1 Miye Paolo nekuwae mwagiiwa nekuandikae bauwa inu, khio mwagiiwa nekuagiiwaye na wantu, naho khio kwa nguvu za wantu, iya kwa udaho wa Yesu Klistu na wa Muungu Tate ekumyuyusae Yesu. 2 Miye na wandugu wose wekuwao hamwe na miye tayaugusa mazumwezumwe ya wantu wamzumiiyao Klistu ya uko Galatia.

3 Tamuombeza Muungu Tati yetu awekhe wedi na uivanisa kulawa kwa Zumbe Yesu Klistu.

4 Ekwelavyae ntambiko kwaajii ya kuusa mavigaviga yetu ili adahe kutiohowa kulawa mwe inusi inu ya isasa yekuwayo fyaimi, kutongeana na ukundiso wakwe yee ambaye ni Muungu na Tati yetu. 5 Mungu ni mkuu na takundigwa kumtogoa misi yose kwesiho kisiikizi! Pepa.

6 Nahondomaa muno, mumbada kinyio Muungu mwe kisingi kijihi ekuwetangae kwa wedi wa Klistu na kutongea mahinyo matuhu ambayo watuhu wagombeka ni Mbui Yedi. 7 Akini khahana Mbui Yedi ntuhu. Ukwei ni kuwa wauko wantu wawapishao, na wakunda kuihitua Mbui Yedi ya Klistu. 8 Akini, inga yumwe wetu hambu wandima wa uko uwanga kwa Muungu kulawa uwanga kwa Muungu, endayeawabiikie Mbui Yedi hae na ida tekuwabiikiayo swie, namuombeza Muungu ambadie lazi. 9 Tigombeka kae, na isasa nagombeka vituhu, inga mntu yoyose awabiikiaye Mbui Yedi ntuhu, hae na ida ambayo muihokea kae, uyo na abadiwe lazi misi yose kwesaho kisiikizi.

10 Ivi, mwamamaakhanya miye naondeza kuwatamiza wantu na Muungu? Khahana, nakunda kumtamiza Muungu? Inga nee khiwa nakunda kuwatamiza wantu nee chekuwa mndima wa Klistu.

11 Wandugu zangu, nakunda mmanye kuwa Mbui Yedi nekuwabiikiayo khaikulawa kwa wantu. 12 Chekuihokea kulawa kwa wantu katu, na chekuhinywa na mntu. Akini Yesu Klistu mwenye nee ekunigubuiyae mbui iyo. 13 Nywie mtegeeza viya nekwekaavyo aho kae na kwelavya nekuwaho mwe sia ya kumzumiiya Muungu ya Kiyahudi, viya nekuwasumiizavyo zumwezumwe da wantu wamzumiiyao Klistu kwa nguvu na kugeeza kuwadagamiza. 14 Miye nee khiwavota Wayahudi wezwangu wenye myaka inga miye kwa kutongea sia ya kumzumiiya Muungu ya Kiyahudi, nikagosoa kiya didahikanado kuyatoza mahinyo ya mababa zetu. 15 Akini Muungu, kwa wedi wakwe neekawa kanisagua miye nee khizati kuvyaigwa, akanetenga nimgoswee ndima. 16 Naho ekukundaho kunigubuiya mwanawe kwaajii niibikie Mbui Yedi yakwe kwa wantu wesaokuwa Wayahudi, kwesiho kuondeza uwambizi kulawa kwe mwii na phome, 17 na kwesaho kuita Yelusalemu kwa wada wekuniongweeyao kuwa waagiiwa, khivoka kuita si ya Alabiya, nee nauya mwe mzi wa Damesiki. 18 Yekwembokaho myaka mitatu, nee naita mwe mzi wa Yelusalemu ili kukintana na Petulo yuda ekwetangwae Kefa, na kwekaa kwakwe misi kumi dimwe na shano. 19 Uko chekuwaona waagiiwa watuhu, iya kimuona Yakobo, ndugu yakwe Zumbe Yesu.

20 Muungu amanya khigombeka uhokho, aya niwaandikiayo Muungu amanya.

21 Nekulawaho Yelusalemu nikaita mwe mizi ya Siliya na Kilikia. 22 Kisingi icho, miye mwenye nee khimanyikana na mazumwezumwe ya wantu wamzumiiyao Klistu ya uko mwe si ya Yudea, 23 wekuwacho wamanya ni kiya wekutegeezacho, "Mntu yuda ekuwaye atisuumiza aho bosi, isasa aibiikia Mbui Yedi ya uzumizi ekuwayo ageeza kuwakindia wantu wasekuzumiiya." 24 Nawo wakamtogoa Muungu kwaajii yangu.