1 Wandugu zangu, ikawa mntu kawa akagosoa mavigaviga, ninywi muongoewao na Muye, mhazeni mntu uyo abade mavigaviga agosoayo kwa muye wa uhuhusi. Akini ekaeni hae ili ninywi wenye msekugosoa mavigaviga. 2 Inga yumwe wenu anamasa yakundigwa muwambizane kwa kugosoa ivyo mndamuwe muitegeeza miagiiyo ya Klistu 3 Mntu yeyose akeona kuwa yee afaa muno na kumbe khivyo, naho mntu uyo etiiya mwenye. 4 Akini kiya mntu ehime khachu zakwe mwenye, nee adahe kwevuna, kwesio kweona yedi kusima watuhu. 5 Khachu uzigosoazo ni uwanga yako mwenye.

6 Yuda ahinywae Mbui ya Muungu akundigwa kumgombeka mhinyi wakwe mbui zedi ekuwazo nazo.

7 Mwesekwetiiya, khahana mntu adahae kufisa mbui zakwe hemeso ya Muungu. Kwaviya kiya ahandacho mntu nee abondacho. 8 Mntu akundisae khwiina zakwe za Inusi, mntu uyo endaadagamizwe, akini atongeaye Muye wa Muungu endaapate ugima wa misi yose zesazo kisiikizi kulawa kwakwe. 9 Ivyo, tikagosoa yedi kwesaho kusokea, kwaviya tesaho kufa maya tendatibonde ubosi kwa kisingi chakwe. 10 Tiwaho na phasi ya kumgosoea yedi kia mntu, tigosoe ivyo. Akini takundigwa kuwagosoea yedi wada wandugu wazumiiyao Klistu inga swie.

11 Kauweni niandikavyo kwa muwandiko mkuu, mie mwenye nee nekuandikae. 12 Wada wakundao kuoneka watana kwa mbui ya mwii nee wakundao kuwashuutiza nywie mgwiswe. Wagosoa ivyo ili wasekupata suuba, ambayo yatongea ambaho wabiikia ukwei wa mhamba wa Klistu. 13 Ata wada wekugwiswao wenye khawaitoza miagiiyo, akini wakunda nywie mgwiswe ili wapate kwevuna kuwa wana udaho mwe mii yenu. 14 Akini khikunda kwevuna kwa kintu chochose kwesiho kuwa ufe wa Zumbe yetu Yesu Klistu he mhamba. Kwaajii ya ufe wakwe, mbui zose za inusi inu khazina mana umu mwangu na kwekaa kwangu kuvokea mwande yauya na nyuma hamwe nae he mhamba. 15 Kwaviya mwe Klistu Yesu, kugwiswa na kutokugwiswa khio kintu, iya kuda kuwa kiumbe kihya ni kiya kintu. 16 Uivanisi na mbazi ambavyo vyalawa kwa Muungu viwe na wantu wose ambao watongeao ukwei uwo, awo nee wantu wa Muungu.

17 Naho, kuvokea isasa asekunipisha mntu yoyose vituhu, kwaviya khovu nekuwazo nazo mwe mwii wangu ni kwaajii ya kumgosoeya ndima Yesu.

18 Wandugu zangu, wedi wa Zumbe yetu Yesu Klistu uwe hamwe na nywie nyose. Pepa.