1 Klistu katiika hulu, ili tisekuwa watumwa, Ivyo gookeni kwa untintimavu naho msekuzumiiya vituhu kuongoewa na utumwa.

2 Tegeezani! Ni miye Paolo nagombeka nywie! Inga mkazumiiya kugwiswa ili mzumiiwe he meso ya Muungu, ivyo yada Klistu ekugosoayo kwaajii yenu khio kintu. 3 Navuhuzia vituhu na kiya yumwe azumiiaye kugwiswa akundigwa kutoza miagiiyo yose ya Muungu ekumwekhae Musa. 4 Inga mwakauwiya kuzumiwa na Muungu kwa sia ya kutoza miagiiyo, aho mweika hae na Klistu, na mubada wedi wa Muungu. 5 Akini kwetu swie tagojea kwa makauwiyo kwa udaho wa Muye wa Muungu tizumiiwe he meso ya Muungu kwa sia ya kumzumiiya Klistu. 6 Kwaviya mwe kuungana na Klistu Yesu, kugwiswa na kutokugwiswa khahana mana, kintu kikuu ni kuzumiiya kwako na kudaha kuwakundisa watuhu.

7 Yada mwekugosoayo aho bosi nee ni matana! Nindai mwekuwakindia msekutegeeza ukwei? 8 Mabibiizo ya mbai iyo khayalawa kwa Muungu ekuwetangae. 9 Wantu wagombeka, "Hamila kidodo du waumua unga wose!" 10 Kwaajii ya kuwa nywie muungana na Zumbe Yesu, namanya khiogoha, khamnambase mbui za wantu watuhu, akini mwendambase mbui zangu. Iya yoyose endaeawapishe nywie, kwei endaeze kuamuiwa, ata inga awe ndai.

11 Akini wandugu zangu inga miye nike nawabiikia kuusu kugwiswa, kwa mbwai nike nasuumizwa? Inga kwei nee kiendeea kubiikia wantu wakundigwa kugwiswa, mabiikizi yangu kwa mbui ya mhamba wa Klistu wantu nee khawekukimwa. 12 Natamiwa wantu awo wawapishao wegwise wenye adi watendwe kuwa mabunyenge.

13 Wandugu zangu nee mwetangwa ili muwe waekewa, ivyo mwesekutumia kuekewa kwenu inga sia ya kubasa khwiina za mwii, naho ambizaneni kwa ukundiso. 14 Kwaviya miagiiyo yose iigania mwe mwiko umwe, "Mkundise mmbuya wako inga viya wekundisavyo wee mwenye." 15 Akini ikawa mwekaa inga wanyama wazubuanavyo na kuumana, ekaeni hae msekweza mkadagamizana.

16 Kwa iyo nagombeka, ekaeni kwa kuongoewe na Muye wa Muungu, ivyo khamna mwekae kwa kubasa khwiina za mwii. 17 Kwaviya, khwiina za mwii zahigana na mbui zikundigwazo na Muye, na mbui zikundigwazo na Muye zahigana na khwiina za mwii. Mbui izo mbii khaziivana, kwaajii iyo khamdaha kugosoa yada myakundayo nywinywi wenye. 18 Akini inga mkaongoewa na Muye wa Muungu, khamna muwe watumwa wa miagiiyo.

19 Naho ntendwa za mwii ni izi, ukianga, na ukibebe, na ubakha, na kugosoa ntendwa za soni. 20 Kuvika vizuu, na usawi, kukimana, na khumbizi, na kinyuu, na maya na uchoyo na mahigano na kubauwana, 21 kukima watuhu, na ukozi, na umeo, na mbui ntuhu inga izo. Nawagombeka vituhu inga nekubindavyo kugombeka, wantu wagosoao mbui izo khanawaupate useuta wa Muungu uwe wao.

22 Akini mkaongoewa na Muye yee endaawatende muwe na ukundiso, nyemi na uivanisi, na uzizimizi, na wedi na kuwagosoea yekuwayo yedi watuhu, na kuzumiiwa na watuhu, 23 uhuhusi na kwekindia mbui. Khahana miagiiyo idahayo kugombeka mbui izo ni fyaimi. 24 Wada wekuunganao na Klistu waigong'ondea mii yao hamwe na mamaakhanyi zao na khwiina zao fyaimi. 25 Tekaa kwa kuambizwa na Muye, naho tibade Muye ationgoee. 26 Tisekwefena bue, na kusongeezana na kuoneana kinyuuu.