1 Kwaajii ya ayo, miye Paolo khigewa mwe kifungo kwaajii ya ndima ambayo Klistu Yesu kanekha kwaajii yenu, wantu wesaokuwa Wayahudi. 2 Haika namanya mbinda kae kutegeeza kuwa Muungu, kwa wedi wakwe kanekha ndima inu niigosoe kwaajii yenu wantu wesaokuwa Wayahudi. 3 Muungu kanigubwiiya nteganyi yakwe ambayo nee ufiswa, na miye kiwaandikia kwa ujihi mbui iyo. 4 Nywie mkasoma mbui izo, mwendamdahe kumanya viya miye nimanyavyo sii ya Klistu. 5 Aho kae wantu khawekugubuiwa sii iyo, akini isasa Muungu kawamanyisa waagiiwa na waoni kwa sia ya Muye wakwe. 6 Sii yenye ni inu, kwa sia ya Mbui Yedi wantu wesaokuwa Wayahudi wekhigwa fungu dao mwe yada majaiwa, wowo ni vimamo vya mwii udauda na wawa hamwe mwe kiaga kiakia ekukigosoacho Muungu kwa sia ya Klistu Yesu.

7 Miye khitendwa mndima wa Mbui Yedi kwa wedi wakwe Muungu ekunekhao na udaho wakwe mkuu. 8 Miye nesaekumanyika muno kusima wantu wose wa Muungu iya Muungu kanekha wedi wakwe niwabiikie wantu wesaokuwa Wayahudi, Mbui Yedi ya majaiwa yesayo kudaha kutaazika yalawayo kwa Klistu, 9 na kuika pwii kwa kiya mntu sii inu viya igosoavyo ndima, ambayo Muungu mwekuumba vintu vyose nee kaifisa kuvokea aho kae. 10 Akini isasa Muungu akunda wantu wose wamzumiiyao Klistu wamuonyeshe kiya mntu viya Muungu ekuwavyo na umanyi wose. Akunda wakuu mwe inusi yesayokuoneka na kia kintu chenye udaho cha uwanga kwa Muungu vimanye ivyo. 11 Ivyo nee ekukundavyo Muungu kuvokea aho kae ekuumbavyo vintu vyose na Zumbe yetu Yesu Klistu nee mwekutenda yagosoke. 12 Kwa kuungana na Yesu, tadaha kuita kwa Muungu kwesiho maatu kwaajii tamzumiiya Klistu Yesu. 13 Kwaivyo nawaombeza mwesekufa maya kwaajii ya masuumizo nipatayo kwaajii yenu, kwaviya yawatenda mtunywe.

14 Kulawana na nteganyi iyo, nakinta mavindi hemeso ya Tate kuwavika nywie, 15 ambaye nee vokeo da ugima wa vintu vyose vya uwanga kwa Muungu na mwe inusi. 16 Namuombeza Muungu awatende mtintimae kwa kuwagea nguvu mioyo yenu kwa sia ya Muye wakwe kwa viya wekuwavyo wingi wa ukuu wakwe. 17 Ili Klistu ekae mwe mioyo yenu kwa sia ya kumzumiiya yee, naho namuombeza awaambize kuwatintimaza muno mwe ukundiso wakwe, ivyo ukundiso wakwe wendauwe inga mazindo na msingi wa kwekaa kwenu, 18 ili nywie hamwe na wantu wose wa Muungu mdahe kuva Klistu atikundisavyo muno kwa ukundiso wesaokuwa na kisiikizi. 19 Naombeza mdahe kuumanya ukundiso uwo, hetiho khaidaika kuumanya katu viya wekuwavyo mkuu, aho nee khachu zenu zendaoziigane na zakwe.

20 Yee adaha kugosoa mbui za kuhondomaza muno kusima ambayo tamuombeza hambu tamamaakhanya kuwa adaha kugosoa. Yee agosoa kuigana na nguvu igosoayo ndima umu mwetu, 21 Takunda wantu wose wa Muungu wammanye Muungu ni mkuu, na kiya yumwe yetu amzumiiyae Klistu amtogoe Klistu misi yose kwesaho kisiikizi! Pepa.