1 Nywie aho kae nemuwa inga muuya na nyuma kwaajii ya masa na mavigaviga yenu. 2 Kisingi kida nemuwa watongea mbui fyaimi za inusi inu, mkawa mwamtongea mkuu wa mazaiko wa uwanga ambao isasa wawaongoeya wantu wesaokumtegeeza Muungu. 3 Ata swie netiwa inga wowo aho bosi tikekaa kutongeana na khwiina zetu za mwii na kugosoa mbui ambazo mii na mamakhanyi zetu zakunda. Swie viyaviya nee tikundwa kwekhingwa sugusa khuu na Muungu inga wantu watuhu wesaokumtegeeza Muungu. 4 Akini Muungu ni mwenye mbazi muno, na atikundisa muno, 5 ata tekuwaho inga tiuya na nyuma kwaajii ya mavigaviga yetu akatitenda tiwe wagima hamwe na Klistu Yesu, yani muoholwa kwa wedi wakwe. 6 Kwa kuwa hamwe na Klistu Yesu, Muungu katiyuyusa hamwe nae, na tikagookee hamwe nae uko uwanga kwa Muungu. 7 Nee ekukundisavyo koonyesha wantu wa kisingi chezacho ukuu wa wedi wakwe ekutijaiyao swie kwa ukundiso mwe kuwa hamwe na Klistu Yesu. 8 Kwaviya muoholwa kwa wedi kwa sia ya uzumizi na wala khio kwa ntendwa ntana, uwohozi uwo ni funge kulawa kwa Muungu. 9 Khamwekuoholwa kulawana na ntendwa zenu ntana, ivyo mntu yoyose asekwevuna. 10 Muungu katiumba ivyo, na kwa kuwa hamwe na Klistu Yesu, katiumba ili tekae mwe ntendwa zedi ekutiikiazo tekae.

11 Naho kumbukani aho kae, nywie wantu wesaokuwa Wayahudi, Wayahudi nee wakewetanga wantu wesao kugwiswa, akini wowo wetanga wantu wekugwiswao, kwaajii ya kugwiswa kwao. 12 Kwaviya aho kae nee khamna Klistu, na khamwekuwa wantu wa Isilaeli, muwa wageni wesaokuwa na maagane ekuwaikiayo kiaga Muungu. Nee khamna kauwiyo dodose na nemuwa wantu wesaokummanya Muungu mwe inusi inu. 13 Akini isasa kwa kuungana na Klistu Yesu nywie ambao aho bosi nemuwa hae na isasa muwa hehi kwembokea ufe wa Yesu Klistu he mhamba. 14 Kwaviya Klistu mwenye katietea uivanisi kwa kuwatenda Wayahudi na wantu wa si ntuhu kuwa kintu kimwe. Kwa kuulavya mwii wakwe kauusa umasa ambao nee utipanga inga ukanto. 15 Klistu ekuyaho na nyuma hada he mhamba, akausa nguvu ya miagiiyo ya Kiyahudi kwa kugosoa ivyo akatenda mazumwezumwe ayo maidi, Wayahudi na wesao kuwa Wayahudi kwa kugosoa ivyo wantu awa wakawa na uivanisi. 16 Kwa sia ya kuuya na nyuma he mhamba, akausa khumbizi ya Wayahudi na wesaokuwa Wayahudi na kuwaika zumwezumwe dimwe. Naho akawaika wose kuwa wevane na Muungu. 17 Klistu keza na kubiikia Mbui Yedi iyetayo uivanisi kwenu nywie wantu mwesaokuwa Wayahudi ambao nemuwa hae na Muungu na kwa Wayahudi ambao newawa hehi na Muungu. 18 Ivyo kwa kwembokea yee Klistu, swie wose Wayahudi na wantu wa wesaokuwa Wayahudi, tadaha kumtimia Tate kwa Muye umwe.

19 Naho nywie khio wageni wala wantu wa chongoi. Nywie ni wenyezi hamwe na wantu wakwe Muungu na ni wantu wa kaya ya Muungu. 20 Nywie muwa inga nyumba ambayo izengwa mwe msingi na msingi uwo ni wagiiwa na waoni, Klistu Yesu mwenye nee iwe khuu da msingi uwo. 21 Zengo dose diunganika mwe Klistu na kugooswa ili diwe Nyumba ya Muungu mwe Zumbe. 22 Kwa kuungana na Yesu Klistu, nywie nanywi mzengwa hamwe na wantu wose ili muwe hantu ambaho Muungu ekaa kwa sia ya Muye wake.