1 Nywie wana wategeeze wavyazi wenu kwa kuwa mwamzumiiya Zumbe, kwa kugosoa ivyo ni mbui yedi. 2 Amli ya bosi yenye kiaga yekuandikwayo mwe Maandiko ya Muungu yamba, "Mtunye tati yako na mami yako inu nee amli ya bosi na yenye kiaga." 3 "Ivyo wendaujaiwe na kwekaa misi mingi mwe inusi."

4 Na nywie wakina tate mwesekuwasongeeza wana wenu iya muwaee kwa ntunyo na kuwekha mahinyo kulawa kwa Zumbe Yesu.

5 Nywie watumwa, wategezeni wakuu wenu hanu he inusi kwa kuwatunya na kuwategeza, na kwa moyo umwe, inga viya mumtegeezavyo Klistu. 6 Gosoani ivyo khio du kwa kisingi kia wakuu wawakauaho ili wawekhe ntogoo, iya gosoani ndima kwa moyo inga akundavyo Muungu kwaajii nywie ni wandima wa Klistu. 7 Gosoani ndima zenu kwa nyemi inga mwamgosoeya ndima Zumbe. 8 Yoyose mwe kutenda yedi awe mtumwa hambu mtu hulu endaamwekhe kia mntu funge kwa dodose dekuwado dedi.

9 Nywie wakuu wagosoeyani yedi watumwa wenu inga ikundigwavyo. Msekuwatisa kwaviya mwamanya kuwa yee ekuwaye Zumbe yenu nee Zumbe yao na yuuko uwanga kwa Muungu, nae khana ubahuzi.

10 Nabindiiza kwa kugombeka, Muungu awekheni utintimavu kwa kuwa hamwe na Zumbe naho kwa udaho na nguvu zakwe. 11 Ehasikeni vintu vyose vya kutoana ili mdahe kuhigana na nteganyi za unyanyi wa Ibiisi. 12 Gosoani ivyo kwaviya khatitoana na wantu iya tatoana na mazaiko yenye nguvu na waongoezi wao wenye kugookea inusi inu yekuwayo mwe kiza na tatoana na mazaiko yekuwayo kia hantu uwanga. 13 Kwaajii iyo doani vitoanavyo vyose vya Muungu ili mdahe kuvotana msi wa ubanasi, na mkabinda kuyaiganiza yose gookani kwa utintimavu.

14 Naho ekaeni meso. Ukwei uwe inga mkwiji mwe vigudi vyenu na kugosoa yakundigwayo na Muungu diwe gwanda denu da kwekinga mwe kifua, 15 na khwiina ya kubiikia Mbui Yedi ya uivanisi iwe inga sabana mwe miundi yenu. 16 Na misi yose kuzumiiya kwenu kuwe inga ngao ili mdahe kukindia hosa zose zenye moto ya yuda Ibiisi. 17 Uwohozi uwe inga khofia ya chuma mwe mitwi na Mbui ya Muungu iwe inga paange mwekhigwayo na Muye wa Muungu 18 Muwe mwaombeza kisingi chose kwa maombezi yoyose inga Muye wa Muungu awaongoeavyo. Muwe meso msekusokea kuwavika wantu wose wa Muungu. 19 Niombeani kwa Muungu na miye ili nitamwiiaho Muungu anijaiye cha kugombeka, ili nidahe kubiikia kwa utintimavu ukwei ambao Muungu kauika pwii mwe Mbui yedi. 20 Mie ni mgombekaji wa Mbui Yedi ya Yesu Klistu na kwajii ya ndima iyo miye kigewa mwe geeza ivyo niombeani ili nidahe kubiikia kwa utintimavu inga nikundigwavyo.

21 Tikiko, ndugu yetu timkundisae na amgosoeaye ndima Muungu vitana endaawagombeke ili mmanye mbui zose nigosoazo isasa. 22 Namwaagiiya kwenu kwaajii mmanye mbui zetu na awagee moyo.

23 Ivyo ndugu zangu namwombeza Muungu Tate na Zumbe yetu Yesu Klistu awekhe uivanisi na ukundiso na uzumizi. 24 Namwombeza Muungu awe yedi muno kwa kiya yumwe endaye kumkundisa Muungu.