1 Yekwembokaho myaka kumi dimwe na nne, nee naita vituhu Yelusalemu hamwe na Balinaba, viyaviya nikamdoa na Tito. 2 Nee nikaita kuda kwaviya Muungu nee kanigubuiya kuwa niite uko. Tekuwaho he mkonga miye na waongoezi du, nikawamba Mbui Yedi nekuwabiikiayo wantu wesaokuwa Wayahudi. Kigosoa ivyo ili ndima nekugosoayo na nigosoayo, isikweza ikawa ya bue. 3 Akini Tito ekuwaye hamwe na miye, ambae ni Mgiiki khekushuutizwa kugwiswa. 4 Etiho nekuwa na wandugu watuhu wa uhokho wekukundao agwiswe. Wantu awo nee wengiza kwa unyanyi na kuondeza kupata mbui kuusu kuekewa kwetu tekuwao nao mwe kuwa kintu kimwe na Klistu Yesu, ili wadahe kutigosoa watumwa. 5 Khatekukunda katu iwe ivyo ili ukwei wa Mbui Yedi usigae na nywie misi yose.

6 Akini wada waongoezi watunywao muno na wantu, khawekuwa na mbui mhya ya kunigombeka kwaviya Muungu khana ubahuzi, ivyo miye chekupatiiza uwongoezi wao. 7 Akini waongoezi awa waona kuwa Muungu kanekha ndima ya kubiikia Mbui Yedi kwa wesao kugwiswa, inga viya ekumwagiiavyo na akazumiiwa Petulo kubiikia Mbui Yedi kwa wekuwao wagwiswa. 8 Kwaviya, Muungu ekumtendae Petulo kuwa mwagiiwa kwa Wayahudi, nee ekunitandae niwe mwagiiwa kwa wantu wesaokuwa Wayahudi ambao khawekugwiswa. 9 Naho, Yakobo na Kefa na Yohana ambao waonekana inga mihindo ya mazumwezumwe ya wantu mamzumiiyao Klistu, nee wamanya kuwa Muungu, nee kanijaiya wedi wa kugosoa ndima inu. Kwa ivyo wakatitoza mikono miye na Balinaba, iwe inga ntangio ya kuwa hamwe na swie, tikazumiyana miye na Balinaba tibiikie kwa wantu wesaokuwa Wayahudi ambao khawekugwiswa na wowo wabiikie kwa Wayahudi. 10 Wakatiombeza kintu kimwe, tiwakumbuke wakiwa, mbui ambayo nee khiwa nagosoa kiya nidahado kudigosoa tangia aho bosi.

11 Akini Petulo ekubuwaho mzi wa Antiokia, miye nee namuwakia he meso ya wantu kwaajii nee kagosoa mbui fyaimi. 12 Kwaviya aho bosi Petulo nekawa akada na wantu wesaokuwa Wayahudi, akini wekwezaho wamwe wa wantu kulawa kwa Yakobo akabada kuda nao. Kagosoa ivyo kwa kuogoha wantu awo ambao newawa wagombeka yakundigwa wantu wekumzumiiyao Yesu wagwiswe. 13 Ata Wayahudi watuhu wekuzumiyao wakagosoa inga Petulo mwe mbui iyo yautiizi, na wakamtenda Balinaba kuwa mtiizi inga wao. 14 Nekuonaho kuwa khawaita viyaviya na ukwei wa Mbui Yedi, nee namgombeka Kefa he meso ya wose, "Wee ni Myahudi, nawe wekaa inga mntu esayekuwa Myahudi, na khio inga Myahudi. Iwa viivihi wawagombeka wantu wesaokuwa Wayahudi wekae inga Wayahudi."

15 Kwei swie ni Wayahudi kwa kuvyaigwa, na khio inga wantu wesaokuwa Wayahudi wenye mavigaviga. 16 Akini, tamanya haika kuwa mntu khadaha kuzumiiwa na Muungu kwa kuibasa miagiiyo ya Musa, iya kwa kumzumiia Yesu Klistu. Na swie timzumiiya Yesu Klistu ili tizumiiwe na Muungu kwa sia ya kumzumiiya Klistu, na khio kwa kuitongea miagiiyo ya Musa. 17 Ikawa mwe kuondeza kuzumiwa ni Muungu kwa kuungana na Klistu swie taonekana kuwa wenye mavigaviga, ivi mbui inu ina mana kuwa Klistu atiambiza kugosoa mavigaviga? Khivyo ivyo ata kidodo! 18 Akini ikawa nazumiiya vituhu mazweeya ya kae kwa kutoza miagiiyo iyo, Aho kwei nendaniwe mgosoa mavigaviga. 19 Kwaviya kwa mbui ya miagiiyo, miye kiuya na nyuma mwe mbui za miagiiyo, ili nidahe kwekaa kwaajii ya Muungu, miye kiuya na nyuma hamwe na Klistu he mhamba, 20 na isasa nekaa, khio inga nekuwavyo aho kae iya ni Klistu ekaae umu mwangu. Ugima nekuwao nao isasa mwe mwii kwa kuzumiiya, kwa kumzumiiya Mwana wa Muungu ekunikundisae ata akalavya ugima wakwe kwaajii yangu. 21 Khikunda kuemea wedi wa Muungu. Inga mntu azumiiwa ni Muungu kwa sia ya miagiiyo, aho Klistu nee kauya na nyuma bue!