1 Miye Paolo mwagiiwa wa Klistu Yesu kwa ukundiso wa Muungu nawaandikia bauwa inu, nywinywi wantu wa Muungu mwekaao uko Efeso muendeeaho kumzumiiya Yesu Klistu.

2 Nawavikia wedi na uivanisi kulawa kwa Muungu Tati yetu na kwa Zumbe Yesu Klistu.

3 Atogolwe Muungu, Tate wa Zumbe yetu Yesu Klistu. Mwekutijaiya mbui ntana mwe inusi ya kimuye tekuzipatazo kwa kuwa na Klistu na kulawa uwanga kwa Muungu. 4 Kisingi Muungu khazati kuigosoa inusi, katisagua tiwe wantu wakwe kwa sia ya kuwa hamwe na Klistu, ili tiwe wantu wakwe na kwesiho masa yoyose hemeso yakwe.

Kwaajii ya ukundiso wakwe. 5 Muungu nee kakunda kuvokea aho kae kutitenda kuwa wana wakwe kwa sia ya Yesu Klistu. Kagosoa ivyo kwaviya nee ekukundisavyo. 6 Ivyo tamtogoa Muungu kwa wedi wakwe wa ukuu wa kuhondomaza ambao katekha bue kwa sia ya Mwanawe ekumkundisaye.

7 Muungu katikomboa kwa sia ya phome ya Yesu Klistu, yaani katiusia mavigaviga yetu yose. Ivyo Muungu kaonyesha wingi wa wedi wakwe. 8 Muungu nee katekha wedi uwo wose.

Kwesiho kuhungukiwa hamwe na umanyi na unyanyi wose, 9 Muungu katitenda timanye ntegaji yakwe ambayo nee kaifisa, kagosoa ivyo kwaviya nee ekukundisavyo na nee kakunda kuiganiza kwembokea Yesu Klistu. 10 Nteganyi ya Muungu neiwa kisingi kibuaho, atiika hamwe viumbe vyose vya uko uwanga kwa Muungu na vya inusi na kuvitenda vigookewe na Klistu.

11 Vintu vyose vigosoka inga Muungu ekupangavyo na ekukundavyo, na Muungu katisagua swiswi tiwe wantu wakwe kwa kuwa hamwe na Klistu inga ekukundavyo yee na kakunda ivyo kuvokea aho kae. 12 Na swiswi tekuwao wa bosi kuika makauwiyo yetu mwe Klistu tidahe kwekaa kwa ntunyo ya ukuu wakwe.

13 Na nywie wantu wa si ntuhu mtegeeza mbui ya kwei yaani Mbui Yedi yekuwaeteayo uohozi, na mkamzumiiya Klistu, nae Muungu ili kuonyesha kuwa nywie ni wantu wakwe, akawagea mhuli kwa kuwekha yuda Muye wa Muungu ekuwaikiao kiaga. 14 Uyu Muye wa Muungu nee mgookezi kwa yada Muungu ekugombekayo endaawekhe wantu wakwe, mbui iyo yatekha nguvu ya kumanya, Muungu enda awakomboe kwei wose wekuwao wakwe. Tiutogoe ukuu wakwe!

15 Kwaajii iyo, miye nami tangia nekusikiaho mbui za uzumizi wenu mwe Zumbe Yesu, na ukundiso wenu kwa wantu wose wa Muungu, 16 nchekubada kumtogoa Muungu kwaajii yenu, niwakumbukaho he uviki wangu, 17 ili Muungu wa Zumbe yetu Yesu Klistu, Tate ekuwae mkuu awekheni Muye wakwe, endayeawekhe umanyi na kuwagubwiiya mdahe kummanya Muungu. 18 Namuombeza Muungu awaambize mdahe kuva mwe mioyo yenu kauwiyo ambado muwa nado kulawana na yee kuwetanga na kumanya ukuu wa utana wakwe ambao nee kawaikia kiaga wantu wakwe kuwa endaawekhe. 19 Na ivyo mdahe kumanya udaho wakwe wekuwavyo mkuu muno kwaajii yetu swiswi tizumiiyao. Udaho uwo ugosoayo ndima umu mwetu ni sawa na ida nguvu khuu muno, 20 ambayo Muungu kaitumia kumyuyusa Klistu kwembokea iyo na kumuika mwe mkono wakwe wa kuume uko uwanga kwa Muungu. 21 Klistu agookea kiya ugookezi na uwongoezi mtuhu, agookea kiya kintu chenye udaho yee ni mkuu kusima nguvu yoyose waitunyayo wantu, inu ni kwei yee agookea waongoezi wekuwao isasa mwe inusi na wada waongoezi wa inusi yezayo. 22 Muungu kaika vintu vyose asi ya ugookezi wa Yesu, akamwekha kuwa mkuu wa vintu vyose kwaajii ya zumwezumwe da wantu wamzumiiyao Klistu. 23 Zumwezumwe da wantu wamzumiiyao Klistu nee mwii wakwe naho ni uiganizi wakwe, yee aigainizae vintu vyose kiya hantu.