1 Miye nekufungwae kwaajii ya kumgosoeya ndima Zumbe nawahambeeza muno mwekae inga mwekutangwavyo ni Muungu. 2 Muwe wategezaji na wahuhusi na wazizimizi na mwesekuwakima wantu waonyeshe ukundiso. 3 Gosoani kia didahikanado kukauwa vitana uhamwe ambao tietewa na Muye wa Muungu kwa kwekaa kwa uivanisi. 4 Swie wose ni inga vimamo vya mwii umwe na Muye wa Muungu umwe, ivyo Muungu katetanga mwe kauwiyo dimwe. 5 Naho yuuko Zumbe yumwe, uzumizi umwe na ubatiizo umwe. 6 Yuuko Muungu yumwe naye nee Tate wa wantu wose, ambaye agookea wantu wose naho agosoa ndima ndani ya wantu wose na ekaa ndani ya wantu wose.

7 Akini Klistu kamwekha kiya yumwe yetu funge yakwe ya Muye kuigana na ekukundavyo yee mwenye. 8 Inga Maandiko ya Muungu yagombekavyo,

"Ekuitaho uwanga kwa Muungu

Akaita na wavugaiwa wangi

Na kuwekha wantu funge."

9 Na igombekwaho, "Ekuitaho uwanga kwa Muungu," Mana yakwe nimbwai? Mana yakwe ni kabla khazati kuita uwanga kwa Muungu akaseeya mwe inusi. 10 Yee ekuwaye kaseeya nee mwekuita uwanga muno kwemboka mbingu zose ili awe kia hantu mwe inusi. 11 Yee nee mwekuwasagua watuhu kuwa waagiiwa na watuhu kuwa waoni na watuhu wabiikiyao Mbui Yedi na watuhu kuwa waisi wa wantu na watuhu wahinyi, 12 kawasagua ili kuwaambiza wantu wose wa Muungu kugosoa ndima yakwe, na kuwatenda wawe watintimavu inga mwii wa Klistu, mana yakwe zumwezumwe da wantu wamzumiiyao Klistu, 13 mbui iyo yendaiendeee adi swie wose tiwe kintu kimwe mwe kuzumiiya kwetu, na mwe kummanya Mwana wa Muungu. Tendatiwe wantu ambao watintimavu na tendatiwe inga eivyo Klistu mwenye. 14 Neaho khatinatiwe vituhu inga wana wateke, tikegalwa uku na uko kwa kia khusi ya mahinyo ya wantu watiizi ili kuwaza watuhu kwa mahinyo yao ya uhokho. 15 Akini tikaambizana ukwei mwe ukundiso, na kutintimaa mwe mbui zose, na kuigana na Klistu ekuwaye mtwi. 16 Asi ya ukauwizi wakwe, vimamo vyose vya mwii vyatozana hamwe, na mwii wose wakauwiya wambiizi wa vimamo vyakwe. Naho kiya kimamo kikagosoa ndima yakwe ikundigwavyo, mwii wose wakuwa na kwezenga mwe ukundiso.

17 Waume nagombeka mbui inu naho nawahaza kwa zina da Zumbe mwesekwekaa inga wantu wesaokummanya Muungu, watongeao fanyanyi zao za bue, 18 na fanyanyi zao zigewa kiza. Na wahae na ugima wa Muungu kwaajii ya uhezi wao wekuwao umo mwao na ukaidi wao. 19 Wantu awo khawana soni vituhu wagosoaho mavigaviga, na waendeea kugosoa mbui fyaimi kwaajii ya kwetamiza wowo wenye.

20 Akini nywie mwekuhinyavyo mbui za Klistu khamwekuhinywa mbui inga izo. 21 Namanya kuwa mtegeeza vitana mbui zakwe na mwekuwaho wahina wakwe nee mhinywa ukwei weivyo kuusu Yesu. 22 Ekani khachu zenu zekwembokazo, yaani uda untu wenu wa kae wekuwao wadagamizwa kwa khwiina zakwe za utiizi, 23 isasa etendeni uhya mwe mioyo yenu na mwe fanyanyi zenu. 24 Naho muwe na wekazi uhya inga viya Muungu ekuwaumbavyo ili muigane nae, mkagosoa mbui zimtamiazo Muungu kwesaho waa dodose.

25 Kwaivyo, ekani uhokho. Kia yumwe akundigwa kumwamba mweziwe ukwei, kwa mana kia yumwe wetu kwaviya swie wose ni vimamo vya mwii umwe. 26 Inga mkakimwa mwesekuzumiiya maya yenu iwatende mgosoe mavigaviga, naho mwesekuwa na maya adi zua diswaho. 27 Mwesekumwekha Ibiisi phasi ya kuwavota. 28 Ekuwae mbavi, asekubawa vituhu, iya avoke kugosoa ndima yekuwayo yedi, ili apate kuwa na kintu cha kumwambiiza yee na watuhu wekuwao wakiwa. 29 Mwesekugombeka mbui za ufyaimi, iya mgombeke mbui zifaazo za kuwaambiza watuhu kwa yada wakundayo ambao wawategeeza. 30 Naho msekumtenda Muye wa Muungu asininike kwaviya yee ni alama ya Muungu kwenu, uwonyeshao kuwa ni wantu wakwe adi msi uda ambao Muungu endaawakomboe. 31 Usungu wose na maya na usekugombeka chochose ili watuhu wasuumie na kiya kintu chekuwacho kifyaimi. 32 Mgosoeyane yekuwayo yedi na yenye kuoneana mbazi na kia yumwe na amuekee mweziwe inga nae Muungu ekuwaekeavyo nywie kwa sia ya Klistu.