5 Kwaviya, wada wekaisao inga via mwii ukundavyo, waongweewa na mwii. Akini wada wekaisao inga via Muye wa Muungu ukundavyo, waongweewa na Muye wa Muungu. 6 Wantu wamzumiiao kuongoewa na mamakhanyi za mwii weetea ufe, akini wantu wamzumiiao kuongoewa na mamakhanyi za Muye weetea ugima na utuiivu. 7 Kwaviya mntu aongweewae na mamakhanyi za mwii ni khondo kwa Muungu, kwaajii mwii khautegeeza miko ya Muungu, naho khaudaha kuitegeeza. 8 Wantu wategeezao via mwii ukundavyo khawadaha kugosoa yada yakundwayo ni Muungu.

9 Akini ikawa Muye wa Muungu uumo mwenu nywie khamnamtegeeze via mwii ukundavyo iya mwamtegeeza Muye wa Muungu via akundavyo naho yoyose esayekuwa na Muye wa Klistu, uyo khio mntu wa Klistu.

1 Ivyo, khahana sugusa kwa wada ambao wekazi wao waungana na Yesu Klistu. 2 Kwaviya, miko ya Muye iyetayo ugima kwa kuungana na Klistu Yesu iniohowa mwe miko ya mavigaviga na ufe. 3 Muungu kagosoa mbui ida ambayo miko khaikudaha kugosoa kwaajii ya wantu khatina udaho. Muungu nee kamuagiiya mwanawe akawa na mwii inga wetu. 4 Muungu nee agosoa ivi tidahe kwekaa inga via miko ikundavyo. Isasa tadaha kwekaisa kwa kuongoewa na Muye wa Muungu na khio kwakuongoewa na mii yetu ya mavigaviga.

13 Kwaviya inga mkekaa kwa kugosoa via mwii ukundavyo kwei mwendamuuye na nyuma, akini mkekaa kwa kugosoa inga via Muye ukundavyo, mwendamuwe mwayakoma mbui zenu za mavigaviga, aho mwendamwekae. 14 Kwaviya wose waongoewao na Muye wa Muungu, awo nee wana wa Muungu.

21 Naho naikauwa miko inu igosoavyo ndima, nikundaho kugosoa dekuwado dedi akini nagosoa dia dekuwado fyaimi. 22 Kwaviya nina untu mhya nina nyemi na miko ya Muungu. 23 Akini naona kuwa kuna miko mituhu igosoayo ndima mwe mwii wangu, miko ihiganayo na ida miko ikundigwayo na akii yangu. Iyo yanitenda niwe mtumwa wa miko ya mavigaviga yagosoayo ndima mwe mwii wangu.

5 Kwaviya tekuwaho taongweewa na mii yetu, khwiina za mavigaviga nee zasongeezwa na miko na kugosoa ndima mwe mii yetu, na yose tekugosoayo yaheeya mwe ufe.

6 Mntu avyaigwa kimwii kwa tate na mmaa, akini ugosolwa kuwa Mwana wa Muungu na Muye wa Muungu.

63 Muye wa Muungu nee uetao ugima, mwii khauna udaho wakugosoa kintu. Mbui nekuwagombekazo zalawa kwa Muye wa Muungu na yaeta ugima.

16 Kwa iyo nagombeka, ekaeni kwa kuongoewe na Muye wa Muungu, ivyo khamna mwekae kwa kubasa khwiina za mwii.

19 Naho ntendwa za mwii ni izi, ukianga, na ukibebe, na ubakha, na kugosoa ntendwa za soni. 20 Kuvika vizuu, na usawi, kukimana, na khumbizi, na kinyuu, na maya na uchoyo na mahigano na kubauwana, 21 kukima watuhu, na ukozi, na umeo, na mbui ntuhu inga izo. Nawagombeka vituhu inga nekubindavyo kugombeka, wantu wagosoao mbui izo khanawaupate useuta wa Muungu uwe wao.

24 Wada wekuunganao na Klistu waigong’ondea mii yao hamwe na mamaakhanyi zao na khwiina zao fyaimi.

13 Wandugu zangu nee mwetangwa ili muwe waekewa, ivyo mwesekutumia kuekewa kwenu inga sia ya kubasa khwiina za mwii, naho ambizaneni kwa ukundiso.

8 Mntu akundisae khwiina zakwe za Inusi, mntu uyo endaadagamizwe, akini atongeaye Muye wa Muungu endaapate ugima wa misi yose zesazo kisiikizi kulawa kwakwe.

16 Mbui za ufyaimi za mwe inusi nee izi, khwiina fyaimi za mwii, na khwiina kwa yada mafyaimi tiyaonayo, na kwevunia vintu tekuwavyo navyo, aya yose khayalawa kwa Tate, iya yalawa mwe inusi.

11 Mwekuunganaho na Klistu nemuwa inga mgwisa, khio kwa kugwisa na wantu, iya kwa ugwiso wa Klistu mwenye ambae kawalavya mwe asii ya mavigaviga.

41 Msekugona iya vikani msekweza kwengia mwe mageezo. Kwaviya muye wakunda akini mwii unyong’onyea."

50 Ivyo wandugu zangu nagombeka ivi, mwii wa phome na nyama khaudaha kwengia mwe Useuta wa Muungu, na kia kibanikacho khakidaha kuwa na ugima wa misi yose kwesiho kisiikizi.