fɔ beekyi ni oso yi, fabawee olofo-fɔtɔ lɛfɔ babi, babisuɔtɔbi ku babisankobi ba di SAATE Yaa lɛfɔ lɛta fɔ ni suoto sina. 54 Bia osuɔtɔ wɔ niɛtɛ ate ni buɛɛ, ɛɛyɔ nwu ni olè di kamɛ lee dilɔbanya obilɛma omu ee ɔsɔfɔ nɔɔ wɔ ambɔmbɔ ni ee babi nɔɔ ba niebu basi ni nkpa nyaami, 55 ɔlɔbata kafɔɔ kuonwii lɛma babi nɔɔ sina se oowee ni sewo. Diekye sina nwu lete ninle nle eebu ni nɛ, ta dibuo le di balo lɛfɔ kamata fɔ ni di obe wɔ bɛɛmana sekpoo kplɛ lɛfɔ nwu simuu beekyi ni oso. 56 Ɔsanko wɔ niɛtɛ ate ni buɛɛ, ɛɛyɔ nwu ni olè di kamɛ lee- ta ɛɛyɔ nwu ni olè, ate ni buɛɛ oso yi, ɔlɔbatɔkɔ alɛ ɔɔyɔ kakpaasɔ nɔɔ ankaasa kaasɔ- abanya ɔblɔ ankpeeko ɔsa wɔ ambɔmbɔ ni ku obisuɔtɔbi ee obisankobi nɔɔ omu, 57 obi lekpomii di olofo-fɔtɔ nɔɔ kamɛ ku babi ba eelofo nii. Diekye ɛɛtɛ alɛ abawee ma di lewofa kamɛ di obe wɔ di ɔmana okyi nwu ku dibuo le di lo nwu kamata fɔ ni di sekpoo kplɛ lɛfɔ nwu kamɛ.

58 Nse faalolaa kufiofa ko mmle sɛlaa simuu bɛɛkpana ni di kukũ ko mmle kamɛ fatikanko, fanaayɛkɛ dibu ku leyooto yɛkɛle le mmle- ninle ni SAATE Yaa lɛfɔ yi- 59 ni SAATE nwu kamata sifiɛ yɛkɛle di kanya nisĩ nkpe ni osie ku sɛlaa otũ ninklɛ ni ku sifiɛ se ninan-yɔɔ ni wla mpɛ afɔ ku banantii lɛfɔ. 60 SAATE nwu kamayɔ sifiɛ se simuu faayɛkɛ ni di Egipte antika fɔ, sinka di suoto lɛfɔ. 61 SAATE nwu kafɔɔ kamakple an-yɔ ofiɛ biala lele ku kayi anyasaa ya manankpana bakpee ni di Kufiofa Kukũ ko mmle kamɛ antika fɔ di suoto, ninaase di obe wɔ babawɔɔsa fɔ nii. 62 Aye ba niapɔ ni fɛle awɛntrɛbi di kolo, kafui lee nfɛ nimabu di lɛpɔ̀ kanya, diekye bitakyɔɔ SAATE Yaa lee ɔlaa koto. 63 Fɛle mmle okle diɛsiɛko ni SAATE nwu alɛ aata ninlɛ ye, minkpɛ ni di lɛpɔ̀ kanya yi, nkpo kafɔɔ dibasiɛko nwɔ anta ye mimpɛ kaasɔ anwɔɔsa ye nɛ. Abasifi ye andiki di kasɔ nwu biofe ni ɔlaayɔ suoto.

64 N-se SAATE nwu ntɔɔsamisa ye eekpee di nnle mmuu kamɛ, diɛyɔ ni di kasɔ disi le diɛlaase ni di kasɔ disi le. Nfa biɔwa bayaa bamba- bale ni awosoku ku afuɔ osumu nɛ. Bayaa ba di aye ee bate lee ditatofo nii. 65 Bilɔbawɛ suoto lɛyɔɔ di nnle nwu nkpo kamɛ, ɔnyɛɛ katɛkɔ dilɔbawɛ dita nkpaasɔ lee. SAATE nwu kamata nfa lee osiɛ nta-ye disibu, anu ditikasaa kuninwii dilɔbasinwɛ, bilɔbasinwɛ otu lee dibiesaa. 66 Ɔ̀fɔɔ kamatosisifi ye, minsiɛ di difu kamɛ kakũ ku kakyɛ, nkpa lee disiɛbi dilɔbabudi ye kɔmɛ diidii. 67 Bibabuɛ ku olesɛ bilɛ, "Nse fɛle kɔtɔɔfɔ dile!" kɔtɔɔfɔ kafɔɔ mimbuɛ bilɛ, "Nse fɛle olesɛ dile!"- Ta lɛyɛkɛ le nimasiɛ ni di situ lee kamɛ ku anyasaa ya di anu lee kamanya ni oso. 68 SAATE nwu kamakplesa ye ansifiko Egipte di seklo kplɛ kamɛ, osuku wɔ labuɛ nlɛ bitansinkyɛ ni diidii. Nfa bibayɔ suoto lee minsunsũ minta balo lee fɛ basuɔtɔ ku basanko balanle nɛ, kafɔɔ kuonwii dilɔbaya ye.