1 Nywie wantu wa Galatia muwa wahezi kwei! Ni ndai ekuwalogae? Mbui ya Yesu Klistu ya kugong'ondewa he mhamba igombeka pwii hemeso yenu. 2 Nakunda kumanya du kintu kimwe kulawa kwenu. Ivi mhokea Muye wa Muungu kwaajii ya kuiganiza ikundavyo miagiiyo ama kwaajii ya kuitegeeza na kuizumiiya Mbui Yedi? 3 Ivi, nywie ni wahezi ivyo? Nywie mvoka yose kwa uwambizi wa Muye wa Muungu, ivi, mwakunda isasa kubinda kwa mwii? 4 Ivi, masuumizo yada yose yekuwapatayo nywie yawa ya bue du? Khaidahika khayekuwa ya bue. 5 Ivi, Muungu kawekha Muye wakwe na kugosoa vihii gatigati yenu, kwaajii mwaiganiza yakundigwayo na miagiiyo, hambu kwaajii mtegeeza Mbui Yedi na kuizumiiya? 6 Mamaakhanyani mbui ya Ibulahimu, Maandiko ya Muungu yamba, "Yee nee kamzumiiya Muungu, naye Muungu akamzumiya inga mntu agosoaye yamtamizayo." 7 Ivyo manyeni wantu wamzumiiyao Klistu, nee wana wa kwei wa Ibulahimu. 8 Maandiko ya Muungu nee yaonyesha kuwa wantu wesaokuwa Wayahudi wendawazumiiwe na Muungu mwenye kwa sia ya kuzumiiya. Ivyo Maandiko ya Muungu nee yaongweea kumbiikia Ibulahimu Mbui Yedi, "Kwembokea wee wantu wa si zose wendawajaiwe." 9 Kwaajii inu, wada wose wazumiiyao wendawajaiwe hamwe na Ibulahimu mntu azumiiaye.

10 Akini wabadiwa lazi wada wose wageezao kumtamiza Muungu kwa kutoza miagiiyo, kwaviya Maandiko yagombeka, "Mntu yoyose esaekutoza na kugosoa yada yose yekuandikwayo mwe kitabu cha miagiiyo ya Musa endaabadiwe lazi." 11 Tamanya kuwa miagiiyo khaidaha kumtenda mntu kuzumiiwa na Muungu, kwaviya Maandiko yagombeka, "Mntu azumiwaye na Muungu endaekae kwa kunizumiiya." 12 Akini miagiiyo khaikauwiiya uzumizi iya Maandiko yagombeka, "Mntu mwiiganizae yakundigwayo na miagiiyo, endaekhigwe ugima kwa kutegeeza miagiiyo." 13 Klistu nee katiohowa kulawa mwe kubadiwa lazi ya miagiiyo kwa kwedoeya lazi iyo yee mwenye kwaajii yetu, kwaviya iyandikwa, "Endaabadiwe lazi kia yuda ekung'ong'ondewae he mhamba." 14 Katiohoa ili majaiwa ekumwekhayo Ibulahimu yawabuiye wantu wesaokuwa Wayahudi kwa sia ya Klistu Yesu, ili kwakuzumiiya swie wose tidahe kumhokea Muye wa Muungu ambaye Muungu mwenye nee katiikia kiaga kutekha.

15 Wandugu zangu mwe kuzumiiya, nakunda nilavye msimo kulawa kwa kwekaa kwetu kiya msi. Mamaakhanyani myevano kwa wantu waidi. Myevano ukabinda kugosoka na kugewa saini khahana mntu adahae kuuwika khandai na kuomeeya kintu. 16 Naho Ibulahimu nee khekigwa kiaga, yee hamwe na uvyao wakwe. Maandiko khayagombeka kuwa, "Na uvyazi wakwe," yani wangi, iya yagombeka, "Na uvyao wakwe," yani yumwe, nae nee Klistu. 17 Nikundacho kugombeka ni kuwa, Muungu kaika Diyagane dakwe myaka magana mane na makumi matatu kabla ya miagiiyo ya Musa na kudionyesha, naho miagiiyo iyo khaidaha kuhitua na kuusa kiaga ambacho Muungu nee kaika. 18 Kwaviya inga funge ya Muungu yakauwiya miagiiyo, naho khaidaha kukauwiya vituhu kiaga cha Muungu, akini Muungu kwa wedi wakwe nee kamwekha Ibulahimu funge kwaajii nee kawekha kiaga. 19 Ivyo kwa mbwai miagiiyo ietwa? Miagiiyo nee iyetigwa kwaajii ya kuonyesha mavigaviga ya wantu adi endahoeze yuda mzawa wa Ibulahimu ambae Muungu nee kaika kiaga kuwa endaeze. Miagiiyo iyo Muungu nee kamwekha Musa kwembokea wandima wa uwanga kwa Muungu, na Musa akawa gatigati kuwaivanisa wantu na Muungu. 20 Naho mwivanisi kuusisha zaidi ya uphande umwe, akini Muungu ni yumwe.

21 Ivi, miagiiyo yahigana na viaga vya Muungu? Bue! Kwaviya, inga nee kulavigwa miagiiyo ambao nee idaha kuwekha wantu ugima, ivyo nee kadaha kutizumiiya kwembokea miagiiyo. 22 Akini Maandiko ya Muungu yagombeka wantu wose waasi ya uwongweezi wa mavigaviga, ili wada wose wekumzumiiayo Yesu Klistu wahokee kiaga cha Muungu.

23 Kabla ya wantu kumzumiiya Klistu, miagiiyo ititenda watumwa nee tikagoja kisingi ambacho uzumizi mwe Klistu Yesu igubulwe. 24 Ivyo miagiiyo itiongoeya inga mgookezi wetu adi ekwezaho Klistu, ili kwa sia ya kumzumiiya Klistu, tidahe kutaaziwa inga wantu tekuzumiiwao na Muungu. 25 Akini isasa kwaviya kumzumiiya Klistu kubuwa kae, khatigookewa vituhu na miagiiyo ambayo nee yationgoeya.

26 Kwa sia ya kumzumiiya Klistu, nywie nyose muwa wana wa Muungu kwa kuungana na Klistu Yesu. 27 Nywie nyose mwekubatiizwao muungana na Klistu ni inga viya mumvaa Klistu. 28 Ivyo, khahana vituhu tofauti gatigati ya Myahudi wala Mgiiki, mtumwa wala mntu esaekuwa mtumwa, mgosi wala mvyee. Wose ni kintu kimwe kwa kuungana na Klistu Yesu. 29 Nywie ni wantu wa Klistu, ivyo muwa wana wa Ibulahimu, nanywi mwendamuhokee yada Muungu ekuwaikiayo kiaga.